2
Uyeteꞌ Pablo cuna beelá bee Apóstol
1 Chenu udete rta lana, che uyaꞌa Jerusalén stucu bese uyaꞌnua Bernabé cuna Tito.
2 Xne Diose uni lua nú uyaꞌa zeꞌe. Nu Jerusalén, zeꞌe uyetesaꞌru stucu luhuare puro bee bene enu rnibiyaꞌ leta bee bene enu nzeli arquiꞌ Jesucristo para nú bedichiaꞌru equie cuendaꞌ stichiaꞌ Jesucristo nú setea bee bene enu laca bee bene Israel scua uriꞌá para nú laca xleꞌe uriꞌá yebeenú uriꞌá nu cuna nú rriꞌá.
3 Pero niꞌ Tito enu nzu cuna liꞌá zeꞌe añinzuca nú necalla bene griego lá nibiyaꞌ bee beneꞌ Diose nú aquie seña nú rquie bee bene Israel liꞌilla.
4 Xne nuꞌ bee bene Israel enu lia rriꞌi nu neca beei saꞌahua para nú scua aca chuꞌu beei letaꞌahua nu tsiꞌñia beei ta beenú la zucuaꞌahua, para nú scua nibiyaꞌ zeca beei luaꞌahua nú zucuaꞌahua nú rnibiyaꞌ ley.
5 Pero niꞌ temeꞌ lá azelaru nú ariꞌibeei ana luru, xne la niarquiꞌru nú tsanaꞌ arquiꞌhua bedichiaꞌ nzeꞌcaꞌ Jesucristo nú neli neca nú nzenalalahua
6 Nu bee bene enu rnibiyaꞌ leta bee beneꞌ Jesucristo lá niaꞌbeella lua xilá riala riꞌá, añinzuca nú xi riꞌá nú ti neca beella xne ante Diose iguale yebee bene.
7 Luhuare nú anibeella lua nú xilá rquiꞌña riꞌá, luego chu uriꞌibeella beyaꞌ nú ucañila Diose liꞌá para nú ixiuleꞌa bedichiaꞌ nzeꞌcaꞌ Jesucristo lubee bene enu laca bee bene Israel, tucu nú ucañi Diose Pedro para nú ixiuleꞌella bedichiaꞌ nzeꞌcaꞌ Jesucristo lubee bene Israel.
8 Nu leꞌca Diose enu ucañi Pedro nú necalla apóstol lubee bene Israel leꞌca liꞌinu ucañinu liꞌá para nú necaa apóstol lubee bene enu laca bee bene Israel.
9 Enzeꞌe, Jacobo, Pedro nu Juan liꞌibeella enu máse rnibiyaꞌ leta bee bene enu nzeli arquiꞌ Jesucristo luego uriꞌibeella beyaꞌ nú Diose neca enu uliquiꞌ elurnibiyaꞌcuaꞌ lua. Nu che unaꞌtse beella yaru xi neca tucu seña nú neca tucunecatselaru, nu uyaꞌnaru nú liꞌá nu Bernabé nzetixiuleꞌeru stichiaꞌ Jesucristo lubee bene enu laca bee bene Israel. Nu liꞌibeella ixiuleꞌebeella stichiaꞌ Jesucristo lubee bene Israel.
10 Tucutsia nú unibeella luru nú la zañiꞌru riꞌiru elietsa lubee bene enu seca elitsi nu nucuaꞌ riuꞌ arquia nú riꞌá.
Uquiꞌyaꞌ Pedro uriꞌi Pablo
11 Pero chenu uya Pedro eyeche Antioquía, che uquiꞌyaꞌlla uriꞌá xne la riꞌilla tucu nú riala riꞌilla,
12 xne rluti udacunuuxulla bee bene enu laca bee bene Israel. Pero chenu uriña bee bene enu uxeꞌla Jacobo eyeche Antioquía che né quieteaꞌ Pedro bee bene enu laca bee bene Israel xne ulliquilla nú xi ni bee bene enu neli sucuꞌ nú rni ley.
13 Ye beelá bee bene Israel enu nzeli arquiꞌ Jesucristo enu nucuꞌa zeꞌe leꞌca uriꞌibeella tucu nú uriꞌi Pedro, nu leꞌca hasta Bernabé uriꞌi scua.
14 Enzeꞌe, chenu ulañia nú la riꞌi beella tucu nú rni stichiaꞌ Jesucristo che unia lu Pedro ante lu yebeella: “Liꞌilu nú necalu bene Israel la nehuañilu tucu nú nehuañi beella. ¿Nu xneca niarquiꞌlu nú riꞌilu juerza bee bene enu laca bee bene Israel nú huañi beella tucu nú nehuañi bee bene Israel?”
Equie nú nzeli arquiꞌ bene Jesucristo tsilaꞌa bene
15 Liꞌiru necaru bene Israel desde nú ungularu nu siempre uzucuꞌru nú rni leyꞌ Diose nu la nehuañiru xi nehuañi bee bene enu laca bee bene Israel.
16 Pero liꞌiru nediyaꞌru nú lecati enu la luꞌcu dula ante Diose equie nú sucuꞌlla ley cuaꞌ sino que lunú nzeli arquiꞌ bene Jesucristo, enzeꞌe leꞌca nuuru nzelila arquiꞌru Jesucristo para nú la luꞌcuru dula lunu, nu la necane equie nú rriꞌiru nú rnibiyaꞌ ley, xne lecati enu la luꞌcu dula lu Diose equie nú nzenalatsia nzeꞌe ley cuaꞌ.
17 Neequie tunu liꞌiru rlaꞌnaru nú la luꞌcuru dula lu Diose equie cuendaꞌ Jesucristo, nu tunu leꞌca nuuru necaru bene enu rluꞌcu dula, ¿xieꞌ nú másela rriꞌi Jesucristo nú rluꞌcuru dula che la? Liꞌiru nediyaꞌ nzeꞌcaꞌru nú lacane esquie,
18 xne tunu utsana arquilá leyꞌ Moises, nu chequie zucu zeca nú rni ley cuaꞌ stucu bese, che leꞌcatsia liꞌá rriꞌá nú necaa bene enu rluꞌcu dula.
19 Enzeꞌe neca xi neca nú ungutilá equie cuendaꞌ ley para nú huañia para Diose.
20 Nu nee neca xi neca nú leꞌca ungutia chenu unguti Jesucristo lu cruse nu nee la nehuañiaꞌa lu cuendaꞌ liꞌitsia sino que Jesucristo neca enu nehuañi cuna liꞌá nee. Nu nee nehuañia lunú nzeli arquia lliꞌñi Diose enu chiquiꞌ seca liꞌá nu unguti equie cuendaꞌ liꞌá.
21 Nu la luachua elusecaꞌ Diose xne tunu nuꞌ modo nú la luꞌcu bene dula ante Diose equie nú sucuꞌ bene leyꞌ Moisés, lecaxi sibiꞌ nú unguti Jesucristo lu cruse che.