6
Le Jesus wdxiin Nazaret
(Mt. 13:53-58; Lc. 4:16-30)
1 Wruu Jesus nga yra Ne xpén Ne, wdxiin Ne laz Ne.
2 Chene wdxiin dxe ne rne men-Israel, wzelo Ne wneluu Ne mén lenydoo; no ndal mén wzee wzak ne won men ne rzëët Ne, rnabdizlsaa men, re men:
―¿Pazh wseed mén gwa yra negwa? ¿Pazh waxii men yra negwa ne nan men no le yra gyelmilaguer gwa ne rlaa men?
3 ¿Pe let laadet men gwa nga nak karpinter, xpee Mli, le bech men nak Jacob, nak Xeb, nak Judas, nak Simon? ¿Pe let needet nuu yra bzaan men lad be?
Por neguin wukasdet men Ne.
4 Per re Ne lo men:
―Yrandxee lugar rzaknon mén te profet, per le laz men rzaknondet mén men, ni men ne nak xparyent men, ni men ne nak bechpee men rzaknondet men men.
5 Wakdet nlaa Ne ndal gyelmilaguer nga, nonchee tebëd mengyiz wneseyaken Ne ne wxob nya Ne led men.
6 Wzee wzak Ne ne rlaleedxdet mén guin Ne. Lex wa Ne yra gyëzwin ne nak guex nga, waneluu Ne mén.
Wxaal Jesus yra xpén Ne wazëët men xdiiz Dëdyuzh
(Mt. 10:5-15; Lc. 9:1-6)
7 Zhich guin wbëz Jesus yra chibtxup xpén Ne, lex wxaal Ne men txupgue txupgue men, wazëët men xdiiz Dëdyuzh no wdee Ne poder lo men chen koo men menzab lextoo mén.
8 No re Ne lo men ne gweeydet men ne ykyiinen men nëz, ni gyëtxtil, ni bols, ni med, nonchee te baston sen men.
9 Ykaa xgyël men nii men, gak men xab men, per gweeydet men steb nëzo.
10 No re Ne lo men:
―Chene ydxiin de te ruyuu, nga ykaa de axtegue ne yruu de gyëz guin.
11 Belne nuu ledne ylaandet mén kwii men de ni ylaandet men gon men ne rzëët de, yruu de nga, kwib de guxyudi ne ka nii de zegnak te beey ne nadet mén guin nyon men ne wzëët de. Nligue yna noo lo de yra de ne chene ydxiin dxe ne ylaa Dëdyuzh gyelextis, beeytee sakzi men-Sodoma no le men-Gomorra ke lo yra mén guin.
12 Lex wruu men yra men, wazëët men ne rap mén degne ysaan mén xgyelmal mén.
13 No wboo men ndal menzab lextoo mén, no wguu men seyt led ndal mengyiz, wneseyaken men men.
Ne wet Xwa ne rtxobnis
(Mt. 14:1-12; Lc. 9:7-9)
14 Won rrey-Herodes yra ne kalaa Jesus, porke noze nesree nesrotee ryen diiz ne kalaa Ne. Nuu mén re:
―Xwa ne rtxobnis wa wban. Por neguin rap men poder rlaa men gyelmilaguer.
15 Nuuzeg mén re:
―Profet-Elías ne.
Nuuzeg men re:
―Te profet ne nak zegnak profet ne wuu chekwlo ne.
16 Chene won Herodes neguin, re Herodes:
―Laa Xwa wa wban. ¿Pezee wbanleg Xwa? No che wxaal noo mén wa men watxuug men xtoo Xwa.
17 Re Herodes zenga porke laa Herodes wxaal mén, wa men wanëëz men Xwa, lex wguu Herodes Xwa chegyiib, wliib men Xwa kon kaden. Wlaa Herodes yra neree por xdol Herodías xewnaa Blib bech Herodes, per wla Herodes men lo Blib, lex wtsëlnya Herodes yrup Herodes men.
