4
Nácadxu tuze ne̱ chee̱ Be' Lá'azxa
1 Chee̱ le̱ na' dxata' xúeda' le'e, neda', xu'a lizre xia lawe' da dxuna' zrin chee̱ Xránadxu, chee̱ gunle da xrlátaje ca dxal-la' xelún bénneache ba gucá'a Dios le̱', ca gucá'aqueze̱' le'e.
2 Le gaca dxexruj lazre', ne zri'i lazre'. Le cueza lazre', ne le cue' gunne xue chee̱ tule xetule lu xel-la zri'i lazre' chee̱le.
3 Le gun ba xuzre gácaquezle tuze, guchínele xel-la waca chee̱ Be' Lá'azxa lu xel-la dxebeza zri lazre' da na' dxun na le'e tuze.
4 Tuze naca be̱la' dxen chee̱ Cristo da nácadxu.
Tuze naca Be' Lá'azxa, Nu na' zúale̱ne' tu tudxu.
Tuze da dxuxrén lázredxu, da na' sidxu lu na' Dios.
5 Tuze Bénnea' naque̱' Xránadxu.
Tuze da dxeajlí lázredxu.
Tuze ca dxedxúadxu nisa.
6 Tuze Bénnea' naque̱' Dios, ne Xra xúgute̱dxu.
Le̱' naque̱' Benne' xíchaje̱ xúgute̱dxu.
Dxulé'e cuine̱' lu da dxundxu xúgute̱dxu.
Zúaqueze̱' lu xichaj lázrdau xúgute̱dxu.
7 Tu tudxu nasidxu tu xel-la waca cha chee̱dxu
ca da nunna Cristo dxi'u.
8 Naca na ca naxúaj na lu dizra' lá'azxa, dxenná na:
Begüéne̱' xabáa, gate gudé bzétaje̱' benne' guledábague̱' Le̱'.
Na' bnézruje̱' bénneache xel-la waca ca'.
9 ¿Bi zéaje̱ na, dxenná na: Begüene̱'? Zéaje̱ na nédxula bétaje̱' lu xe̱zr la xu nigá.
10 Bénnea' bétaje̱' nácaqueze̱' Bénnea' begüéne̱' lu da blaudxa lu xabáa chee̱ gaca bea na xu'u lu ne̱'e̱ xúgute̱ da de̱,
11 na' be̱nne̱' cha chee̱dxu xel-la waca chee̱:
Gaca bál-ladxu benne' gubáz chee̱'.
Gaca guzendxu xezícadxu bénneache dizra' chawe' chee̱'.
Gácadxu xezícadxu benne' dxuxúedxu bi chee̱' ca'.
Na' gusé̱dedxu-be' xezícadxu.
12 Ca'an be̱ne̱' chee̱ bpa'adxe̱' bi chee̱' ca' chee̱ xelunbe' zrin xulucá'anabe' xrlátaje bénneache ca' zaj naque̱' zruza ni'a na' Cristo:
13 Chee̱ gácadxu tuze ca dxéajle̱dxu,
ne ca núnbeadxu Zri'ine Dios,
chee̱ gácadxu benne' du lazre',
chee̱ gácadxu cáte̱ze nácaqueze Cristo.
14 Caní nacan chee̱ québedxa gácadxu ca bidu ca', bi ca' dxelezibe' bítete̱ze dizra' da zaj naca na ca tu be' da zeaj na nila na'la, ne québedxa güedxu lataj xelún zréaje benne' we̱n da zrinnaj ca' dxi'u, chee̱ quebe xelezí xe̱'e̱ dxi'u chee̱ gundxu da cale̱la.
15 Lu xel-la zri'i lazre' dxal-la' guchálajdxu da li chee̱ gácadxu cáte̱ze nácaqueze Cristo, Bénnea' naque̱' xichaj be̱l-la' dxen da nácadxu dxi'u.
16 Le̱' dxune̱' tuze xúgute̱ ni'a na' zaj zria be̱l-la' dxen chee̱' chee̱ gaca na tu be̱l-la' dxen nazá'ate̱ chee̱ na, ne chee̱ xelún zrin xúgute̱ ni'a na' ca' chee̱ gula be̱l-la' dxen na', ne gaca na chawe' lu xel-la zri'i lazre'.
Xel-la nabán cube da dxunna Cristo dxi'u
17 Da nigá dxapa' le'e, ne dxusebaga' le'e waláz chee̱ Xránadxu chee̱ québedxa gunle ca dxelún bénneache quebe zaj núnbe'e̱ Dios, benne' ca' dxelune̱' cáte̱ze dxeléquene̱' xrlátaje,
18 benne' ca' zaj nachul-la xichaj lázrdawe̱'. Benne' caní quebe zaj nape̱' xel-la nabán li lazre' da dxunna Dios bénneache:
Zaj nachul-la nanítene̱', ne zaj naca zide' lázrdawe̱'.
19 Québedxa dxelexedué'ene̱'.
Belezanne cuine̱' dxelune̱' da schanni'.
Du lazre̱' dxelune̱' xúgute̱ da sban.
20 Quegá caní nazé̱dele le'e chee̱ Cristo,
21 che da li xca' bénnele da dxuchalaj Le̱', ne nusé̱dene̱' le'e ca naca da li da zúale̱ Jesús.
22 Ca naca da be̱nle nédxula, le guzúa chalá'ala da gúcale lawe' da guzrínnajle lu da sban da guzá lázrele.
23 Dxal-la' gácale benne' cube lu xichaj lázrdaule.
24 Dxal-la' gunle da naca chee̱ benne' cube na' da be̱n Dios le'e
chee̱ gunle da naca na xlátaje̱, ne da li da naca na lá'azxa.
25 Chee̱ le̱ na' québedxa gun lázrele.
Le nne̱ da li tule xetule lawe' da nácadxu ni'a na' tuze
be̱l-la' dxen chee̱ Cristo.
26 Che dxezrá'ale, quebe dxal-la' gunle dul-la, ne quebe zrá'ale scha'.
27 Quebe güele da xriwe̱' lataj guchixre chee̱ na le'e.
28 Bénnea' guque̱' gubán québedxa dxal-la' cuane̱'. Dxal-la' gune̱' tu zrin chawe' nen ni'a ná'queze̱' chee̱ gape̱' da gunézruje̱' benne' dxelexázrjene̱'.
29 Quebe nne̱le dizra' cale̱la. Le guchalaj da naca na xrlátaje chee̱ xelezé̱ tipa benne' xelenne̱', ne xelezí'e̱ na ba neza.
30 Quebe guzúa xáchele Be' Lá'azxa chee̱ Dios, lawe' da zúale̱ Be' le'e chee̱ gaca bea na nácale bi chee̱ Dios ca zrindxa zra xezí' lu ne̱'e̱ dxi'u.
31 Le guzúa chalá'ala:
Xel-la dxecuide', ne xel-la dxezrá'a, ne xel-la xichaj zra'a,
ne xel-la wetil-la dizra', ne xel-la wechacha, ne xúgute̱ da zrinnaj.
32 Dxal-la' gácale du lazre', ne xache lázrele tule xetule,
ne gunite laule chee̱ tule xetule ca be̱n Dios,
bnite lawe̱' chee̱le le'e lawe' da nácale bi chee̱ Cristo.