62
1 Tuze nen Dios dxebeza zri lazre' bénne'du xu'a.
Lé̱queze̱' dxuselé̱' neda'.
2 Tuze Le̱' dxucu'uje̱' neda', ne dxuselé̱' neda'.
Naque̱' Bénnea' dxuxre̱' neda', na' quebe negue lazra'.
3 ¿Ajate̱zcha' gucuézale da gunle chee̱ tu benne',
na' dxunle ba xen xúgute̱le guzría xile le̱',
ca dxun tu benne' dxuchínnaje̱' tu ze'e da ba de̱ chalá'ala,
u tu le'aj da ba guzru'?
4 Dxunle tuze dizra' ájazra xebéajle neda' lu xel-la' szren chia'.
Nazrí'ile da we̱n lazre'.
Nen dxú'ale dxenne̱le da xrlátaje, san xu'u lázrdaule da cale̱la.
5 Lue', bénne'du xu'a, guleza lazre' tuze Dios,
lawe' da naca Le̱' Bénnea' dxebeza lazra'.
6 Tuze Le̱' dxucu'uje̱' neda', ne dxuselé̱' neda'.
Naque̱' Bénnea' dxuxre̱' neda', na' quebe negue lazra'.
7 Naca Dios Bénnea' dxuselé̱' neda', ne naque̱' da ba neza chia'.
Naca Dios Bénnea' dxucu'uje̱' neda', ne Benne' dxuxre̱' neda'.
8 Le cueza lazre' Le̱' tu chí'izqueze, le'e, bénneache.
Le xe̱'e̱ ca da dxezá lázrele.
Naca Dios Bénnea' dxuxre̱' dxi'u.
9 Da líqueze, da dácheze zaj naca bénneache,
ne ca tu da we̱n lazre' benne' zren ca'.
Quebe bi dxelé̱'e̱ tu lu zrgú'unsa.
Zaj nácadxe̱' zraze ca tu be' da dxecá'a lázredxu.
10 Quebe guxrén lázrele da sile gate dxexúbele,
ne quebe gucá'ana szren cuínale chee̱ da ca' dxebanle.
Che dxegula xel-la' gunní'a chee̱le, quebe xezaca ba lázrele
chee̱ da na'.
11 Tu lásaze gunná Dios:
na' chupa lasa benda' da nigá:
Chee̱ Dios naca xel-la' waca.
12 Chiu' Lue', Xran, naca xel-la' dxexache lazre'
lawe' da dxunézruju' lazruj chee̱ tu tu bénneache
cáte̱ze da zaj nune̱'.