12
Xkwent mén ne rapkwent blag ub
(Mt. 21:33-46; Lc. 20:9-19)
1 Wzelo Jesus wuu Ne zegnak te kwent lo men yra men, re Ne:
―Wuu te mgyeey ne wlabni blag ub lo xelyu, lex wtsëloo meno, no wzhexkwaa men te ledne yzhii ub, no wlep men te ne kesentyent gya ledne kwiin men ne ykanapo ydendxoo.
’Zhich guin wbodiin men blag ub guin lo tebëd mén ne rapkwent blag ub. Lex wruu men za men nat.
2 Le chene wdxiin tyemp ne le ub wal gyët, wxaal xpexwaan blag ub guin te xmos men lo yra men ne rapkwento, zaxii xmos men ub ne ryal xpexwaan blag ub guin.
3 Per lel wnëëz yra men ne rapkwent blag ub mos guin, wdee men xkwent men, wzanëz men men nonchee zenga.
4 Zhich guin wxaal xpexwaan blag ub ste xmos men, per lel wgugye yra men ne rapkwent blag ub mos guin, wla men xtoo men, wboo men xeblaan men.
5 Zhich guin wxaalgue xpexwaan blag ub ste xmos men, per wket yra men ne rapkwent blag ub mos guin. Lex wxaal xpexwaan blag ub stebëd xmos men; gwrol men wdee mén guin xkwent, gwrol zeg men wket men.
6 ’Per rap men te xpee men ne kesentyent ryaan men. Ne lultim wxaal men mee, nuu lextoo men: “Lo xpee noo si zaknzebnëz men.”
7 Per re yra mén guin ne rapkwent blag ub: “Laa ménree nak ne gyanno blag ubree; yoo yket be men, chen gyanno bo laa be.”
8 Lex wnëëz yra mén guin mee guin, wket men mee, wboo men me lo lyu guin.
9 ’Naaree naa, ¿pagox ylaa xpexwaan blag ub yra mén guin ne wapkwent blag ub? Yna noo lo de ne chiid men yket men yra mén guin, lex ydee men blag ub lo stebëd mén.
10 ’¿Pe gardet gool de lo xgyiich Dëdyuzh? Nga re:
Gye ne axtegue rlaandet mén ne rlep yuu,
laa we wak gye ne mazre rkyiindee.
11 Dëdyuzh wlaa neree, no le be kesentyent rzee rzak.
12 Orguin wlaan men nguu men Jesus chegyiib, porke wyenen men ne por laa men wzëët Ne yra diiz guin. Per kom rdxe men mén, wsan men Ne nga, sya men.
Kwent ne rezh zeg impwest
(Mt. 22:15-22; Lc. 20:20-26)
13 Zhich guin wxaal men tebëd men ne nak farisew no le tebëd xpén Herodes wa wanii lo Jesus chen gan pe gue Ne chen tsël gan pezee ykagyii men Ne.
14 Chene wdxiin men lo Jesus, re men:
―Maxter, nan noo yra noo ne nli ne rnii de, zadet lextoo de gan txu nak mén porke por laa de tese nak mén. Laa de si rneluu de ne ybán mén zegne rlaan Dëdyuzh. Guna gan ¿pe wen gyizh noo zeg impwest lo rrey-Roma u wendeto? ¿Pe ryal gyizh noo we u ryaldeto?
15 Per kom nan Jesus ne noze rkanlo men wen men, lex re Ne lo men:
―¿Penak rye de gan pezee gyab noo lo xetramp de? Gutano te med kwii noo.
16 Orguin wdee men te med lo Ne; lex re Ne lo men:
―¿Txu lo nee no txu la nee ka lo we?
Wke men re men:
―Lo rrey-Roma we no le la rrey-Roma we.
17 Lex re Ne lo men:
―Guex gudee ne nak xen rrey lo rrey, le ne nak xen Dëdyuzh gudee lo Dëdyuzh.
Noze wzee wzak men ne re Ne zenga.
Kwent ne yban mengut
(Mt. 22:23-33; Lc. 20:27-40)
18 Zhich guin wa tebëd men ne nak sadusew lo Jesus. Kom rlaleedxdet men ne sban mengut, por neguin re men lo Ne:
19 ―Maxter, lo ley ne wdee Dëdyuzh lo Moises zëëd ne belne guet te mén, per wapdet xewnaa men mëëd, bech men rap degne ytsëlnyano wnaa guin, chen gap men mëëd ne gak zegnak zhiin mén guin ne wet.
20 Tebtir wuu guedx mén, tese bech men yra men; lex wtsëlnya men ne nak mengoldee lo men yra men, per wet men; wuudet zhiin men.
