18
-Kɔnnɛn pɛɛnɔn -wɛɛzan -nan -nyan wɩ
1 "Bɛ -sru ɛn an Bali -le 'pasiazan pee 'yɩ, te e ya 'sinan laji. E ya 'plɛblɛ 'kpa, ɛn -yee 'tɛ 'san 'trɛda 'si "fo.
2 E paan 'kpa 'plɛblɛ -a vɩdɩ -a 'nan:
«Babilɔn -nan -nyan.
Babilɔn 'fla -dan bɛ,
-a -nan -nyan.
E drɛ -yʋ -wlidɩnun fla -a.
-Yʋ -wlidɩ 'tɔ 'tʋdʋ pɛɛnɔn -nyɛanla 'nan nun.
"Loman 'tɔ 'tʋdʋ pɛɛnɔn nɛn o 'ka 'saun Bali 'lɛ dɩ,
ɛn minnun 'ka o ye "yi "dɩɛ,
o ya -nan nun.
[-Wi -tʋdʋ pɛɛnɔn nɛn
o 'ka 'saun Bali 'lɛ dɩ,
ɛn minnun 'ka o ye "yi "dɩɛ,
o ya -nan nun.]
3 'Lɛglɔn pɛɛnɔn 'ji minnun
Babilɔn 'fla 'le -wɛn mlin 'e 'ciɩla "da.
-Yɛɛ cɩ 'nan
e o pɛɛnɔn wɛɛ 'kɔnnɛn -a.
Ɛn "nyian bɛ
'trɛda mingɔnnɛnnun -fɔ -a -sru,
ɛn o 'wɩ 'wlidɩ "tʋwli zɩɛ -a drɛ.
Ɛn 'flɛ 'tannɔn nɛn 'trɛda bɛ,
o drɛ fɛnɔn 'a,
Babilɔn 'fla yɩfɛ a "kaga "le "wɛan.»
4 "Bɛ -sru ɛn an wei pee 'man laji. Wei zɩɛ yaa 'vɩ 'nan:
«'Mɛn minnun,
'ka 'si Babilɔn 'fla!
'Ka 'si 'nan nun,
-e -yee 'wɩ 'wlidɩ 'e vɩlɛ e baa 'ka man dɩ,
"tɔgɔ 'wɩ nɛn e -taa "bɔlɛ "man "bɛ,
e 'bɔ 'ka man.
5 'Fla zɩɛ -yee 'wɩ 'wlidɩ a "kaga,
e bɔa labli man.
-Yee 'wɩ 'wlidɩnun 'bɔ zɩɛ
-a -cin -trɔa Bali ji.
6 'Wɩnun nɛn yaa drɛ minnun lɛ bɛ,
'mɛn 'pasianɔn "o "dra "nyian -yee "lɛ.
Waa 'lɛji bɔala 'e 'pa -a "fli.
'Kulenɛn nɛn e 'wɩ 'wlidɩ 'fa 'a
ɛn yaa -nɔn minnun lɛ bɛ,
waa faa 'e 'pa -a "fli
-e 'o -nɔn -yee "lɛ.
7 'Fla zɩɛ,
zɩ 'e 'tɔ 'wɩdɩ 'yɩ "yi
ɛn e fɛ yɩdɩ 'yɩ "yi "bɛ,
-a da nɛn o 'tɛ "paa "da,
ɛn -a da nɛn waa ta dra -trɔdrɔ.
Yaa 'vɩ 'e 'fli man 'nan,
e ya mingɔnnɛn -blɩnan,
ɛn -kɔnnɛn 'ka 'kalɛ 'e da dɩ,
ɛn 'e 'ta 'ka 'li 'dra -trɔdrɔ "fo "dɩ.
8 'Wɩ nɛn yaa 'vɩ zɩɛ -yee "wɛan bɛ,
'wɩnun nɛn o -taa "bɔlɛ "man
yi -tʋwli "cɛ 'wlu bɛ -nyrɛn 'gʋ,
-cɛ bɔdɩ a -tʋ,
ɛn ta drɛdɩ -trɔdrɔ a -tʋ,
ɛn dra -tɛdɩ a -tʋ.
