24
Ca guca gate bebán Jesús
(Mt. 28.1-10; Mr. 16.1-8; Jn. 20.1-10)
1 Zra nedxu chee̱ da gazre zra, nu'ula ca' belezrine̱' dxu'a ba na' dxaní'sise̱', zaj nu'e̱ ca naca da ca' dxelelá zixre da bulucueze̱', na' xebal-la nu'ula xjácale̱ne̱' le̱'.
2 Gate belezrine̱' na', belelé'ene̱' xiaj da guduse dxu'a ba na', québedxa naduse na naga guduse na.
3 Belú'e̱ lu ba na', san quebe belexezrelne̱' Xránadxu Jesús na'.
4 Na' belezrébele̱'e̱, ne quebe zaj nézene̱' ájala xelune̱', na' belelé'ene̱' chupa benne' zaj ze̱' cuite̱', zaj nacue̱' zra lane̱' dxácatite na.
5 Nu'ula ca' belezúe̱' sudxú'ala lu xu, ne belezrébele̱'e̱. Na' benne' ca' gulé̱'e̱ le̱':
―¿Bizr chee̱ na' dxexílajle le'e tu benne' naca bane̱' láwela benne' gate?
6 Quebe zue̱' nigá, lawe' da ba bebane̱'. Le gusá lázre' da bchálajle̱ne̱' le'e gate ne zue̱' Galilea.
7 Gunné̱': “Benne' Gulje̱' Bénneache dxal-la' xuludée̱' Le̱' lu na' benne' dul-la ca', na' xuludé̱'e̱ Le̱' xaga béguaj, na' zra guxunne' zra xebane̱'.”
8 Nadxa nu'ula ca' xeajlesá lazre̱' ca naca da gunná Jesús.
9 Ca gudé besiá'que̱' dxu'a ba na', na' belexezrine̱' lu xe̱zre na', na' buluchálajle̱ne̱' benne' chinéaj gubáz ca' chee̱ Jesús, ne xúgute̱ benne' ca' xezica, ca naca da guca na'.
10 Nu'ula ca' xjaque̱' xeajlezenne̱' gubáz ca', zaj naque̱' María Magdalena, ne Juana, ne María xrna Jacobo, ne xebal-la nu'ula ca'.
11 Benne' gubáz ca' guléquene̱' da xálaze dxelenná nu'ula caní, na' quebe guléajle̱'e̱ chee̱'.
12 Nadxa bdxuaj Pedro, zeaj chégüe̱' dxu'a ba na', na' gate guné̱'e̱ lu ba na', blé'ene̱' ladxe' da bedxela Jesús xu'u na chalá'ala, na' bezé̱'e̱ zexíaje̱' xu'u naga guzé̱'e̱, dxexebánene̱' ca naca da guca.
Da guca lu neza da zeaj xe̱zre Emaús
(Mr. 16.12-13)
13 Lu zra ná'queze, zjaca chupa benne' ca' busede Jesús xe̱zre Emaús, da naca na láte'ze zitu' naga zua Jerusalén.
14 Zjaque̱' dxuluchálaje̱' ca naca da guca lu zra ca'.
15 Dxácate̱ na' dxuluchálaje̱' caní, na' Jesús ná'queze gubigue̱' cuita benne' ca', na' guzú lawe̱' zéajle̱ne̱' le̱'.
16 Quebe belexúnbe'e̱ Jesús, lawe' da guzúa tu da guxúa na xiaj lau benne' ca'.
17 Nadxa bche̱be Jesús benne' ca':
―¿Bizra da na' dxuchálajle̱ ljwézrele dxácate̱ xu'ule neza? ¿Bizr chee̱ na' zale dxewí'ine lázrele?
18 Tu benne' ca' le̱' Cleofas beche̱be̱':
―Xúgute̱ benne' zaj nézene̱' ca da guca xe̱zre Jerusalén lu zra caní. ¿Nacu' lue' benne' zitu' zu' Jerusalén, na' tuze lue' quebe nézenu' ca da guca na'?
19 Nadxa Le̱' guzre̱' benne' ca':
―¿Bizra guca na'?