18 Ndal tir re Xwa lo Herodes:
―Ngyidet negwa ne rlaa de ne wtsëlnyano de xewnaa bech de.
19 Por neguin rwinyaan Herodías Xwa, rlaan men yket men Xwa, per rdeedet Herodes si,
20 porke rdxe Herodes Xwa, che nan Herodes ne te menwen nak Xwa no ne bet dol neeydet Xwa. Por neguin rdeedet Herodes si ne pe ylaa Herodías Xwa; no mase ni rdeedet Herodes kwent ne rzëët Xwa, per rzhiilen Herodes rkagyedyag Herodes ne rzëët Xwa.
21 Per wdxiin te dxe ne wzël gan pezee wlaa Herodías. Chene wzaa Herodes iz, wlaa Herodes te lni. Wdee Herodes ne wu yra men ne rnebééy no le yra komandant no le yra men ne non ne nuu lo lyu ne la Galilea.
22 Wdee xsaap Herodías ledne kayak lni, lex wya nzeb. Kesentyent wtseleedx Herodes zegne wya nzeb yra Herodes men ne zobno Herodes lo mezh; lex re Herodes lo nzeb:
―Gunab logne rlaantee de lo noo, noo yniizo.
23 Wgon Herodes Dëdyuzh ne sdee Herodes logne ynabtee nzeb, niguelzhe ynab nzeb gwrool nacion ledne rnebééy Herodes.
24 Orguin wruu nzeb wanabdiiz nzeb lo xnaa nzeb, re nzeb:
―¿Pagox ynab noo?
Lex re men lo nzeb:
―Gunab xtoo Xwa ne rtxobnis.
25 Zhich guin wdenzeeb nzeb ledne zob Herodes, re nzeb:
―Rlaan noo yniiz de xtoo Xwa ne rtxobnis lo noo orgueree kon te lengyaan.
26 Kesentyent wdenles lextoo Herodes ne won Herodes zenga; per kom che wgon Herodes Dëdyuzh nes lo yra men ne zobno Herodes lo mezh, wap Herodes degne wlaa Herodes ne wnab nzeb.
27 Orgueguin wxaal Herodes te soldad ne tsatxuug men xtoo Xwa.
28 Lex wa soldad guin lenchegyiib, watxuug men xtoo Xwa. Wluzh nga wdxinneey meno nuu we te lengyaan, wdee meno lo nzaap guin, lex laa nzeb wdekwento lo xnaa nzeb.
29 Chene waknan xpén Xwa we, wa men weey men xkwerp Xwa, walugyeer meno.
Wdee Jesus ne wu gaaymil mén
(Mt. 14:13-21; Lc. 9:10-17; Jn. 6:1-14)
30 Chene wberee yra poxter, wdop men lo Jesus, lex wuu men diiz yra ne wlaa men no yra ne wneluu men.
31 Lex re Jesus lo men:
―Gutayoo tsa be ledne yëtet mén yne be tebrrat.
Kesentyent ndal mén rdxiin lo Ne, men ne za, men ne rberee, axtegue ni ryobdet gu Ne yra Ne xpén Ne.
32 Orguin wdee Ne lenbark yra Ne xpén Ne, za Ne te ledne yëtet mén.
33 Per ndal mén wii ne za Ne yra Ne xpén Ne no wnebeey men Ne. Lex wruu mén yrandxee gyëz ne nak nes guin, za men nii men, kwlodee men wdxiin ke lo Ne.
34 Chene wruu Ne lenbark, wii Ne yra menroo menduxtee guin; lex wles lextoo Ne men, porke nak men zegnak mëkzhiil ne yët gan txu gapkwent. Lex wzelo Ne noze ndal ne wneluu Ne men.
35 Chene che rzëë, wbig xpén Ne lo Ne, re men:
―Chexke rzëë no ni te mén nuudet lugarree.
