19
1 Yuguʼ le nacuáʼ lúzxiba tuʼluíʼi lo yöl-laʼ zxön queëʼ Dios,
ateʼ yuguʼ le raca lu böʼös nácagaca bëʼ le nunëʼ.
2 Yuguʼ dza tuʼzéajniʼi,
en yuguʼ dzöʼ tuʼluíʼi lo yöl-laʼ réajniʼi.
3 Bitiʼ zoa didzaʼ tuíʼi, en bitiʼ riyö́n tu le taʼnná.
Bitiʼ riyö́n chíʼiguequi.
4 Le tuʼzéajniʼi ridxín ga naguélaʼtë luyú,
en le tuʼsedi ridxín idútë yödzölió.
Ga naʼ nacuáʼ nuzóëʼ Dios xilataj gubidza,
5 le naca ca tu bönniʼ utsaga nëʼë rirúajëʼ yuʼu,
en naca caʼ ca tu bönniʼ nál-la rudzéjanëʼ cateʼ zéajëʼ carelö lu huitaj.
6 Ga naguelaʼ lúzxiba rilén gubidza,
en ridödi ga ridxintë ga ribía.
Bitiʼ bi zoa le cabí rutsëʼe gubidza naʼ.
7 Tsahuiʼ naca ca rinná bëʼë Xanruʼ, en run ga huöáca ládxiʼruʼ.
Idútë li naca didzaʼ nuzóëʼ Xanruʼ, le run ga réajniʼi nu naca nöxaj ladxiʼ.
8 Tsahuiʼ nácagaca xibá queëʼ Xanruʼ, le tun ga rudzeja ládxiʼruʼ.
Nácagaca idú dxiʼa le gunná bëʼë Xanruʼ, en taʼgúʼu beníʼ icja ládxiʼdoʼoruʼ.
9 Dxíʼadoʼ naca gádxiruʼ-nëʼ Xanruʼ, para sóaticaʼsiruʼ.
Idú li naca ca ruchiʼa rusörö́ëʼ Xanruʼ bönachi, en idú tsahuiʼ.
10 Nazácaʼgacatërö didzaʼ naʼ ca oro, encaʼ ca oro ba nequi.
Nácagacatërö zxixi ca bidxinaʼ buz, en ca le zxixi queë́baʼ.
11 Didzaʼ naʼ tuʼzéajniʼi nedaʼ, huen dxin queëʼ.
Uzíʼtërö xibé nu run ca rnna xtídzëʼë naʼ.
12 ¿Nuzxi caz gaca inö́z channö richixi rinigui?
Busölá nedaʼ lu dul-laʼ nunaʼ le cabí gúquibeʼedaʼ benaʼ.
13 Ben chiʼi nedaʼ para cabí udödi cuinaʼ lu dul-laʼ,
para cabí inná beʼe nedaʼ lë naʼ naca dul-laʼ.
Níʼirö ugáʼanaʼ tsahuiʼ, en bitiʼ ibágaʼa xiguiaʼ.
14 Ben ga ilaca didzaʼ ruáʼa, en le rizáʼ ládxaʼa ca raza ládxuʼu Liʼ.
Nacuʼ Xanaʼ ruzúʼ nedaʼ tsutsu, en ruhuöáʼauʼ nedaʼ.