Gulé̱'e̱ Le̱':
―Da guca chee̱ Jesús, benne' Nazaret. Guque̱' tu benne' bchálaje̱' waláz chee̱ Dios, na' xel-la waca zren ca' be̱ne̱', ne bchálaje̱' dizra' lau Dios, ne lau xúgute̱ bénneache.
20 Na' benne' xíchaje̱ ca' chee̱ bxruze ca', ne benne' xu'u lawe' chee̱ntu' ca' buludée̱' Le̱' chee̱ gulechugue̱' chee̱' gatie̱', na' buludé̱'e̱ Le̱' xaga béguaj.
21 Netu' guleza lázrentu' Le̱' naque̱' Benne' dxal-la' guselé̱' xe̱zr la xu Israel. Na'a, ba zeaj chunna zra guca da ca'.
22 Bal-la nu'ula ca' ládujla netu' buluzúaqueze̱' netu' lu da ste̱be, lawe' da xjaque̱' dxaní'sise̱' dxu'a ba chee̱' na',
23 na' gate quebe belexezrelne̱' Le̱', na' belexelé̱'e̱ naga zúantu', ne gulenné̱' belelé'ene̱' chupa gubáz chee̱ xabáa ca' bululé'e lawe̱' nu'ula ca', na' gulé̱'e̱ le̱' nabán Jesús.
24 Nadxa bal-la benne' ljwézrentu' ca' xjaque̱' dxu'a ba na', na' belelé'ene̱' cáte̱ze na' gulenná nu'ula ca', san quebe belelé'ene̱' Jesús.
25 Nadxa gunná Jesús:
―Le'e quebe dxéajni'ile, na' ne naca zide' lázrdaule chee̱ quebe chéajle̱le xúgute̱ da gulenná benne' ca' buluchálaje̱' waláz chee̱ Dios.
26 ¿Quebe dxal-la' saca Cristo da caní nédxudxa ca xegá'ane̱' szren?
27 Nadxa guzú lawe̱' dxuzéajni'ine̱' benne' ca' ca naca xúgute̱ da naxúaj lu xiche chee̱ Dios naga dxuchalaj na chee̱ Le̱'. Guzú lawe̱' lu xiche ca' chee̱ Moisés, na' ne zéajdxaqueze na lu xiche ca' chee̱ benne' ca' buluchálaje̱' waláz chee̱ Dios.
28 Gate belezrine̱' lu xe̱zre naga zjaque̱', Jesús be̱ne̱' ca benne' zeajte̱ze̱' xu'e̱ neza.
29 Na' benne' ca' buluxucá'ane̱' Le̱' xadía, dxelenné̱':
―Begá'anale̱ netu', lawe' da ba zeaj dxezré', ne ba dxe' xrínnequeze na'a.
Nadxa Jesús guxú'ule̱ne̱' benne' ca'.
30 Gate na' dxé'le̱ne̱' le̱' dxelawe̱', guqué̱'e̱ xeta xtila, ne bzúzruje̱' na, na' guzre̱' Dios “Xcalenu'”, ne bnézruje̱' na benne' ca'.
31 La' ná'queze becuasa ca naca da guxúa na xiaj lau benne' ca', na' belexúnbe'e̱ Jesús, san la' ná'queze benite Le̱' lau benne' ca'.
32 Na' gulé̱ ljwezre̱':
―¿Quebe guzúa xel-la dxebé lu lázrdaudxu gate ze̱'e̱ dxuchálajle̱ne̱' dxi'u tu neza, ne bzéajni'ine̱' dxi'u ca naca da naxúaj lu xiche chee̱ Dios?
33 Nadxa, ne québedxa gulezrene̱', belexegu'e̱ neza, zeajxaque̱' Jerusalén, naga belelé'ene̱' zaj nazraga benne' chinéaj gubáz ca', ne benne' ljwezre̱' ca'.
34 Benne' ca' zaj nazrague̱' na' gulé̱'e̱ benne' chupa ca':
―Da li bebán Xránadxu, na' Simón ba blé'ene̱' Le̱'.