Ɛn 'tɛ 'bɛ -taa -a -nan -nyanlɛ.
Kɔɔ Minsan Bali nɛn e tin -tɛ "da "bɛ,
e ya 'plɛblɛ.»
9 'Trɛda mingɔnnɛnnun nɛn o -fɔ -a -sru, ɛn -yee 'wɩ 'wlidɩ zɩɛ "o drɛ, ɛn "o fɛ yɩdɩ 'yɩ "yi "bɛ, 'wɩ -taa 'nanlɛ o man. Tʋ nɛn o 'fla zɩɛ -a -yee 'tɛ 'blɩnan bɛ, -a -nan nɛn 'wɩ 'nandɩ "siala o man.
10 'Wɩ nɛn e -taa "bɔlɛ 'fla zɩɛ -a man bɛ, e o -tɛa "klan -a, -yee "wɛan wa'a -kɔlaman -e 'o -pli "man "kogo dɩ. 'Pian o -fo -kɔɔbli te o -paanman. Waa ve 'nan:
«Babilɔn 'fla -dan,
'wɩ 'bɔ 'i man,
'wɩ 'bɔ 'i man.
Tʋ "wɛnnɛn "cɛ 'wlu nɛn
Bali cɛɛn 'wɩ "nɛn -kɔɔndɩ man 'yiɛ.»
11 'Wɩ nɛn e -taa "bɔlɛ 'fla zɩɛ -a man bɛ, -yee "wɛan 'flɛ 'tannɔn 'wuɔdɩ "siala, kɔɔ min 'ka "nyian -wee 'flɛ 'lɔa dɩ.
12 -Wee 'flɛnun 'bɔ nɛn 'gʋ: -siga fɛnun 'lee "lala fɛnun, 'lee -kɔlɛnun nɛn o 'flɛ "mlian -siga da bɛ, 'lee mingɔnnɛnnun da sɔnun, 'lee yiba "nɛn -a 'flɛ cɩ bɛ, 'lee -fiɩ 'shɛ fɛnun, 'lee -bulalɛ fɛnun, 'lee -kɔlɛ 'kpagba,
13 'lee -laziglɔ 'tɔ 'tʋdʋ pɛɛnɔn, 'lee rɛzɛn -wɛn, 'lee 'nyrɔn, 'lee -fari puu, 'lee fei fɛ 'wlɛnun, 'lee trinun, 'lee 'blanun, 'lee -sʋnun, 'lee odronun, 'lee nɔannun.
14 Yiba "bɛ 'wlɛ "trandɩ pɛɛnɔn nɛn yaa 'yɩ "yi "bɛ, -a -nan -nyan. Ɛn -a yɩfɛnun pɛɛnɔn bɛ, o 'san -yrɔ, wa'a "nyian taa "fo "dɩ.
15 'Flɛ 'tannɔn nɛn o drɛ fɛnɔn 'a Babilɔn 'fla 'le "wɛan bɛ, 'wɩ nɛn e -taa "bɔlɛ 'fla zɩɛ -a man bɛ, e o -tɛa "klan -a, -yee "wɛan wa'a 'kɔlaman -e 'o -pli "man "kogo dɩ. 'Pian o -fo -kɔɔbli te o -wua.
16 Waa 've 'nan:
«Babilɔn 'fla -dan,
'wɩ 'bɔ 'i man,
'wɩ 'bɔ 'i man.
'I man a 'e 'padɩ
"nɛn mingɔnnɛnnun da sɔnun -a
'lee -siga fɛnun 'lee -kɔlɛnun nɛn
o 'flɛ "mlian -siga da bɛ -a.
17 Ɛn tʋ "wɛnnɛn 'wlu nɛn
Bali -a pɛɛnɔn zɩɛ -a -nan -nyan.
E bɔa 'lɛri -tʋ.»
