88
Xran, nacu' Dios dxuseláu' neda'.
Te zra, ne chizrela dxuláwizra' Lue'.
Bene da dxuchálajle̱na' Lue',
ne bze̱ naga da dxuláwizra' Lue'.
Dxedú lazra' lu da cale̱la ca' da dxaca na chia',
ne ba zua' gatia'.
Dxeleque bénneache neda' ca tu benne' gate,
lawe' da dxátele̱'e̱ ni'a na'a.
Nagá'ana' cá'aze ládujla benne' gate.
Naca' ca benne' gulátie̱' lu wedil-la, ne zaj de̱' xe̱dxu ba ca',
benne' ca' québedxa dxajsá lazru', Dios,
ne québedxa zaj xu'e̱ lu na'u Lue'.
Dxaca chia' cáte̱ze ba nuzú' neda' tu xe̱dxu zren
naga naca chul-la, ne nácale̱'e̱ situj.
Dxéqueda' dxezrá'le̱'u neda'.
Da dxaca chia' naca na ca dxazia' zran xeajxruza zri'a
chee̱ nísadau'.
Be̱nu' belexebiga bi ljwezra' ca' naga zua'.
Be̱nu' neda' ca tu da dxusegute na benne' ca'.
Naca' ca tu benne' xu'e̱ lizre xia ne quebe gaca xedxúaje̱'.
Dxelechul-la xiaj lawa' ne̱ chee̱ da dxezí dxezaca'.
Xúgute̱ zra dxuláwizra' Lue', Xrana' Dios.
Dxechisa na'a lau Lue'.
10 ¿Dxúnquezu' xel-la' waca chee̱ xabáa dxácale̱nu'
benne' gate ca'?
¿Dxelexasa benne' gate ca' dxelúe lá'ane̱' Lue'?
11 ¿Dxuluchalaj benne' zaj nagache̱' lu xe̱dxu ba chee̱
xel-la zri'i lazre' chiu',
na' dxuluchalaj chee̱ da li lazre' chiu' benne' zaj xu'e̱
lataj chul-la chee̱ benne' gate ca'?
12 ¿Welexúnbea benne' zaj xu'e̱ lataj chul-la na' ca
naca da zrente̱ da dxunu',
na' welexúnbea benne' zaj xu'e̱ naga quebe nu dxajsá lazre' le̱'
ca nacu' xrlátaje?
13 Neda' dxuláwizra' Lue', Xrana' Dios.
Xúgute̱ zila dxezrín lau' da dxenaba' Lue'.
14 ¿Bizr chee̱ na' dxebéaj xíchaju' neda', Xran?
¿Bizr chee̱ na' quebe dxenná'u neda' chee̱ gácale̱nu' neda'?
15 Dxezí dxezaca', ne ba zua' gatia'.
Nácatea' bi cuíde'te̱ dxedéa' xel-la' zi' da dxudeu' neda',
na' dxedú lazra'.
16 Dxéqueda' dxezrá'le̱'u neda'.
Da dxuchebu' neda' ba bsedú na lazra'.
17 Zaj naxechaj da caní neda' du zra.
Dxulusaca zi na neda' gátete̱ze na'.
18 Be̱nu' belexebiga bi ljwezra' ca' naga zua',
na' tuze da naca chul-la dxedále̱ na neda'.