5
Na'a, ca naca chee̱ bi zra, u bi iza xelá' Xránadxu, quebe dxun na ba xen guzúaja' chee̱le, bi bicha'. Ba nézquezle le'e zrin zra xelá' Xránadxu gate québela nu dxebeza Le̱', ca za tu benne' gubán chizrela. Gate dxelenná bénneache: Cháwele̱'e̱ dxaca chee̱dxu, ne quebe bi dxuchixre chee̱, nadxa za da guzría xi na benne' ca', ca za xel-la dxudía chee̱ tu nu'ula gate zue̱' zi'i, ne quebe xelelé̱' lu da na'. Le'e, bi bicha', quebe zúale lu da chul-la, chee̱ quebe gaca chee̱le lu zra na' xelá' Xránadxu ca dxaca chee̱ tu benne' dxu'u gubán lizre̱'. Xúgute̱le le'e dxunle xrlátaje, da naca chee̱ xel-la naxaní', ne chee̱ te zra. Quebe dxundxu da cale̱la, da naca chee̱ chizrela, ne chee̱ da chul-la. Chee̱ le̱ na' quebe dxal-la' gácadxu ca benne' la wase' ca dxelún benne' xula, san dxal-la' gácadxu ban lazre', ne guzéajni'i cuínadxu. Benne' dxelase, chizrela dxelásie̱', ne benne' dxelezuzre, chizrela dxelezúzrequeze̱'. Nácadxu dxi'u chee̱ te zra, na' dxal-la' guzéajni'i cuínaquezdxu. Che dxeajlí lázredxu Xránadxu, ne zri'idxu Le̱', da nigá gaca na chee̱dxu ca tu zra lana benne' zeje̱' wedil-la da naca na xia. Cá'anqueze che dxebeza lázredxu ladxu, da nigá gaca na chee̱dxu ca tu lapa xia ca da dxuzúa tu benne' zeje̱' wedil-la xíchaje̱'. Dios quebe be̱ne̱' chee̱dxu tedxu lu da ba xa' da sel-le̱' lu xel-la dxezrá'a chee̱. Be̱ne̱' chee̱dxu zrué'edxu xel-la weselá ne̱ chee̱ Xránadxu Jesucristo. 10 Jesucristo gutie̱' waláz chee̱dxu chee̱ gaca bandxu tu zren nen Le̱', che naca bandxu, u che ba nátedxu gate zrin zra na'. 11 Chee̱ le̱ na' le gutipa lázrele, ne le guzé̱ chacha ljwézrele tule xetule, ca ba dxúnquezle.
Pablo dxuzéajni'ine̱' bi bíchedxu ca'
12 Le'e, bi bicha', dxata' xúentu' le'e gápale ba lá'ana benne' dxelune̱' zrin ládujla le'e, benne' ca' gucá'a Xránadxu chee̱ xelenná be'ene̱' le'e, ne xulusé̱dene̱' le'e. 13 Dxal-la' gápale benne' ca' ba lá'ana, ne zri'ile le̱' lawe' da dxelune̱' zrin chee̱ Dios. Le sua lu xel-la dxebeza zri lazre' tule xetule.
14 Cá'anqueze dxusebágantu' le'e, bi bicha', gusízrele benne' ca' quebe dxelaca lazre̱' xelune̱' zrin, ne gutipa lázrele benne' ca' dxelate ni'a ne̱'e̱, ne gácale̱le benne' quebe zaj ze̱' chacha, ne gácale zren lazre' nen xúgute̱ bénneache.
15 Le guxúe xanne' cuínale chee̱ quebe gunle da cale̱la chee̱ nu benne' dxune̱' chee̱le da cale̱la, san le gun ba xuzre gúnquezle da xrlátaje, tule xetule, ne chee̱ xúgute̱ bénneache.
16 Le béquezle.
17 Le guchálajle̱quezle Dios.
18 Le xe̱ Dios: Xcalenu' ca naca xúgute̱ da dxaca chee̱le.
Dxal-la' gunle da nigá lawe' da naca na da dxaca lázrqueze Dios gunle le'e, lawe' da nácale bi chee̱ Jesucristo.
19 Quebe guzágale da dxun Be' Lá'azxa.
20 Quebe guzúale chalá'ala dizra' da nunezruj Be' Lá'azxa nu bi bíchedxu ca'.
21 Le guchi'a xanne' xúgute̱ da ca', na' le si' da naca na xrlátaje.
22 Le cuasa lu xúgute̱ da quebe naca na xrlátaje.
23 Dios dxunne̱' dxi'u xel-la dxebeza zri lazre'. Dxenaba' lau Le̱' gune̱' le'e benne' lá'azxaqueze, ne guxúe̱' be' nácaquezle, ne bénne'du xu'ule, ne be̱l-la' dxen chee̱le chee̱ gácale du lazre' lu zra na' xelá' Xránadxu Jesucristo. 24 Bénnea' bláwizre̱' le'e naque̱' li lazre', na' Le̱' gune̱' xúgute̱ da caní.
Pablo dxuzé̱ dizra' bi bíchedxu ca'
25 Le'e, bi bicha', le naba lau Dios gácal-lene' netu'.
26 Le gugapa diuzre xúgute̱ bi bíchedxu ca', ne gunídale le̱'.
27 Lau Xránadxu dxusebaga' le'e gulábale xiche nigá láwela xúgute̱ bi bíchedxu ca'.
28 Dxenaba' lau Xránadxu Jesucristo gune̱' chee̱le da chawe'. ¡Ca'an gaca na!