21
Zozi 'bɔla Zeruzalɛm
(Mk 11.1-11; Lk 19.28-40; Zan 12.12-19)
1 Zozi 'lee 'e -srunɔn a -plinan Zeruzalɛm. O 'bɔ 'fla nɛn waa laabo Befaze bɛ -a "srɔn. 'Fla zɩɛ e ya Olivie pɔn man. Ɛn Zozi 'e -srunɔn "fli 'pa 'sia 'o 'lɛ.
2 Yaa 'vɩ -wlɛ 'nan: «'Ka 'kʋ 'fla nɛn 'ka 'lɛ bɛ -a da! -Te 'ka 'bɔla 'nan nun bɛ, ka -aflumun "bʋ "tʋ 'lee -yee 'nɛn ye 'o 'baa -tɔdɩ. 'Ka o baa 'sʋ -e 'ka 'ta waa 'mɛn!
3 -Te min -tʋ 'wɩ laabʋ 'ka 'lɔ bɛ, 'ka vɩ -a san lɛ 'nan: ‹Minsan "e 'nan -aflumun 'wɩ a 'e man.› 'Nun tɔɔn 'e 'pɛ sia "da -e 'ka 'ta -a.»
4 'Wɩ pɛɛnɔn zɩɛ, e drɛ 'wɩ nɛn Bali 'lewei vɩzan -a 'vɩ 'e 'cɛn bɛ -a 'lɛ sɔɔdɩ -a. Kɔɔ yaa 'vɩ 'nan:
5 «'Ka vɩ Zeruzalɛm 'nɔn lɛ 'nan:
"Ka 'yiɔ, 'cee mingɔnnɛn a -tanan 'ka 'va!
E -taala 'e man -trɔɔ.
E ya 'e -nyrandɩ -aflumun da.
-Aflumun nɛn e -trɔ "siala bɛ,
-a 'nɛn da nɛn e ya 'e -nyrandɩ.»
6 Zozi -srunɔn "fli zɩɛ o 'kʋ, ɛn 'wɩ nɛn yaa 'vɩ -wlɛ "bɛ waa drɛla "da.
7 O -ta -aflumun "bʋ 'lee -yee 'nɛn 'a, o 'wee sɔnun -sɛn "da, ɛn Zozi -nyran "da.
8 Minnun "kaga 'wee sɔnun paala -a 'lɛ. Ɛn min -mienun yiba "pɛnɛnnun cɛɛn, ɛn waa 'pla -a 'lɛ. Zɩ "o min -dan "siala zɩɛ.
9 Min "kaga yra -a 'lɛ, ɛn min "kaga -fɔla "da -a koda, te o pɛɛnɔn plaman 'e cin va. Waa ve 'nan:
«-Fɛavɛa o! -Fɛavɛa o!
David kluda min -le -fɛavɛa o!
Bali -le -fɛa 'e 'kɔn min nɛn
Minsan -a 'pa 'sia bɛ -a man.
Bali 'tɔ 'e drɛ -dan laji lou!»
10 Zɩ e 'bɔla Zeruzalɛm bɛ, -wee pladɩ Zeruzalɛm 'si "fo, ɛn 'flanɔn pɛɛnɔn 'man nyɔɔn -a laabʋdɩ -a 'nan: «-Tɩ nɛn min 'bɔ 'labɛ -a?»
11 Minnun "kaga "nɛn waa si -fɔ bɛ, o 'nan: «Zozi nɛn! Bali 'lewei vɩzan nɛn, e "sia Nazarɛtɩ Galile 'lɛglɔn 'ji.»
Zozi fɛnun -tannɔn 'pin Bali -pan 'kuin
(Mk 11.15-19; Lk 19.45-48; Zan 2.13-17)
12 "Bɛ -sru ɛn Zozi 'kʋ Bali -pan 'kuin. Minnun nɛn o ya Bali -pan fɛnun -tannan 'lee minnun nɛn o ya -a 'lɔnan Bali -pan 'kuin bɛ, e o -pin. E "lala ta -fɔɔnɔn 'le 'tablonun 'lee -plablo -tannɔn 'le pɛinnun fuila "man.
13 Ɛn e 'nan -wlɛ 'nan: «E ya e 'crɛn -tɛdɩ Bali -le 'fluba 'ji 'nan, Bali "e 'nan: ‹'Mɛn 'kɔn -kɔan 'an trʋ 'ba 'kɔn 'a.› 'Pian kaa drɛ 'cee crin wʋnan -a.»
14 "Bɛ -sru ɛn yiɛ 'winɔn 'lee minnun nɛn o "tun "bo bɛ, o pli Zozi man Bali -pan 'kuin, ɛn e o beli.
