3
Ucañi Diose Pablo para nú ixiuleꞌella stichiaꞌ Jesucristo lubee bene enu laca bee bene Israel
1 Enzeꞌe liꞌá Pablo, nchiñia niꞌcuꞌ equie nú sibiꞌa lu Jesucristo para nú rriꞌá elietsa luhua enu laca bee bene Israel.
2 Liꞌihua nediyaꞌhua nú la yala riꞌá riñaꞌ nú rriꞌá, pero lunú nzeꞌca Diose uliquiꞌnu riñaꞌ quieꞌ rriꞌá para nú riꞌá elietsa luhua nú riꞌihua beyaꞌ stichiaꞌnu.
3 Nu liꞌinu ulubeꞌlanu lua xa neca elliebacuꞌnu hasta huaꞌtu, tucu nú unilá luhua lu tucu carta.
4 Chenu ulahua carta cuaꞌ che riꞌihua beyaꞌ nú nediyala xa neca equie cuendaꞌ Jesucristo nú la riꞌi bee bene beyaꞌ hasta huaꞌtu.
5 Bee tiembu nú udetela lecali ti uriꞌi beyaꞌ xa neca equie cuendaꞌ Jesucristo, xne ungae xi neca tucu nú aꞌchiꞌ neca lubee bene, pero nee equie cuendaꞌ Espíritu Santo ulubeꞌla Diose nucuaꞌ lubee apóstol cuna lubee profeta.
6 Nu lunú unga xi neca nú aꞌchiꞌ neca lubee bene, necane equie cuendaꞌ bedichiaꞌ nzeꞌcaꞌ Jesucristo, nú leꞌca bee bene enu laca bee bene Israel riala beella erencia nú riala bee bene Israel lunú neca tucunecatsela beella, nu nebacuꞌla beella lunú ucuaqui uꞌna Diose equie cuendaꞌ Jesucristo.
7 Liꞌá rixiuleꞌa bedichiaꞌ nzeꞌcaꞌ Jesucristo lubee bene, la necane equie cuendaꞌ nú riala nú riꞌá scua sino que necane nú ñia nzeꞌca Diose enzeꞌe lia uliquiꞌnu elurnibiyaꞌcuaꞌ lua para nú zibiꞌa lunu.
8 Liꞌá neca enu máse leca tineca lu ye bee beneꞌ Diose, pero lunú ñia nzeꞌca Diose lia uliquiꞌnu lua nú ixiuleꞌa lubee bene enu la neca bee bene Israel equie cuendaꞌ eluxeneꞌ Jesucristo nú llene neca.
9 Nu para nú ixiuleꞌe nzeꞌcaa lu yebeella xa neca elliebacuꞌ Diose enu urecheꞌ ye nú nuꞌ, elliebacuꞌ nú né chu alubeꞌnu lubee bene.
10 Para nú equie cuendaꞌ bee bene enu nzeli arquiꞌ Jesucristo riꞌi ye bee enu rluꞌcu nú rnibiyaꞌ liñibe beyaꞌ nú Diose rluꞌcu ye poder.
11 Nu hasta chenu lascaꞌ quixie iliulabe uriꞌila Diose elliebacuꞌ nú acane scua nu nee uyalulane equie cuendaꞌ Jesucristo enu rnibiyaꞌ luaꞌahua.
12 Nu equie nú nzelila arquiaꞌahua Jesucristo nuꞌla modo xa riñaꞌahua lu Diose sin nú lliquiaꞌahua chebicaꞌahua lunu.
13 Enzeꞌe nia luhua nú la tsunehuana arquiꞌhua lunú nehuana seꞌcaa equie cuendaꞌhua, xne neca nzeꞌca nucuaꞌ para liꞌihua.
Chiquiꞌ seca Jesucristo liaꞌahua
14 Enzeꞌe súlliquia lu Diose paꞌ Jesucristo enu rnibiyaꞌ luaꞌahua,
15 liꞌinu enu rnibiyaꞌ lu ye nú nuꞌ liñibe cuna lu iliulabe.
16 Rnacua lunu, nú lunú chiquiꞌ rluꞌcunu poder nú liquiꞌnu juerzaꞌahua cuna elurnibiyaꞌ luhua equie cuendaꞌ Espíritu Santo para nú tsutaꞌ arquiꞌhua lunu,
17 nu huañihua cuna Jesucristo equie nú nzeli arquiꞌhua liꞌinu para nú scua tucu nú neli nzenalahua elusecaꞌnu.
18 Scua acahua riꞌihua beyaꞌ cuna beelá bee saꞌhua enu nzeli arquiaꞌahua liꞌinu nú eluseca Diose chiquiꞌ llene neca, nu niꞌ la riaꞌahua beyaꞌ xa niaꞌahua lunú chiquiꞌ llene necane.
19 Enzeꞌe rnacua lu Diose nú chuluhua eluseca cuaꞌ nú chiquiꞌ llene neca, nu másela llene necane luquelá nú rriꞌi bee bene elliebacuꞌ, nu scua nezaꞌli nú huañihua cuna Diose.
20 Nu liꞌinu enu rluꞌcu nú rnibiyaꞌ para nú riꞌinu másela lunú rriꞌi bee bene elliebacuꞌ, urre másela lunú rnacuꞌ bee bene lunu equie cuendaꞌ Espíritu Santoꞌnu nú nzu cuna liaꞌahua.
21 Nu riala nú zucuꞌ uyaꞌahua Diose ye bichia nu ye tiembu equie cuendaꞌ Jesucristo, liaꞌahua enu nzeli arquiaꞌahua Jesucristo. Amén.