21 Lex wtsëlnya men ne wrup yrup men wnabyud guin per wet ke men; wuudet ke zhiin men. Zenga ke wzak men ne wyon.
22 Zenga wzak men yra men axtegue wzaa men guedx; ni te men wuudet zhiin. Wyal wdebo, wet ke no wnaa guin.
23 Orrenaa, chene yban mengut, ¿txu xewnaapee gak wnaa guin ne yrandxee guedx mén guin wtsëlnyano men?
24 Wke Jesus, re Ne lo men:
―Laa de yra de ngyidet ne rnii de, porke rdeedet de kwent ne zëëd lo xgyiich Dëdyuzh, ni rdeedet de kwent pezee nak xpoder Ne.
25 Chene yban mengut, che ytsëlnyadetre men, ni mgyeey ni wnaa, sinke zegnak angel ne nuu gyeybaa gak men.
26 Belne rlaleedxdet de ne sban mengut, ¿pe gardet gool de lo liber ne wkaa Moises xkwent gyëtsbne ne kayeeky? Nga re Dëdyuzh lo Moises: “Noo nak XDëdyuzh Abraham, XDëdyuzh Isaac, XDëdyuzh Jacob.”
27 Nakdet Dëdyuzh XDëdyuzh mengut, sinke le Dëdyuzh nak XDëdyuzh menmbán. Por neguin na noo lo de ne ngyidet ne rnii de.
Ne mazre nondee ne zëëd lo xley Dëdyuzh
(Mt. 22:34-40)
28 Ne won te ke maxter ley ne re Jesus zenga no ne wyenen men ne wen wke Ne, wbig men wnabdiiz men lo Ne, re men:
―¿Gonezhe nak ne mazre nondee ne zëëd lo xley Dëdyuzh?
29 Wke Ne re Ne:
―Ne mazre nondee nak ne re: “Men-Israel, gugon neree; XDëdyuzh be, tendxee Ne;
30 gugyaan Ne ydebgyiky ydeblextootee de, ydebxanem de, ydebxfwers de.” Laa neree nak ne mazre nondee ne zëëd lo xley Dëdyuzh.
31 Le ne wrup nak: “Gugyaan semén de zegne ryaan ke de de.” Yëtre ne mazre nondee ke lo yrup neree.
32 Orguin re maxter ley lo Ne:
―Wen wke de Maxter. Nli negwa ne na de, ne tendxee Dëdyuzh nuu no ne yëtre ste Dëdyuzh, sinke tendxee Ne nuu.
33 No ne gyaan me Ne ydebgyiky ydeblextootee me, ydebxanem me, ydebxfwers me, no ne gyaan me semén me zegne ryaan ke me me, laa we nak ne mazre nondee ke lo goon ne rguu me no ke lo yra maa ne rzeey me lo fkuuk.
34 Chene wyenen Jesus ne xnëz wke men, re Ne lo men:
―Che wyob gaknan de pezee rnebééy Dëdyuzh.
No ni ste men wyezhdetre nnabdiiz lo Ne.
Gan txu xpee nak Crist
(Mt. 22:41-46; Lc. 20:41-44)
35 Te chene kaneluu Jesus mén lenxeydoo Dëdyuzh, re Ne lo men:
―¿Penak re maxter ley ne xpee David nak Crist?
36 Si chene waknonen Espíritu Sant David, David ke re:
Dëdyuzh re lo XDëdyuzh noo:
“Gusob koo noo ladbëë
axtegue ne ylaa noo ne gyichnii de yrandxee mén ne rlaa lo de.”
37 Belne David ke rnesela Crist XDëdyuzh David, ¿pezee gak Crist xpee David?
Le yra menroo guin, rzhiilen men ron men ne rzëët Ne.
Wzëët Jesus logne rlaa yra maxter ley
(Mt. 23:1-36; Lc. 11:37-54; 20:45-47)
38 Or ne kaneluu Jesus mén, re Ne lo men:
―Gugap maxter ley kwent, porke rtseleedx men gak men lërngool, no rtseleedx men ne kon gyelenzebnëz gabtyuzh mén men nes lgyeey,
39 no rye men lo yagzhil ne rzob mennon lenydoo chen sob men; zenga ke rlaa men chene ra men gwdu,
40 no rgyitxee men xyuu wnabyud, per por ne gyendeto, kesentyent xche rnab men lo Dëdyuzh, per laa men yra men nak ne ntozdee sakzi.
Goon ne wguu wnabyudprob
(Lc. 21:1-4)
41 Tebtir zob Jesus lenxeydoo Dëdyuzh ngali ledne zob ne rguu mén goon, rwii Ne ra mén rguu men goon nga, no ndal ke menrik ra rguu mednyezh leen guin.
42 Nga ke zob Ne, wdxiin te wnabyudprob, wguu men txup medwin ne kober leen guin no ne zhindxee non.
43 Lex wbëz Jesus xpén Ne, re Ne lo men:
―Nligue yna noo lo de ne nondee goon ne wguu wnabyudprobree ke lo xgoon yra mén ne wguu goon.
44 Porke yra mén wguu men ne che wrukaa nya men, per le wnaaree mase lo xgyeleprob men, wguu men logne nzenendxee men ne rdeendxee men lo xelyaaz men.