10
Le Jesus rneluu xkwent ne rchil xgyeltsëlnya mén
(Mt. 19:1-12; Lc. 16:18)
1 Wruu Jesus Capernaum za Ne stebkoo gyow-Jordán, wdxiin Ne lo lyu ne la Judea. Nga wdop mén lo Ne ste, lex wzelo Ne wneluu Ne men zegnak xkoxtumber Ne.
2 Lex wbig tebëd men ne nak farisew lo Ne por ne ylaa men Ne preb; wnabdiiz men lo Ne gan pe zak ychil xgyeltsëlnya mén yrup mén xewnaa mén.
3 Wke Ne re Ne:
―¿Pagox wkyeen Moises, bes?
4 Wke men re men:
―Re Moises ne zak ybil xgyeltsëlnya mén yrup men xewnaa men, noze ne xexkwaa te gyiich ydee men lo xewnaa men ne che wsalzaan men men.
5 Lex re Jesus lo men:
―Re Moises zenga por tant ndíp xdiiz de yra de.
6 Per chekwlo chene wzhexkwaa Dëdyuzh gyëzlyu, “wzhexkwaa Ne mgyeey no le wnaa”.
7 “Por neguin ysalzaan xuz mgyeey, ysalzaan xnaa mgyeey, chen ybánno men xewnaa men,
8 yrup men zenga gak men zegnak tebegue mén.” Che nakdetre men txup, sinke che tebegue nak men.
9 Por neguin nuudet ychil mén ne che wlates Dëdyuzh.
10 Chene che wdxiin Jesus ruyuu, wnabdiiz yra xpén Ne lo Ne kwent guin ste.
11 Lex re Ne lo men:
―Kwaskyertee mgyeey ne rchil xgyeltsëlnya yrup men xewnaa men, lex rtsëlnya men yrup men ste wnaa, reey men dol ne la adulterio yrup men wnaa guin.
12 No belne laa wnaa nak ne wsalzaan xemgyeey, lex rtsëlnya men yrup men ste mgyeey, laake reey men dol ne la adulterio.
Wnab Jesus lo Dëdyuzh por minwin
(Mt. 19:13-15; Lc. 18:15-17)
13 Wdxinno mén minwin lo Jesus chen yxob nya Ne xtoo miin; per wakndux xpén Ne lo yra men ne wdxinno minwin guin.
14 Chene wyenen Jesuso, wlaa Ne, lex re Ne lo men:
―Gudee si chiid minwin lo noo, ysoowdet de, porke ledne rnebééy Dëdyuzh, por mén ne nak zegnak minwin nako.
15 Nligue yna noo lo de yra de ne mén ne rlaandet ylaa ne rnebééy Dëdyuzh gakdet tee men ledne rnebééy Ne belne gakdet men zegnak minwin ne ron diiz.
16 Wlis Jesus minwin guin wlen Ne miin, zhich guin wxob nya Ne xtoo miin, wnab Ne lo Dëdyuzh por laa miin.
Wuu te menrik diiz yrup men Jesus
(Mt. 19:16-30; Lc. 18:18-30)
17 Chene che nuu Jesus ne yruu Ne nga, noze rzhoon te mén wdxiin men lo Ne. Lex wzuzhib men wnabdiiz men lo Ne, re men:
―Maxter, laa de ne wen de, ¿pagox rap noo degne ylaa noo chen gap noo gyelembán ne nunk luzhdet?
18 Wke Ne re Ne:
―¿Penak na de ne wen noo? Yët menwen; nonchee Dëdyuzh wen.
19 Laa de che nan de gan pagox rkyeen Dëdyuzh: “Ykanodet de mén ne nakdet lzaa de, yketet de mén, kwandet de, ykagyiidet de mén, ykadedet de, gugaknzebnëz lo xuz de, gugaknzebnëz lo xnaa de.”
20 Wke mén guin, re men:
―Maxter, yrandxee negwa che rlaa noo axtegue ne win noo.
21 Orguin wii Ne lo men, lex ndoondxee wnii Ne lo men, re Ne:
―Benak rak falt ylaa de ste kos: gutsa gutoo yrandxee ne rap de, lex gudee med lo menprob, chen gap de ne non ne nuu gyeybaa; lex chiid de chidnal de noo.
22 Per chene won men zenga, axtegue nandet men pe wuu lextoo men, kesentyent nles wuu lextoo men sya men, porke kesentyent rik men.
23 Zhich guin wii Jesus noze kbii mén, lex re Ne lo yra xpén Ne:
―¡Kesentyent ngan tee menrik ledne rnebééy Dëdyuzh!
24 Wzee wzak yra xpén Ne ne re Ne zenga; per wberee Ne, re Ne ste:
―Zhiin, kesentyent ngan tee menrik ledne rnebééy Dëdyuzh.
25 Mazre mbëëdee tee te kamey gyeer ne zob nii gyëtsguzh ke ne tee te menrik ledne rnebééy Dëdyuzh.
26 Ne won yra xpén Ne zenga, mazre wzee wzak men, lex rnabdizlsaa men, re men:
―¿Txuzh nak ne gun gan yláá lo kastig cheguin?
27 Orguin wii Jesus lo men, lex re Ne:
―Por mén gakdet gan gak neree, per Dëdyuzh si zun Ne gan ylaa No, porke por Dëdyuzh yët ne gakdet gan gak.