35 Nadxa benne' chupa ca' buluzenne̱' le̱' ca naca da guca la neza, ne ca belexúnbe'e̱ Jesús gate bzúzruje̱' xeta xtila na'.
Jesús dxulé'e lawe̱' benne' ca' xjácale̱ne̱' Le̱'
(Mt. 28.16-20; Mr. 16.14-18; Jn. 20.19-23)
36 Ne dxuluchálajte̱' caní gate ble'e lau Jesús gachaj lawe' benne' ca', na' bgape̱' le̱' diuzre, dxenné̱':
―Xela dxebeza zri lazre' súale̱ na le'e.
37 Na' benne' ca' belexruse̱', ne belezrébele̱'e̱. Guléquene̱' dxelelé'ene̱' bxinne dxe̱la.
38 Na' Jesús guzre̱' benne' ca':
―¿Bizr chee̱ na' dxezrébele? ¿Bizr chee̱ na' dxaca chupa lázrele?
39 Le na' na'a caní, ne le na' ni'a. Néda'queza' na'. Le gutá neda', ne le guxúe xque neda'. Tu bxinne dxe̱la quebe napa na be̱la' zrita, ca dxelé'ele le'e napa' neda'.
40 Ca dxe̱'e̱ benne' ca' da nigá, na' blé'ene̱' le̱' ne̱'e̱, ne ni'e̱.
41 Benne' ca' québequeze dxeléajle̱'e̱ chee̱' lawe' da dxelebéle̱'e̱ne̱', ne dxelexebánele̱'e̱ne̱', na' guzre Jesús le̱':
―¿De̱ late' da gawa' nigá?
42 Nadxa bulunézruje̱' Le̱' late' be̱la' guzrúa xi', ne late' da zixre che bézudau',
43 na' gucá'a Jesús da ca', ne gudawe̱' na lau benne' ca'.
44 Nadxa guzre̱' benne' ca':
―Da ba guca chia' naca na ca da gucha' le'e gate ne zúale̱queza' le'e, gunnéa' dxal-la' gaca li ca naca xúgute̱ da naxúaj lu da bdxixruj be'e Moisés, ne lu xiche naga zaj naxúaj salmo ca', ne lu xiche ca' chee̱ benne' ca' buluchálaje̱' waláz chee̱ Dios.
45 Nadxa bzéajni'ine̱' benne' ca' ca da naxúaj lu xiche chee̱ Dios,
46 na' guzre̱' benne' ca':
―Caní naxúaj na dxal-la' gate Cristo, na' zra guxunne' zra dxal-la' xebane̱' ládujla benne' gate ca',
47 na' lu La Le̱' dxal-la' xuluchalaj bénneache lau xúgute̱ xe̱zr la xu ca'. Su lau gunle na lu xe̱zre Jerusalén, xe̱le bénneache dxal-la' xelexebí'i lazre̱' chee̱ gunite lau Dios dul-la zaj nabaga benne' ca'.
48 Le'e nácale benne' xelexeche̱be̱' da caní.
49 ¡Le nna'xque! Neda' sel-la' chee̱le ca da guche̱be lazre' Xra'. Le xegá'ana nigá lu xe̱zre Jerusalén, cadxa si'le xel-la waca da za xabáa.
Jesús dxexegüéne̱' xabáa
(Mr. 16.19-20)
50 Nadxa Jesús beche̱'e̱ benne' ca', belexedxúaje̱' Jerusalén, xeajxaque̱' xe̱zre Betania, na' guchisa na' Jesús, ne gunabe̱' gaca chawe' chee̱ benne' ca'.
51 Ne dxúntee̱' ca', na' bezé̱'e̱ naga zaj zra' benne' ca', begüéne̱' zexíaje̱' xabáa.
52 Ca bexuzre belúe lá'ane̱' Le̱', besiá'que̱' zeajxaque̱' Jerusalén lu dute̱ xel-la dxelebé,
53 na' gulezráqueze̱' chale'aj xudau' dxelúe lá'ane̱' Dios. Ca' naca na.