7
Jesús dxusédene̱' chee̱ benne' dxuchi'e̱ da dxun le sa' ljwezre̱'
(Lc. 6.37-38, 41-42)
Na' gunná Jesús:
―Quebe guchí'ale da dxelún le sa' ljwézrele chee̱ quebe guchi'a Dios caní chee̱le le'e. Le̱' guchi'e̱ chee̱le le'e cáte̱ze dxunle le'e chee̱ le sa' ljwézrele, ne cáte̱ze dxunle le'e chee̱ le sa' ljwézrele, ca'an gun Dios nen le'e. ¿Bizr chee̱ na' dxená'u bé̱bedau' da xu'u xiaj lau le sa' ljwezru', ne quebe dxená'u da zrente̱ da xu'u na xiaj láuquezu' lue'? ¿Ájazra gunu' xu'u le sa' ljwezru': “Be̱nna lataj xebéaja' bé̱bedau' da xu'u xiaj lau'”, che da zrendxa xu'u xiaj láuquezu' lue'? Lue', benne' dxun xrlátaje cúzreze. Bebéaj nedxu da zrente̱ da xu'u xiaj láuquezu', na' gaca le'enu' cháwedau' xebéaju' bé̱bedau' da xu'u xiaj lau le sa' ljwezru'.
’Quebe gunézrujle da naca lá'azxa chee̱ benne' dxelune̱' ca dxelún becu' snia, checa xelexéchaje̱', ne xuluzúzrue̱' le'e. Quebe guzúale da zaca chee̱le lau benne' dxelune̱' ca dxelún cuche, dxuluchuchuj dxululéajba' da dxugágule-ba'.
Dxuchalaj Jesús ca dxal-la' nábadxu, ne xexílajdxu, ne nne̱dxu dxu'a dxa xu'u
(Lc. 11.9-13; 6.31)
Na' gunná Jesús:
―Le naba, na' Dios gunne̱' na chee̱le. Le xilaj na, na' xezrélele na. Le nne̱ dxu'a dxa xu'u, na' sáluje̱' chee̱le. Le gun caní lawe' da benne' bi dxenabe̱', dxezi'e̱ na. Benne' bi dxexílaje̱', dxeajxraque̱' na, na' benne' dxenné̱' dxu'a dxa xu'u, zua nu benne' sáluje̱' chee̱'.
’Netule le'e quebe gunézrujle zrí'inele tu xiaj che le̱be' dxenábabe' le'e tu xeta. 10 Quebe gunézrujle zrí'inele tu be̱la' snia che le̱be' dxenábabe' le'e tu bela. 11 Che le'e, benne' we̱n da cale̱la, nézele gunézrujle zrí'inele da naca na chawe', da cháwedxa gunna Xrale Dios zua xabáa, gunne̱' da chawe' chee̱ benne' bi dxenábene̱' Le̱'.
12 ’Le gun chee̱ le sa' ljwézrele ca dxaca lázrele le'e xelún le̱be' chee̱le. Da nigá naca da nadxixruj bea na Moisés, ne da dxenná na lu xiche naga naxúaj da gulenná benne' ca' buluchálaje̱' waláz chee̱ Dios.
Jesús dxusédene̱' chee̱ dxa xu'u lechide'
(Lc. 13.24)
13 Na' gunná Jesús:
―Le chu'u lu dxa xu'u lechide'. Dxa xu'u laga, ne neza xu zaj naca naga zjaca benne' xelebía xi'e̱, na' benne' zante̱ zjaque̱' na'. 14 Dxa xu'u lechide', ne neza lase zaj naca naga zjaca benne' xelezí'e̱ xel-la' nabán da zeajlí canna, na' bábaze benne' dxelexezrelne̱' na.
Naca bea tu xaga ne̱ chee̱ da zixre dxebía na
(Lc. 6.43-44)
15 Na' gunná Jesús:
―Le guxúe cuínale chee̱ benne' we̱n lazre' ca', benne' dxelenné̱' zaj naque̱' benne' dxuluchálaje̱' waláz chee̱ Dios. Benne' caní zá'aque̱' naga zrale le'e, zaj nun cuine̱' ca tu benne' dxexruj lazre' ca naca tu zríla'dau', san lu xichaj lázrdawe̱' zaj naque̱' snia ca tu becu' xi'a. 16 Le'e xúnbeale le̱' ne̱ chee̱ da dxelune̱'. Da zixre da dxebía lba uva quebe xuchíbedxu na lu xaga xeche', na' da zixre da dxebía xaga higo quebe xuchíbedxu na lu xeche' ga'. 17 Ca'an naca, xúgute̱ xaga chawe' dxelebía na da zixre chawe', na' xaga da quebe naca na chawe', quebe dxebía na da zixre chawe'. 18 Xaga chawe' ca' quebe dxelebía na da zrinnaj, na' xaga zrinnaj na' quebe dxebía na da chawe'. 19 Xúgute̱ xaga zrinnaj welechugue na, na' xelezxe na lu xi'. 20 Ca'an naca, le'e xúnbeale benne' ca' ne̱ chee̱ da ca' dxelune̱'.
Quegá xúgute̱ benne' xelu'e̱ naga dxenná bea Dios xabáa
(Lc. 13.25-27)
21 Na' gunná Jesús:
―Quebe xelu'e̱ naga dxenná bea Dios xabáa xugute̱ benne' ca' dxelé̱'e̱ neda': “Xrana', Xrana'.” Welú'u tuze benne' ca' dxelune̱' ca da dxaca lazre' Dios zue̱' xabáa. 22 Ca zrin zra na', benne' zante̱ xelé̱'e̱ neda': “Xránantu', Xránantu', netu' bchálajntu' ne̱ chee̱ Lau' Lue', ne bchínentu' Lau' bebéajntu' be' xriwe̱' ca', ne nen Lau' Lue' bé̱nle̱'e̱ntu' xel-la' waca ca' chee̱ xabáa.” 23 Nadxa neda' xápaqueza' benne' ca': “Quebe núnbe'a le'e. Le cuasa cuita' neda', le'e, ba be̱nle da cale̱la.”
Jesús dxusédene̱' chee̱ chupa lane xu'u
(Lc. 6.47-49; Mr. 1.22)
24 Na' gunná Jesús:
―Bénnea' dxenne̱' chia', ne dxune̱' ca da dxennía', naque̱' ca tu benne' naxéajni'iqueze', benne' be̱ne̱' tu lizre̱' lu xiaj xre. 25 Guca xiuj, na' bdxuaj guba'u, ne guxasa be' bdunu' chee̱ xuluzría xi na xu'u na', san quebe guzré'e na lawe' da xu'u lane na lu xiaj xre. 26 Bénnea' quebe dxuzé̱ nague̱' chia', ne quebe dxune̱' ca da dxennía', naque̱' ca tu benne' xala, benne' be̱ne̱' tu lizre̱' lu xu dxeze. 27 Guca xiuj, na' bdxuaj guba'u ne guxasa be' bdunu' chee̱ xuluzría xi na xu'u na', na' chadite guzré'e na, ne guzría xite̱ na.
28 Ca bexuzre bchalaj Jesús, na' belexebanne benne' ca' ca naca da bsé̱dene̱', 29 lawe' da dxusé̱dene̱' benne' ca' ca tu benne' nape̱' xel-la' dxenná bea, ne quegá ca dxelún benne' ca' dxuluxuzájle̱'e̱ da nadxixruj bea Dios.