47
1 ¡Lu yöl-laʼ rudzeja queë́liʼ guliʼcapaʼ náʼaliʼ, bönachi yúguʼtë yödzö!
¡Guliʼcuʼë yöl-laʼ ba Dios, len yuguʼ le rúl-lalenliʼ!
2 Ral-laʼ gunruʼ bal Xanruʼ Dios nayë́pisëtërëʼ.
Náquiëʼ Nu rinná bëʼ idútë yödzölió.
3 Benëʼ ga bidéliʼruʼ yuguʼ lu bönachi izáʼa.
Benëʼ ga rinná beʼeruʼ yuguʼ yödzö.
4 Gurö́ cazëʼ luyú ga ni nuzóëʼ rëʼu.
Naca tu luyú lachi quégaca zxíʼini xiʼsóëʼ Jacob, nupa naʼ nadxíʼi quézinëʼ.
5 Len yöl-laʼ ba zxön ribenëʼ Dios ga röʼë rinná bëʼë.
Le zián le tuʼcödxëʼ cateʼ ribenëʼ Xanruʼ niʼ.
6 ¡Guliʼgul-la yöl-laʼ ba queëʼ Dios! ¡Guliʼgul-la!
¡Guliʼgul-la yöl-laʼ ba queëʼ Bönniʼ rinná béʼenëʼ rëʼu! ¡Guliʼgul-la!
7 ¡Rinná bëʼë Dios idútë yödzölió ni!
¡Idú ládxiʼliʼ guliʼgul-la yöl-laʼ ba queëʼ!
8 ¡Zoa cazëʼ Dios lataj láʼayi queëʼ ga röʼë rinná bëʼë!
¡Rinná béʼenëʼ bönachi yúguʼtë yödzö!
9 Tuʼdubi nupa taʼnná beʼe yuguʼ yödzö
tsözxö́n len bönachi queëʼ Dios queëʼ Abraham.
10 ¡Nequi queëʼ Dios yöl-laʼ zxön quégaca yúguʼtë yödzö nacuáʼ yödzölió!
¡Nayë́pisëtërëʼ Lëʼ!