15 Bali -pannɔn 'tanɔn 'lee 'fluba 'ci vɩnɔn 'wɩ -dandan nɛn Zozi cɩ -a drɛnan bɛ -a -nan 'yɩ. Ɛn o nannannun 'yɩ "nyian te o plaman Bali -pan 'kuin -a vɩdɩ -a 'nan: «Bali David kluda min 'tɔ drɛ -dan!»
-A 'wɩ 'nan o man,
16 ɛn o 'wɩ 'pla Zozi lɛ. Waa 'vɩ -yrɛ 'nan: «'Wɩ nɛn o cɩ -a vɩnan 'labɛ, yi'a maan dʋʋ?»
Ɛn Zozi "e 'nan -wlɛ 'nan: «Maan maan. -Mɛ "le "wɛan nɛn ka 'wɩ zɩɛ -a laabʋ 'an 'lɔ? 'Wɩ nɛn 'e 'crɛn -tɛdɩ Bali -le 'fluba 'ji bɛ ka'a tian -a ta vɩlɛ dʋʋ? Kɔɔ e ya 'e 'crɛn -tɛdɩ 'nan:
‹Yia drɛ ɛn nannannun 'lee 'nyɔnmlin 'nɛnnun 'i 'tɔ "yi 'vɩ.› »
17 -A -nan nɛn e o 'tʋɩ, ɛn e 'si Zeruzalɛm. E -kʋ 'fla nɛn waa laabo Betani bɛ -a da, e 'nyin 'nan nun.
Yiba "tʋ nɛn ya'a 'baa dɩɛ Zozi -a -tɛ
(Mk 11.12-14, 20-25)
18 Tʋ cɛɛn bodrun ɛn Zozi Zeruzalɛm si 'sia "nyian. "Yɛɛ -kɔn -kʋnan 'sia bɛ, -a -nan nɛn dra -a -tɛdɩ 'sia.
19 E fijie yiba 'yɩ 'si man, ɛn e pli "man 'nan -e 'e 'blʋ -mie 'cɛn 'e -blɩ. 'Pian -a 'la 'saza nɛn yaa 'yɩ "da, ɛn e 'nan fijie yiba zɩɛ -yrɛ 'nan: «Te 'i 'blʋ -tʋwli 'e ba 'i man 'li "fo "dɩ!» 'Nun tɔɔn fijie yiba 'bɔ 'ka.
20 Zɩ -a -srunɔn 'wɩ zɩɛ -a -nan 'yɩ bɛ, o 'lɛbo "fɔ, ɛn o 'nan -yrɛ 'nan: «E drɛ 'kɔ, ɛn fijie yiba "ka 'nun zɩɛ?»
21 Zozi "e 'nan -wlɛ 'nan: «Maan ve 'cɛɛ 'wɩ tɩglɩ 'a 'nan, -te ka yi -tɛala Bali da bɛ, ɛn "nyian -te ka'a 'ci -fɔɔman dɩɛ, 'wɩ nɛn maan drɛ fijie yiba 'labɛ -yrɛ "bɛ, 'ka 'pɛ "sɔa -a drɛdɩ -a. Ɛn "nyian -te kaa 'vɩ pɔn 'labɛ -yrɛ 'nan: ‹'I 'sʋra 'gʋ, 'i 'kʋ -trɔa jemie -va bɛ›, yaa dra.
22 -Te ka yi -tɛala Bali da, ɛn ka fɛ -tʋ laabʋ -yrɔ -a trʋ 'badɩ -a bɛ, kaa ye.»
Zozi 'le -kɔladɩ "sia nyin zia?
(Mk 11.27-33; Lk 20.1-8)
23 "Bɛ -sru ɛn Zozi 'kʋ Bali -pan 'kuin, e 'wɩ "paadɩ 'sia minnun -ji. -A -nan nɛn Bali -pannɔn 'tanɔn 'lee min cejenun -ta, ɛn waa laabʋ -yrɔ 'nan: «-Kɔladɩ "cɛn "a nɛn i 'wɩnun zɩɛ -a drɛ? Ɛn -tɩɛ -si -nɔn 'yiɛ?»
24 Zozi "e 'nan -wlɛ 'nan: «An 'bɔ "nyian an "ta 'wɩ 'tʋwli "cɛ laabo 'ka 'lɔ. -Te kaa -sru 'vɩ 'mɛn bɛ, -kɔladɩ nɛn an 'wɩnun zɩɛ -a drɛ 'a bɛ, maan -ci "sia 'cɛɛ.
