55
1 Bze̱ naga, Xran, ca da dxuchálajle̱na' Lue',
ne quebe guzú' chalá'ala ca da dxenaba' lau'.
2 Guzúa ban lazre', ne beche̱be chia'.
Dxuláwizra' Lue' lu da dxuchálaja', ne zua' ste̱be,
3 lawe' da benne' dxeledábague̱' neda' dxelenné̱' chia',
ne lawe' da dxelún la benne' we̱n da cale̱la neda'.
Bulusebague̱' neda' da zrinnaj,
ne dute̱ xel-la' dxelezrá'a zaj nau zi' xuzre̱' neda'.
4 Dxe' gunne xue lázrdawa' lu be̱la' dxen chia',
ne dxuchebe xel-la' gute neda'.
5 Zua' lu xel-la' dxezrebe, ne dxezríztequeza',
na' zúale̱ neda' da dxuchebe na neda'.
6 Na' gunnía': ¿Nuzra gunna neda' xrila' ca xrila tu bsia
chee̱ cha'a lu be'la naga xezí' lazra'?
7 Da líqueze guzrúnnuja' zítu'la,
na' súaqueza' le̱'e̱ xixre' lawe' lataj.
8 Guna' ba xuzre la' lu be' bdunu', ne lu be' wal-la.
9 Bzria xi' benne' ca' dxelune̱' da cale̱la, Xran.
Bzaga naze da dxelune̱',
lawe' da ble'eda' da zrinnaj, ne da cale̱la da dxelune̱'
lu xe̱zre.
10 Te zra chizrela dxeledé̱' lawe' ze'e da naxechaj na xe̱zre,
ne dxelune̱' da zrinnaj, ne da cale̱la lu xe̱zre nigá.
11 Nazrate̱ xe̱zre nigá da cale̱la da dxelune̱',
ne tu dxelúnzqueze̱' da we̱n lazre', ne xel-la' dxezí xe̱
lu neza chee̱ na.
12 La guca tu benne' bénnea' dxedábague̱' neda',
bénnea' be̱n le̱' chia',
na' bchaga lawa' da na'.
La guca tu benne' dxecuídene̱' neda' bénnea' gudábague' neda',
na' bcache cuina' lau le̱'.
13 Lue', bénnea', gucu' ca tu le sa' ljwezra'.
Bsi'u neda', ne gucu' tuze neda'.
14 Tu zren bchálajdxu du lázredxu,
ne lu xel-la' zri'i lazre' gudadxu lu xu'u lizre Dios.
15 Dios, be̱n que̱la xel-la' gute benne' ca' dxelune̱'
da cale̱la chadite̱.
Be̱n xelexú'e̱ lu lataj ba xa' zaj naca bane̱',
lawe' da nazrate̱ xu'u lizre̱' da cale̱la da dxelune̱'.
16 Ca naca chia' neda', bláwizra' Dios,
na' Xrana' Dios bselé̱' neda'.
17 Che zílala, ne wagubizra, ne ca dxebía gubizra
guchálajle̱queza' Dios, ne guláwizra' Le̱',
na' Le̱' xenne̱' chia'.
18 Xexá'awe̱' bénne'du xu'a lu wedil-la da dxaca chia' neda',
ne gune̱' cueza' zri lazra',
lácala zaj zra' zánete̱ benne' dxeledábague̱' neda'.
19 Wene Dios, na' guzría xí'queze̱' benne' ca'.
Naque̱' Bénnea' zúatequeze̱' dxenná be'e̱ nédxute̱.
Caní gune̱' chee̱ benne' ca' lawe' da quebe dxuluché̱'e̱
ca dxelune̱', ne quebe dxelezrebe̱' Dios.
20 Guchisa na' benne' we̱n da zrinnaj chee̱ gu'e̱ benne' ca'
dxelebeza zri lazre̱' nen le̱'.
Gudíchaje̱' xrba chee̱ xel-la' wezría da be̱ne̱' nen benne' ca'.
21 Dizra' bchálaje̱' zaj naca na dizra' zren lazre',
san xu'u lázrdawe̱' xel-la' dxezrá'a.
Dxune̱' xrtante̱ dizra' dxuchálaje̱',
san zaj naca na ca xia da zaj nalále̱'e̱.
22 Bda xua chiu' cuzru Xránadxu, na' Le̱' gutipe̱' lazru'.
Québequeze gu'e̱ lataj cheajchaze benne' chawe' tu chi'ize.
23 Lue', Dios, gunu' xelexú'u benne' ca' dxelune̱'
da cale̱la lataj ba xa',
benne' dxelute benne', ne benne' dxelezí xe̱'e̱,
gate quebe ne xelezrine̱' gachaj catite dxal-la' xelaca bane̱',
san neda' guxrén lazra' Lue'.