50
Ba gunné̱ Xránadxu Dios, ne ba nutube̱' bénneache
chee̱ dute̱ xe̱zr la xu,
benne' zaj zre̱'e̱ naga dxalaj gubizra,
ne benne' zaj zre̱'e̱ naga dxebía na.
Lu xi'a Sión, da naca na xrtánle̱'e̱ ba bzaní' Dios.
Xelá' Dios chee̱dxu, ne quebe sua zrie̱'.
Gálajqueze xi' lau Le̱',
ne gácale̱'e̱ be' bdunu' da chechaj na Le̱'.
Xutúbequeze̱' benne' zaj zre̱'e̱ xabáa na'ala,
ne benne' zaj zre̱'e̱ xe̱zr la xu,
chee̱ guchi'e̱ chee̱ bénneache chee̱'.
Dxenné̱': “Le xutube benne' chia' ca',
benne' ca' belune̱' tu xel-la' wezría nen neda'
da buluzúa chúchue̱' nen dxen chee̱ béadu ca'.”
Da zua xabáala gulé'e lau na naque̱' xrlátaje,
lawe' da naca Dios Benne' guchi'e̱ chee̱ bénneache.
Dxenné̱': “Le xen, bénneache chia', na' guchálaja'.
Le guzé̱ nágale, benne' Israel, na' nnia'
da gagu na zria chee̱le.
Neda', Dios, naca' Dios chee̱le.
Quebe til-la' le'e ca naca béadu ca' bé̱tele lawa',
ne ca naca béadu ca' bzézxele,
da zaj zúaqueze na lawa' neda'.
Quebe ca'a lu na'ale me̱du ca',
ne chivo biu ca', be̱ nápaquezle
10 lawe' da zaj naca chia' xúgute̱ be̱ xixre' ca',
ne zane gaxúa be̱ xixre' zaj zraba' lu xí'adu ca'.
11 Xu'u lu na'a xúgute̱ be̱ zua xrila,
ne naca chia' xúgute̱ be̱ zaj naca banba'.
12 Chela neda' dxeduna', quebe xapa' le'e ca'
lawe' da naca chia' xe̱zr la xu, ne xúgute̱ da de̱ lawe na.
13 ¿Dxun na ba xen gawa' be̱la' be̱zre ca'?
¿Xí'aja' dxen chee̱ chivo biu ca'?
14 Le guzúa lau Dios da güe lá'anale Le̱'
ne le gunezruj ca da guche̱be lázrele lau Dios szrente̱.
15 Bláwizra neda' lu zra zu' lu da zi' da xa',
na' guselá' lue', na' lue' gapu' neda' ba lá'ana.”
16 Dios guzre̱' benne' we̱n da cale̱la:
“¿Bi dxéquenu' lue', dxuchálaju' ca nadxixruj bi'a,
ne dxenníu' ca naca chee̱ xel-la' wezría chia'?
17 Lue' dxecuídenu' neda' che dxusízreda' lue',
ne dxuzú' chalá'ala dizra' chia'.
18 Gate dxelé'enu' gubán, na' dxunu' le̱' tu zren,
ne nacu' tu zren benne' ca' dxeledále̱ne̱' nu'ula
quebe zaj naca zru'ule̱'.
19 Dxuchálajquezu' da cale̱la,
ne tu dxúnzquezu' da we̱n lazre'.
20 Tu dxenné̱zquezu' da cale̱la chee̱ bi bíchequezu',
Ne dxagu' zria chee̱ bi chee̱ xrná'aquezu'.
21 Da caní be̱nu', na' neda' guzúa' zrize.
Gúquenu' naca' tu benne' ca nacu' lue'.
Na'a wadíl-laqueza' lue', ne gulé'eda' lue' ca ba be̱nu'.”
22 Le chéajni'i da nigá na'a, le'e dxal-la lázrele Dios.
Ga gaze guzuzruj Dios le'e, ne québedxa sua nu guselá le'e.
23 Bénnea' guzúe̱' lawa' da güe lá'ane̱' neda' gape̱'
neda' ba lá'ana,
na' bénnea' dxuxuchá cuine̱' chee̱ gune̱' da xrlátaje,
gulé'eda' le̱' ca guselá' le̱', naca' Dios chee̱'.