62
1 ¡Tuzëʼ Dios ruzxöni ládxaʼa, en rizë́ ládxaʼa Lëʼ!
¡Lë cazëʼ rusölë́ʼ nedaʼ!
2 ¡Tuzëʼ Lëʼ rapa chiʼë nedaʼ, en rusölë́ʼ nedaʼ!
¡Ruzóëʼ nedaʼ tsutsu, ateʼ bitiʼ gaca nu uzötaj nedaʼ!
3 ¿Gácaʼxte caz güíʼi ládxiʼliʼ ucúl-laliʼ nedaʼ?
Rë́ʼënisiliʼ uzö́tjaliʼ nedaʼ ca tu zöʼö chizóa iguínnaj,
o ca tu lëʼaj yaga le chinatëbi.
4 Rë́ʼënisiliʼ uzö́tjaliʼ nedaʼ ga ni tunëʼ nedaʼ bal.
Ruzíʼiliʼ xibé yuguʼ didzaʼ bitiʼ nácatë.
Ruíʼiliʼ dxiʼa didzaʼ láhuiʼsö,
pero lu icja ládxiʼdoʼoliʼ rudidzaʼ yúdxiliʼ nedaʼ.
5 ¡Tuzëʼ Dios ruzxöni ládxaʼa,
en runaʼ löza Lëʼ!
6 ¡Tuzëʼ Lëʼ rapa chiʼë nedaʼ, en rusölë́ʼ nedaʼ!
¡Ruzóëʼ nedaʼ tsutsu, ateʼ bitiʼ gaca nu uzötaj nedaʼ!
7 ¡Tuzëʼ Dios rusölë́ʼ nedaʼ, en runëʼ ga nacaʼ bicaʼ ba!
¡Dios nuzóëʼ nedaʼ tsutsu, en rapa chiʼë nedaʼ!
8 Libíʼiliʼ, bönachi, buliʼzxöni ládxëʼë Dios yúguʼtë dza.
Buliʼsiyönnëʼ yuguʼ le raca queë́liʼ, tuʼ run chiʼi cazëʼ rëʼu.
9 Le nácatë nácagaca yúgutë bönachi ca tu böʼ ridö́disö,
en bitiʼ bi nazácaʼgaca nupa naʼ nadéliʼgaca lataj lo.
Tu lu zxigóns bitiʼ bi nál-líʼguequinëʼ.
Nácagacarëʼ dzáʼasö ca tu böʼ riguélaʼsiruʼ.
10 Bitiʼ uzxöni ládxiʼliʼ bi idéliʼliʼ len yöl-laʼ nál-la queë́ziliʼ.
Bitiʼ uzíʼiliʼ xibé le cuanliʼ.
Channö gataʼ queë́liʼ yöl-laʼ tsahuiʼ, bitiʼ güíʼi ládxiʼliʼ le.
11 Tu luzuísö bëʼë didzaʼ Dios.
Chopa luzuí biyöndaʼ ca naca lë ni rnna:
“Nápatërëʼ Dios yöl-laʼ huáca,
12 ateʼ zóaticaʼsö yöl-laʼ dxiʼi ladxiʼ queëʼ.”
Ubíʼi cazuʼ, Xan, quégaca bönachi tsca naca le núngaca.