25 -Tɩɛ Zan 'pa 'sia 'nan 'e 'ta min -batize drɛ? Minnun 'bɛ 'pa 'sia, -baa Bali 'bɛ 'pa 'sia? 'Ka vɩ 'mɛn!»
-A -nan nɛn waa vɩdɩ 'sia 'o cin yei 'nan: «-Te -kaa 'vɩ 'nan: ‹Bali 'bɛ 'pa 'sia bɛ›, e -taa -a laabʋlɛ -kaa 'lɔ 'nan: ‹-Mɛ "le "wɛan nɛn ka'a yi -tɛala 'wɩ nɛn Zan -a 'vɩ bɛ -a da dɩ?›
26 Ɛn -te -kaa 'vɩ 'nan: ‹Minnun 'bɛ 'pa 'sia bɛ›, minnun pɛɛnɔn -taa 'wunlɛa -kaa man, kɔɔ o pɛɛnɔn Zan "siala Bali 'lewei vɩzan -a.»
27 -A -nan nɛn waa 'vɩ Zozi lɛ 'nan: «Kʋ'a san -tɔa dɩ.»
Ɛn Zozi "e 'vɩ "nyian -wlɛ 'nan: «An 'bɔ "nyian min nɛn e -si -nɔn 'mɛn ɛn an 'wɩnun zɩɛ -a drɛ bɛ, ma'an -ci sia 'cɛɛ dɩ.»
Zozi -kɔnnɛn "fɔ 'nɛn 'klɔnmɔn "fli "man
28 «'Ka 'ci "nrɔn 'wɩ 'gʋɛ -a da! Min -tʋ a, ɛn 'yee 'nɛn 'klɔnmɔnnun a 'fiili. Yi -tʋ da bɛ yaa 'vɩ -a ceje 'nɛnzan lɛ 'nan: ‹'Mɛn 'nɛn 'i 'kʋ 'nyranman 'pa cɛɛgʋ 'mɛn rɛzɛn fei.›
29 -Yee 'nɛn zɩɛ e 'nan -yrɛ 'nan: ‹Ma'an 'ko dɩ›. 'Pian "bɛ -sru -a ci lila, ɛn e -kʋ.
30 'Wɩ 'tʋwli zɩɛ yaa 'vɩ "nyian 'yee 'nɛn 'fɔla "dazan lɛ. 'Nɛn zɩɛ e wɩɩ "man. Yaa 'vɩ 'e "tɩ "lɛ 'nan: ‹'An "tɩ, maan 'man›, 'pian "bɛ -sru ya'a 'kʋlɛ dɩ.
31 'Nɛnnun "fli zɩɛ o yei "bɛ, -tɩɛ 'e "tɩ "ci 'sɔ wɩ drɛ?»
Minnun tanɔn nɛn o cɩ 'wɩ zɩɛ -a mannan bɛ, o -yrɛ 'nan: «'Nɛn ceje 'nɛnzan nɛn.»
Ɛn Zozi "e 'nan -wlɛ "nan: «Maan ve 'cɛɛ 'wɩ tɩglɩ 'a 'nan, 'sukɔlɛ 'sinɔn 'lee -kɔnnɛn -wɛɛnɔn -tɔala 'ka 'lɛ -wladɩ -a Bali -le mingɔnnɛn trɛda.
32 Zan -ta -si tɩglɩ -kɔɔnlɛ 'cɛɛ, ɛn ka'a yi -tɛlɛa 'wɩ nɛn yaa 'vɩ bɛ -a da dɩ. 'Pian 'sukɔlɛ 'sinɔn 'lee -kɔnnɛn -wɛɛnɔn yi -tɛra "da. 'Wɩ zɩɛ kaa -nan 'yɩ, 'pian ka'a 'wɩlɛ "man -e 'ka yi -tɛra 'wɩ nɛn Zan -a 'vɩ bɛ -a da, -e 'ka 'si 'wɩ 'wlidɩ "drɛdɩ man dɩ.»
Zozi -kɔnnɛn "fɔ rɛzɛn fei 'panɔn man
(Mk 12.1-12; Lk 20.9-19)
33 «'Ka "trɔɛn "tɔ -kɔnnɛn "pee lɛ: Min -tʋ 'bɛ 'yee rɛzɛn fei 'pa, e -klɔn 'bʋ "man, e rɛzɛn 'blʋnan drɛ, ɛn e fɛ -tʋ drɛ, min -tɔa "da -e 'e fei 'bɔ 'ta -pin. "Bɛ -sru e fei zɩɛ -a -pɛba 'wʋ minnun lɔ 'nan 'o 'nyranman 'pa "da, te o 'yee vɛ -nɔan. Yaa drɛ zɩɛ, ɛn e -kʋ 'lɛglɔn 'kɔɔbli 'tʋ da.
