4
Yerusalɛn kala fena
1 Ee! Xɛmaan mi fa mayilenma!
Xɛmaan naxan yi fan,
na mi fa yanbanma!
Bɔxɔ bun nafunla naxanye yi rasariɲanxi Ala xa,
ne bata raxuya ayi kira xunne ra!
2 Siyon kaan naxanye yi yatɛxi dangu xɛmaan na
hali naxan nun e gbindin binyan lan,
ne bata fa yatɛ fɛɲɛne ra,
naxanye rafalaxi bɛndɛn na,
fɛɲɛ rafalan naxanye rafalaxi!
3 Hali kankone e xiɲɛn tima e diine xa
e diine yi e xiɲɛn min,
koni n ma yamaan tan bata lu
alo dii nga ɲaxina,
alo dangaranfulene tonbonni.
4 Dii futene lɛnna kankanma e dɛ kankeni ige xɔnla ma.
Diidine donseen maxɔdinma,
koni muxu yo mi se soma e yii.
5 Naxanye yi e baloma donse ɲaxumɛ faɲine ra,
kamɛn nan fa ne halagima taan xɔn.
Naxanye gboxi ɲaxunni,
ne ɲamani yegelenma e yiine ra.
6 N ma yamaan hakɛn gbo dangu Sodoma kaane yulubin na.
Na taan halagi sanɲa ma kedenna nin
muxu yo mi a yiin din a ra.
7 En ma kuntigine fatine yi sariɲan dangu balabalan kɛsɛn na,
e fati kidin yi fixa dangu nɔnɔn na.
E fatin yi mayilenma dangu gɛmɛ gbeeli faɲine ra
e yɛtagine yi tofan
alo gɛmɛ mamiloxi faɲine.
8 Koni iki, e yɛtagine fɔrɔ tigenna xa,
e mi fa kolon kirane xɔn.
E kidin nan tun fa bɔlixi e xɔnne ma,
e fati kidine fasaxi e ma alo firinne.
9 Muxun naxanye faxaxi yɛngɛni
ne fisa muxune xa
naxanye faxaxi kamɛn na
donse xɔnla naxanye ɲaxankatama,
naxanye doyenma donsetareyani.
10 Gbalon godo n ma yamaan ma waxatin naxan yi,
hali dii ngane ɲɛnigene to yi fan,
e e diine gan nɛn, e yi e don.
11 Alatala bata a xɔlɔn mayita han a danna,
a fitinaxin bata yelin a xɔlɔ gbeen nagodɛ.
A bata tɛɛ gbeen nadɛgɛ Siyon taani
naxan taan ganxi han bɔxɔna.
12 Bɔxɔn mangane nun dunuɲa muxu yo mi yi laxi a ra
a yaxune nun yɛngɛfane yi nɔɛ soɛ nɛn
Yerusalɛn taan so dɛɛne ra.
13 Na ligaxi taan nabine yulubine nan ma fe ra
e nun a saraxaraline hakɛne
naxanye tinxin muxune faxa taani.
14 Iki e tununxin nan sigan tima taan xun xɔn alo danxutɔne.
Wunla bata e sariɲanna kala
han yii mi fa dinɲɛ e dugine ra.
15 Muxune yi lu sɔnxɔɛ e famatɔɔn na,
e naxa, “Ɛ masiga nxu ra,
ɛ tan muxu sariɲantarene!
Ɛ masiga, ɛ masiga!
Ɛ nama ɛ yiin din sese ra de!”
E lu e giyɛ,
e mi a kolon e sigɛ dɛdɛ.
Koni hali siya gbɛtɛne a falama nɛn, e naxa,
“E mi nɔɛ luyɛ nxu konni.”
16 Alatala yɛtɛɛn bata e raxuya ayi
a mi fa a ɲɔxɔ luma e xɔn mumɛ!
Nayi, muxu yo mi fa saraxaraline binyama,
muxu yo mi hinanma yamaan fonne ra.
17 Nxu yɛɛne xadan nɛn nxu mali muxu fendeni fuuni.
Nxu yi tixi nxɔ kantan tidene yi,
nxu siyaan mamɛ
naxan mi yi nɔɛ nxu rakisɛ.
18 Yaxune yi nxu mamɛlɛnma nxu sigadene birin yi
alogo nxu nama mini taan xɔn.
Nxɔ dunuɲa raɲanna bata yi maso,
nxɔ siimayaan ɲanmatɔɔn nan yi a ra,
nxu raɲanna bata yi fa yati!
19 Nxu sagatan muxune yi mafura singbinna xa kore.
E nxu kedi nɛn geya longonne ra,
e yi dɔxɔ nxu yɛɛ ra tonbonni.
20 E yi Alatalaa muxu sugandixin suxu
naxan yi luxi alo nxu niin yɛtɛna,
nxu yi nxu mirixi naxan ma fa fala
nxu yi nɔɛ dɔxɛ nɛn a nininna bun siyane yɛ.
21 Edɔn kaane, ɛ sɛwa, ɛ ɲaxan,
ɛ tan naxanye dɔxi Yusu yamanani.
Igelengenni ito radanguma ɛ tan fan ma nɛn,
ɛ yi a dɔlɔ xɔlɛn min,
ɛ xun magi a ra,
ɛ ragenla yi lu.
22 Siyon kaane, ɛ kɛwanle bata yelin saranɲɛ ɛ ra.
Ɛ mi fa xalima konyiyani sɔnɔn!
Koni, ɛ tan Edɔn kaane,
Ala ɛ hakɛn saranma nɛn ɛ ra,
a yi ɛ yulubine ramini kɛnɛnni!