28 Lex re Bëd:
―Noo yra noo, wsan noo yrandxee ne rap noo, zëdnal noo de.
29 Wke Jesus, re Ne:
―Nligue yna noo lo de yra de ne kwaskyertee mén ne rsan xyuu, rsan bech, rsan bzaan, rsan xuz, rsan xnaa, rsan xewnaa, rsan zhiin, o rsan xelyu por ne nak men xpén noo no por ne rzëët men xdiiz noo,
30 nee ke gyëzlyuree ykakwent men stebgwyuu tir yra ne che rap men: nigle xyuu men, nigle bech men, nigle bzaan men, nigle xnaa men, nigle zhiin men, nigle xelyu men, per sakzi ke mén men; no sdxiin dxe ne gap ke men gyelembán ne nunk luzhdet.
31 Per ndal men ne nak men primer naaree, gak men lultim; no ndal ke men ne nak men lultim, gak men primer.
Ne wyon tir wzëët Jesus ne guet Jesus
(Mt. 20:17-19; Lc. 18:31-34)
32 Chene nuu Jesus nëz ne za Ne Jerusalén, wzaner Ne lo yra xpén Ne. Rzee rzak men, le yra mén ne zanal Ne rdxe. Lex waandxee wbëz Ne yra chibtxup xpén Ne ste, wzëët Ne yra ne sak Ne,
33 re Ne lo men:
―Laa de yra de rwii de ne Jerusalén za be ledne ydekwent mén Men ne wdxiid wak Mén; ydekwent men men lo fxuz ne rnebééy lo yra fxuz no le lo maxter ley, lex gyan yra mén guin diiz ne ynab men lo menzit ne yket menzit men; zhich guin ydekwent men men lo menzit
34 chen yzhidxno menzit men, no ytxonxen men lo men, no ydee men xkwent men, no yket men men; per chene gyon gbiz, yban ke men.
Ne wnab Jacob yrup Jacob Xwa
(Mt. 20:20-28)
35 Zhich guin wbig yrup xpee Zebedew lo Jesus, Jacob no le Xwa. Lex re men lo Ne:
―Maxter, rlaan noo ylaa de logne ynab noo lo de.
36 Orguin re Ne lo men:
―¿Pagox rlaan de ylaa noo por laa de?
37 Wke men re men:
―Rlaan noo ne chene ynebééy de, ylaa de ne sob noo koo de, te noo sob ladbëë, ste noo sob ladbëg.
38 Lex re Jesus lo men:
―Laa de nandet de gan pe rnab de. ¿Pe zun de wantar sak de zegne sak noo? ¿Pe zun de wantar guet de zegne guet noo?
39 Wke men re men:
―Zun noo wantaro.
Lex re Ne lo men:
―Nli we, zun de wantar sak de zegne sak noo no zun de wantar guet de zegne guet noo,
40 per por ne sob de koo noo ladbëë o ladbëg, ryaldet noo yniiz noo we, sinke le we nak por yra mén ne che nunla ne gyalo.
41 Chene won schii xpén Ne ne re Jacob zenga yrup Jacob Xwa, wlaa men lo Jacob yrup Jacob Xwa.
42 Per wbëz Jesus men yra men, re Ne lo men:
―Laa de yra de nan de ne men ne rnebééy ste nacion, rnebééy men lo mén zegne rlaantee men; zenga ke yra mén ne non ne nuu lad men, rlaa men mén zegne rlaantee men, porke laa men rnebééy.
43 Per le laa de yra de ylaadet de zenga. Sinke men ne rlaan gaknon lad de, rap men degne laa men ylaa dxiin lo de.
44 No men ne rlaan ynebééy lad de, rap men degne laa men gak mos lo de.
45 Porke ni Men ne wdxiid wak Mén zëëdet men por ne ylaa mén dxiin lo men, sinke le men zëëd por ne ylaa men dxiin lo mén no por ne guet men chen yselaa men ndal mén lo dol.
Wlaa Jesus ne wyenii bzalo Bartimeo
(Mt. 20:29-34; Lc. 18:35-43)
46 Zhich guin wdxiin Jesus Jericó yra Ne xpén Ne. Le chene le Ne wruu gyëz guin yra Ne men no le stebëd mén, wdxiin Ne runëz ledne zob te menngwlëë ne la Bartimeo rnab men goon, xpee Timeo nak men.
47 Ne won men ne Jesus men-Nazaret ne, wzelo men rkarëz men, re men:
―¡Jesus, XPee David, gules lextoo de noo!
48 Wakndux ndal mén lo men chen gyakchi men, per lel mazre rkarëz men, re men:
―¡XPee David, gules lextoo de noo!
49 Orguin wzutsë Jesus, lex re Ne:
―Gukwëz men.
Orguin wbëz mén men, re men lo men:
―Ndíp guguu lextoo de, gusuli. Laa de rbëz Jesus.
50 Orguin wtxoon men lër ne nrël men lyu, wasulinzeeb men, wbig men lo Ne.
51 Lex wnabdiiz Ne lo men, re Ne:
―¿Pagox rlaan de ylaa noo por laa de?
Wke menngwlëë guin, re men:
―Maxter, rlaan noo gyenii bzalo noo.
52 Lex re Ne lo men:
―Por ne rlaleedx de noo, le bzalo de che wyenii. Che zak gya de.
Orgueguin wyenii bzalo men, zanal men Ne.