22
1 Ziyza bliuuza ánglɨqui nare tuby gueeu nis ni rguaad guelnabány, nania naniani zecpacza yaguan. Nisqui rdiiani rut zu yallily xte Dios ne xte Corder,
2 ax cancaante lo nezroo ni ná glay guɨdxqui zéni. Iruld iruldti nezqui ná gueeuqui, chiy iroplate gueeuqui zub yag xte guelnabány ni rca tsɨbtioplo frut lonii, gazubbúiute rchu frut ni rca loni. Ne de bldag xte yagqui illiú par gacdaan bniety.
3 Ruy aquɨtru xi malti chúu, Dios cun Corder xtenniy cuez lo yallily xtenny láani guɨdxqui, chiy ito de xpɨnny laany.
4 Ax ruyguiy iniádeb lo Dios, laadeb ni a cá lány locuadeb.
5 Ruy aquɨtiru guxin, aquɨt rquiinti bal niclɨza gubidx te pur Xtadnɨ Dios ná ni izieeny ruy, ax par chazy acanabeedeb cun laany.
6 Chiyru gunii ánglɨqui nare:
—De diidxré ná didxldí ni riáld chaldilaaz bniety. Ne Dios, Dad ni rguaad diidx de profet ni rteed xtiidxny, laany bxiaaldny ánglɨ xtenny par iliuub de xpɨnny ni azedyiub gac.
7 Dad Jesucrist guniiny dec ziub gueedny.
Ax, ¡xíclabaa de ni run cuend ni cá lo librɨré ni rguixtee xte de ni teru gac!
8 Nare Juany, gunáa ne bindiaga de cosquɨ. Ax chi bialo bindiaga ne gunáa de cosquɨ, chiy guzullibia par nituaa ánglɨ ni bliuu nare de cosquɨ.
9 Per laany guniiny nare:
—Quɨt runu zeec. Te pur nare zectiziac liú, mandadzi cadxannɨ xte Dios, zectiziac de soo ni rteedza xtiidxny ne de ni run cuend ni cá lo librɨré. Ningui, bto Dios.
10 Ziyza guniiny nare:
—Quɨt icuaatstiu de diidx ni zéed láani librɨc, de diidx ni rguixtee xte de ni teru gac, te pur azedyiub gacdey.
11 Bsaan de bɨny mal cun de mal xtendeb, ne de ni nabány rnia su chalaadeb cun de ni quɨt illiú xtendeb belati ziy rcaazdeb. Per de ni run zec ni riáld ná par chalaa gúndeb zec ni riáld ne de ni nabány zec ni rcaaz Dios ná par chalaa ibánydeb zec ni rcaazny.
12 Jesucrist guniiny:
—Gulgacbee dec ziub guelda, ax guednía ni riáld tubyga bniety según ni baandeb.
13 Nare naa zec A ne Z, de letrɨ ni rzulo ne ni rlull tuby alfabet, te pur naretizia rnabiia desde gulo ne par chazy.
14 Xíclabaa de ni ná zecpacza de ni agudiiby xabni pur ni rundeb cuend xtiidx Dios, par chalee yiiudeb ruu puert xte guɨdxqui ne yálddeb frut ni rca lo yag xte guelnabány.
15 Chiy dets guɨdxqui yáan de ni rdxalaaz run púrzi ni ná mal, de ni nán dichab par rundeb mal bniety, de ni nabány ni quɨt illiú cun de ni quɨt rac chialdeb, de ni rguinxú bniety, de ni rto de ni rlilodeb ná dios, ne irate de ni rdxalaaz runchuu dixú ne rueedeb dixú.
16 —Nare Jesús, abxiaalda ánglɨ xtena par quixteeb irate de cosquɨ lot par quixteetni lo irate de ni reldilaaz nare. Nare naa legítmɨ descendient xte rey David, lo xfamilbɨ zelda. Ne nare naa zec balgui rcuabcháa ni rldieny sidoo.
17 Spíritu Sant cun dxaap ni gac chial Corder xte Dios, rniideb:
—Quedaa.
Chiy ni rindiag rniideb ziy, ziyza rniib:
—Quedaa.
Tutix ni rdxá nis, gueedbɨ, ne ni rcaaz zelee guéeb nis xte guelnabány sin quɨt xi quillytib.
18 Irate de ni guindiag de diidx ni zéed lo librɨré xte de ni teru gac, nare rguixtiia lot dec belati chúu ni icuaaru quia de diidx ni zéed lo librɨc, ziyza mazru guroo guelzii isiáld Dios laab que de guelzii ni zéed lo librɨc.
19 Ne ziyza belati chúu ni idzɨcá quia de diidx ni zéed lo librɨré xte de ni teru gac, ziyza sdzɨcáza Dios ni riáldbɨ lo yag xte guelnabány ni rzeet librɨc, ne aquɨtza yiiutib láani guɨdx xte Dios ni rzeetza librɨc.
20 Ni nán dec didxldí ná irate de cosquɨ, rnii:
—Didxldípac, ziub guelda.
Ziyla Xtadnɨ Jesús, ¡quedaabiu!
21 Xtadnɨ Jesús gunldeeny quia iratectɨ. Amén.