5
Bze̱ naga dizra' chia', Xran.
Bde lazre' ca dxebezre lazra'.
Bene ca guchálajlena' Lue', Wenná Bea chia', ne Dios chia', q lawe' da guláwizraja' Lue', Dios.
Xran, che zílala xennu' chi'a.
Che zílala xídaqueza' lau Lue', ne wabeza lazra' Lue'.
Nacu' Dios quebe dxezaca ba lazru' da cale̱la.
Benne' we̱n da cale̱la quebe súaqueze̱' naga zu' Lue'.
Quebe dxu'u lataj xelezrín benne' we̱n da cale̱la lau'.
Dxecuídenu' xúgute̱ benne' dxelune̱' da zrinnaj.
Guzría xí'quezu' benne' ca' dxelezí xe̱'e̱.
Guzú' chalá'ala benne' we̱te benne', ne benne' guzrí xe̱'.
Neda' waca chu'a lizru' lawe' da nazrí'ile̱'e̱nu' neda'.
Güe lá'ana' Lue' lu xudau' lá'azxa chiu' dute̱ xel-la' dxezrebe.
Bsi neda' chee̱ guna' da xrlátaje chiu', Xran,
lawe' da zrále̱'e̱ benne' dxeledábague̱' neda'.
Gulú'u neda' neza chawe' chiu'.
Benne' caní quebe dxelenné̱' da li.
Lu xichaj lázrdawe̱' xu'u da cale̱la.
Xe̱dxu lbe̱'e̱ zaj naca na ca tu ba chee̱ benne' gate da naxalaj na.
Zaj nupé̱'e̱ dizra' chawe' chee̱' da zaj naca na da we̱n lazre'.
10 Bde benne' ca' lu da ba xa', Xrana' Dios.
Be̱n cheajlecházie̱' cáte̱ze zaj naca xrtízraqueze̱'.
Lawe' da naxánle̱'e̱ da cale̱la da dxelune̱'
ne lawe' da guledábague̱' Lue', bebéaje̱' chalá'ala.
11 Welebéle̱'e̱ benne' ca' dxuluxrén lazre̱' Lue'.
Welebézre xá'aqueze̱' dute̱ xel-la' dxelebé
lawe' da dxucú'uju' le̱'.
Lau Lue' welebéle̱'e̱ benne' ca' zaj nazrí'ine̱' Lue'.
12 Gúnquezu' da chawe' chee̱ benne' xrlátaje, Xran.
Gucu'uju' bénnea' lawe' da dxezaca ba lázrele̱nu' le̱'.