34 Zɩ rɛzɛn nan tʋ 'bɔ bɛ, ɛn min zɩɛ 'e 'sunɔn 'pa 'sia minnun nɛn o 'nyranman "paa 'yee rɛzɛn fei bɛ o va, 'nan 'nyranman nɛn waa 'pa bɛ 'o 'yee vɛ -nɔn.
35 Fei 'panɔn zɩɛ waa 'sunɔn 'bɔ kuun. Waa -tʋ -sɔn, waa -tʋ -tɛ, ɛn waa yaagazan -tɛ -kɔlɛnun -a.
36 Fei san zɩɛ e 'sunɔn 'pa 'sia "nyian. O "kaga "mlian minnun nɛn o -kʋ 'e tɛdɛ bɛ o da. 'Wɩ 'tʋwli zɩɛ -a 'bɔ nɛn fei 'panɔn -a drɛ -wlɛ.
37 "Bɛ -sru ɛn 'e 'pɩ 'pa 'sia o va. 'E 'ci nrɔn 'nan, o yiɛ -taa 'nanlɛ 'e 'pɩ man.
38 'Pian zɩ fei 'panɔn -yee 'nɛn zɩɛ -a 'yɩ bɛ, ɛn waa 'vɩ 'o cin yei 'nan: ‹Min 'labɛ -yɛɛ 'e "tɩ -zia -ble. -Kaa -tɛ, -e -zia zɩɛ 'e drɛ -cee vɛ -a.›
39 -A -nan nɛn waa 'kun, o ciɩ 'a -klɔn -sru, ɛn waa -tɛ.
40 Maan laabo 'ka 'lɔ 'nan, -te fei san zɩɛ e -ta bɛ, yaa dra 'yee fei 'panɔn lɛ 'kɔ?»
41 Ɛn minnun tanɔn nɛn o cɩ 'wɩ zɩɛ -a mannan bɛ, o 'nan -yrɛ 'nan: «Min -wlidɩnun zɩɛ, e o -tɛɛman "le 'nan plɔannɔn 'le 'wɩ 'zʋ. "Bɛ -sru -e 'e 'yee fei -pɛba wʋ min peenun lɔ. Yaa -pɛba wo minnun nɛn -te o 'nyranman 'pa, o -yee vɛ -nɔan 'e tʋ man bɛ -wlɔ.»
42 Ɛn Zozi -a 'le 'sran -wlɛ 'nan: «'Wɩ nɛn 'e 'crɛn -tɛdɩ Bali -le 'fluba 'ji bɛ, ka'a ta vɩlɛ dʋʋ? Kɔɔ e ya 'e 'crɛn -tɛdɩ 'nan:
‹-Kɔlɛ nɛn 'kɔn 'tɔnɔn -a tuʋ 'o 'pɛla koda bɛ,
-yɛɛ drɛ 'kɔn 'pʋ -fɔ -kɔlɛ -a.
Minsan 'bɛ drɛ,
ɛn -kɔlɛ zɩɛ 'e drɛ 'kɔn 'pʋ -fɔ -kɔlɛ -a.
'Wɩ nɛn Minsan -a drɛ bɛ,
e min 'plo -fɔa.›
43 Maan 'nan 'an ve 'cɛɛ 'nan, mingɔnnɛn -blɩdɩ Bali va bɛ Bali -taa -a 'silɛ 'ka 'lɔ. Yaa -nɔan 'lɛglɔn 'pee -ji 'nɔn nɛn, o 'ta 'wʋla -a wei da bɛ -wlɛ.
44 [Kɔɔ e ya 'e 'crɛn -tɛdɩ Bali -le 'fluba 'ji "nyian 'nan:
‹Min nɛn e -tria -kɔlɛ zɩɛ -a da bɛ, e -wia. Ɛn -te -kɔlɛ zɩɛ e -tria min da bɛ, yaa pɔlɛ "bo.› »]
45 Zɩ Bali -pannɔn 'tanɔn 'lee Farizɛn 'nɔn -kɔnnɛnnun zɩɛ -a 'man bɛ, waa -tɔ 'nan 'wee 'wɩ nɛn Zozi -a ve.
46 Ɛn o ya "vale 'nan 'o "kuan. 'Pian minnun -le "wɛan "klan a o ji, kɔɔ minnun zɩɛ o Zozi "siala Bali 'lewei vɩzan -a.