36 Gugue lo yra ménree gya men, chen tsa men ledne ka mén den o ledne nak gyëzwin ne nak guex nee, tsaka men ne gu men porke neeydet men ne gu men.
37 Per wke Jesus, re Ne:
―Laa de gudee ne gu men.
Wke men re men:
―¿Pe rlaan de tsaka noo txupgwyuu denario gyëtxtil chen ydee be ne gu men?
38 Lex re Jesus lo men:
―¿Blazh gyëtxtil neey de? Gutsa wii gan.
Chene wberee men, re men lo Ne:
―Gaay gyëtxtil no le txup mël.
39 Orguin wkyeen Ne men ne gue men lo yra mén guin ne sob men tebëdgue tebëdgue men lo gyizhyaa.
40 Lex wzob men tebëdgue tebëdgue men, nuu ledne wzob men tebgwyuu men, nuuzeg ledne wzob men txupchii men.
41 Zhich guin wgoob Jesus yra gaay gyëtxtil guin no le yrup mël guin, wkalo Ne gyeybaa, wdee Ne dexkyizhtee lo Dëdyuzh. Wluzh nga wla Ne yra gyëtxtil guin, wdee No lo yra xpén Ne chen ygyiiz meno lo yra mén guin. Zhich guin wgyiiz Ne yrup mël guin.
42 Wu yrandxee mén guin axtegue ne wyezaa men,
43 no chene wluzh nga, wsezaa men chibtxup tsegwed yra gyëtxtilbla ne wrukaa no le yra mël ne wrukaa.
44 Yra mén guin ne wu, gaaymil nak nonchee mgyeey.
Wzaa Jesus lo nis
(Mt. 14:22-27; Jn. 6:16-21)
45 Zhich guin wkyeen Jesus yra xpén Ne wdee men lenbark chen sanergue men tekaa men stebkoo nis, ydxiin men Betsaida, myentras ne le Ne guli yra mén guin nëz.
46 Wluzhse wguli Ne yra mén guin nëz, za Ne ledne nak gyeey chen ynab Ne lo Dëdyuzh.
47 Chene wnit lyu, le bark chexke za gwrool nis, le Ne wyan lyubidx tete Ne.
48 Rwii Ne ne rundetre men gan ynexoon men bark, porke nes lo bark rasob mee, lex rcherezhich mee bark. Ne zëdyenii lyu, za Ne nes lo men rzaa Ne lo nis, le Ne chexke zadesu.
49 Chene wii men ne za Ne rzaa Ne lo nis, nuu lextoo men pazer te biso, wobtsadii men
50 por tant rdxe men, porke yrandxee men wii Ne. Per wnii Ne lo men, re Ne:
―¡Ydxedet de, nzholeedx gugak, noo nee!
51 Lex wdee Ne lenbark ne nuu men, orgueguin wyakchi mee. Kesentyent wzee wzak men yra men,
52 porke gardet ydee men kwent gyelmilaguer ne wlaa Ne ne wtsowndal Ne gyëtxtil, porke benak nkeb xgyeryen men.
Wneseyaken Jesus yra men-Genesaret ne rzhuun
(Mt. 14:34-36)
53 Chene wdekaa Jesus stebkoo nis yra Ne xpén Ne, wdxiin Ne lo xelyu men-Genesaret. Nga wkaduu men bark runis.
54 Chene wruu Ne lenbark yra Ne xpén Ne, wyenengue mén ne Jesus ne.
55 Noze rzhoon mén wa men waluu men diiz ydendxee nes guin. Wzelo mén weey men mengyiz ydebxlonwin mengyiz, wdxinneey men mengyiz ledne won men diiz ne zu Jesus.
56 No kwaskyertee ledne rdee Ne ledne nak gyëzwin o ledne nak gyëznzhoo o ledne nak den, rgyix mén mengyiz runëz, lex rnab men lo Ne ne ydee Ne si ytee nya men maske nonchee luzh xab Ne, no yrandxee mén ne rtee nya luzh xab Ne ryaken.