5
Utsutaꞌ arquiꞌhua lu Stichiaꞌ Diose
1 Jesucristo utsilaꞌa liaꞌahua para nú la nibiyaꞌ ley luaꞌahua enzeꞌe utsutaꞌ arquiꞌhua nu la zelaꞌhua acahua stucu bese xi neca esclavo equie nú rriꞌihua nú rnibiyaꞌ ley.
2 Liꞌá Pablo nia luhua: Tunu liꞌihua aquie seña nú rnibiyaꞌ ley nú quiehua lecaxi zibiꞌ nú nzeli arquiꞌhua Jesucristo che.
3 Nu liꞌá rni zeca luhua: Titse bene enu quie señacuaꞌ cuerpoꞌ rquiꞌña nú riꞌilla ye nú rnibiyaꞌ ley.
4 Liꞌihua enu rriꞌi elliebacuꞌ nú lunú sucuꞌhua nú rnibiyaꞌ ley che la luꞌcuhua dula lu Diose. Nucuaꞌ rriꞌi nú lacaꞌhua beneꞌ Jesucristo nu niꞌ la luꞌcu cuendaꞌhua elusecaꞌ Diose.
5 Pero liaꞌahua equie cuendaꞌ Espíritu Santo, nu lunú nzeli arquiaꞌahua Jesucristo nzucu luaꞌahua nú riñaꞌahua lu Diose sin nú luꞌcuaꞌahua dula.
6 Xne chenu neca tucunecatsela bene cuna Jesucristo lecaxi sibiꞌ nú nequie seña bene urre la nequie seña bene. Lunú mase sibiꞌ neca nú nzeli arquiꞌ bene Jesucristo nu lunú nzeli arquiꞌ bene rlucu bene eluseca, che nuꞌ modo nehuañi nzeꞌca bene.
7 Liꞌihua nzeli nzeꞌca arquiꞌhua. ¿Nu ti uni luhua nú lá riꞌi casoaꞌhua lunú neli neca?
8 Xne elliebacuꞌcuaꞌ la yeꞌta lu Diose xne liꞌinu ucañilanu liꞌihua para liꞌinu.
9 Enzeꞌe ubiꞌyahua liꞌihua xne canu terratutsia nuꞌ modo zequienu bee bene yehua.
10 Pero liꞌá nzutaꞌ arquia lu Jesucristo, nú la chiecuꞌ arquiꞌhua Stichiaꞌ Diose nú uzetelahua. Nu Diose deteꞌ castiya bene enu sequienu liꞌihua lecaxi riꞌi nú ti neca nzeꞌe.
11 Tunu liꞌá rniscaꞌlá luhua nú rquiꞌña nú quie seña bee bene, ¿xieꞌ tiliacaꞌ bee bene Israel liꞌá nu útibeei liꞌá chela? Nu tunu nia nú quie señacuaꞌ bee bene neca nucuaꞌ nú lecaxi zibiꞌ nú unguti Jesucristo lu cruse che.
12 ¡Alaꞌ nú bee bene enu rriꞌilliꞌbi arquiꞌhua rni nú rquiꞌña nú quiee, señahua alaꞌ nú liꞌi eꞌcubeei chiecuꞌlí beei elunecachiꞌbeei!
13 Xne la nibiyaꞌ ley luhua, nu la neca equie cuendaꞌ nú la nibiyaꞌ ley luhua nú riꞌitsiahua lunú niarquiꞌhua, sino que uzecahua bee saꞌhua nu uriꞌihua elietsa lubeella.
14 Xne tunu sucuꞌla bene tucu mandamiento nú rni: “Uzeca saꞌlu tucu nú secalu liꞌilu”, che sucuꞌla bene yenú rnibiyaꞌ leyꞌ Diose.
15 Pero tunu liꞌihua rana arquiꞌhua saꞌhua nu rliunuhua saꞌhua xi rriꞌi bee nañi ubiꞌyahua liꞌihua xne canu riꞌi nucuaꞌ nú leꞌesaꞌhua.
Uhuañihua tucu nú niarquiꞌ Espíritu Santo nú huañihua.
16 Enzeꞌe nia luhua, uhuañihua tucu nú rnibiyaꞌ Espíritu Santo luhua nú huañihua. Nu scua la huañiaꞌhua lunú necha neca nuꞌ elliebacuꞌhua.
17 Xne lunú nehuañi bene lunú nechá neca nuꞌ elliebacuꞌ bene, lacane tucu nú rnibiyaꞌ Espíritu Santo nú huañi bee bene. Nu tucu nú rnibiyaꞌ Espíritu Santo nú huañi bee bene, lacane tucu nú niarquiꞌ bee bene nú huañilla. Niꞌ tucue nu niꞌ stucue la uyaꞌ saꞌe nu laca igualee, enzeꞌe liaꞌahua leca modo huañiaꞌahua tucu nú niarquiꞌtsiaꞌahua.
18 Pero tunu Espíritu Santo neca enu rnibiyaꞌ luhua che la nibiyaꞌ ley luhua.
19 Neequie achee neca nú necatsia elliebacuꞌ bee bene: Necane eluhuexe nu beenú lecaxi zibiꞌ, nu yelu clasiaꞌ bee biciu.
20 Nu rluꞌcu beei ulaꞌna lubeenú seca beei nú neca diose nu rduꞌ ixiu beei saꞌbeei, nu rliubeei, nu neyiꞌ rcuaꞌa beei. Nu terratutsia rlebeei, nu rriꞌibeei nú rleꞌe saꞌ bee bene, nu leꞌca rluꞌcubeei bee beneꞌbeei,
21 ria arquiꞌbeei, nu ruuti beei bene nu necabeei uniqui, nu racu xetaꞌ beei, nu nuꞌ beelá beenú iguale saꞌbee nucuaꞌ rriꞌibeei, ni zeca luhua stucu bese tucu nú unila luhua ante, bee bene enu rriꞌi scua leca modo chuꞌu liñibe elurnibiyaꞌ Diose.
22 Pero lunú rliquiꞌ Espíritu Santo neca nú zeca bene saꞌbene, nú ñia tsu arquiꞌ bene, nu la huañi bene cuna xuu, nú luꞌcu bene paciencia, nú ñia riꞌi bene lusaꞌ bene nu riꞌi nzeꞌca bene lusaꞌ bene nu tsaꞌalu bene stichiaꞌbene,
23 nu aca lleꞌna arquiꞌ bene, nu riꞌilla ana lu elliebacuꞌ nú necha neca, nu leca niꞌ tucu ley nú cá nú riꞌi bee bene bee nucuaꞌ.
24 Nu bee bene enu necala bee beneꞌ Jesucristo para liꞌibeella neca xi neca nú ungutila yebee nucuaꞌ, cuna yebeelá beenú nechá neca xne ungutila Jesucristo lu cruse equie cuendaꞌ ye dula.
25 Nu nee nú nzu Espíritu Santo cuna liaꞌahua rquiꞌña nú huañiaꞌahua tucu nú rnibiyaꞌnu nú huañiaꞌahua.
26 La aca nelliñaꞌahua nu la riaꞌahua nú le bene lu saꞌ bene, nu la yea arquiaꞌahua lubee saꞌahua.