'Wɩ nɛn e -taa "bɔlɛ 'fla zɩɛ -a man bɛ, -yee "wɛan -klʋ -dandan -fɔnɔn 'lee minnun nɛn o "ta 'ta wo ɛn o ya -klʋ 'bɔ 'ji bɛ, 'lee minnun nɛn o 'nyranman "paa -klʋ 'bɔ 'ji bɛ, 'lee minnun nɛn o 'wee -blɩfɛ ye 'yi yiɛ da bɛ, o pɛɛnɔn 'fʋ -kɔɔbli.
18 Zɩ 'fla zɩɛ e ya -blɩnan, ɛn waa 'tɛ -goei 'yɩ bɛ, ɛn o pɛɛnɔn -a vɩdɩ 'sia 'wɩ 'nanmandɩ -a 'nan: «Babilɔn 'fla -dan, 'i yra "nɛn 'fla 'ka yɩlɛ 'trɛda 'li "fo "dɩ.»
19 O 'trɛ 'wi 'o da, te o -wua 'wɩ 'nanmandɩ -a. Waa ve 'nan:
«Babilɔn 'fla -dan,
'wɩ 'bɔ 'i man,
'wɩ 'bɔ 'i man.
Minnun pɛɛnɔn nɛn
'wee -klʋ -dandannun a 'yi yiɛ da bɛ
o drɛ fɛnɔn 'a,
'i yɩfɛ a "kaga "le "wɛan.
Tʋ "wɛnnɛn "cɛ 'wlu nɛn
Bali cɛɛn 'wɩ "nɛn -kɔɔndɩ man 'yiɛ.
20 'Pian kaa nɛn ka cɩ laji bɛ,
'lee kaa nɛn
ka cɩ Bali -le minnun -a bɛ,
'lee kaa nɛn
ka cɩ Zozi -le 'pasianɔn 'a bɛ,
'lee kaa nɛn
ka cɩ Bali 'lewei vɩnɔn 'a bɛ,
'ka 'ci 'e "nran!
Kɔɔ Bali 'wɩ "nɛn kɔɔn Babilɔn 'fla -dan lɛ,
'wɩ nɛn yaa drɛ 'cɛɛ bɛ -yee "wɛan.»
21 -A -nan nɛn Bali -le 'pasiazan -tʋ nɛn e ya 'plɛblɛ 'kpa bɛ, e -kɔlɛbu -dan 'kpa 'sia ɛn yaa tuʋ jemie -va, ɛn yaa 'vɩ 'nan:
«Zɩ Babilɔn 'fla -dan bɛ
o -taa -a tuʋlɛ zɩɛ,
te wa'a "nyian -a ye 'li "fo "dɩ.
22 Wa'a "nyian "dre "fɔ "da "fɛnun -cin 'wɩdɩ maan
-nan 'li "fo "dɩ,
ɛn wa'a "nyian "dre maan
-nan 'li "fo "dɩ.
Wa'a bla bʋnɔn 'ye
'nan 'li "fo "dɩ,
ɛn wa'a "nyian fɛ -sɔndɩ -cin 'wɩdɩ maan
-nan 'li "fo "dɩ.
23 Wa'a "nyian -kannɛn 'san ye
-nan 'li "fo "dɩ,
ɛn lɩ 'pa "fɛdinun 'ka "nyian -kɔan
-nan 'li "fo "dɩ.
Fɛ -le "wɛan nɛn 'wɩ zɩɛ e 'bɔ 'i man bɛ,
-nyrɛn 'nan:
'Yie 'flɛ 'tannɔn 'tɔ bɛ wɩɩ 'trɛ 'gʋɛ -a da.
'Yie -dravia wɩnun drɛdɩ -a nɛn
i 'trɛda minnun pɛɛnɔn see paa.
24 Babilɔn 'fla -dan,
yiɛ Bali 'lewei vɩnɔn tɛɛ,
ɛn yiɛ Bali -le minnun tɛɛ.
Ɛn "nyian bɛ minnun pɛɛnɔn nɛn
minnun o tɛɛ bɛ,
yiɛ -maan ɛn e drɛ.
'Wɩ zɩɛ -yee "wɛan nɛn
Bali 'wɩ "nɛn kɔɔn 'yiɛ.»