3
1 Enzeꞌe chenu ulluaꞌaru eyeche Atenas chiquiꞌ niarquiꞌru riꞌiru beyaꞌ xa nucuaꞌahua, chequie uriꞌiru elliebacuꞌ nú yaꞌna liꞌitsiaru zeꞌe.
2 Nu uxeꞌlaru saꞌahua Timoteo enu neca tucu saꞌahua enu rriꞌinuru riñaꞌ Diose nú rixiuleꞌeru bedichiaꞌ nzeꞌcaꞌ Jesucristo lubee bene para nú duꞌlla ana arquiꞌhua nú tsutaꞌ arquiꞌhua lunú nzelila arquiꞌhua Jesucristo.
3 Para nú niꞌtucuhua la lacaquiehua lunú nehuana secahua, liꞌihua nediyaꞌhua nú scua riala nú zecaꞌahua.
4 Chenu ulluaꞌanuru liꞌihua udixiuleꞌeru luhua nú nzeꞌta nú chiquiꞌ huaxi nú nehuana zecaꞌahua, nu liꞌihua nediyaꞌhua nú scua ungae.
5 Nu lunú chiquiꞌ niarquia lañiahua che uxeꞌla Timoteo luhua para nú riꞌá beyaꞌ xa nzenalahua lunú nzeli arquiꞌhua Jesucristo. Xne xiquia nú cá zequienu bezeꞌlu liꞌihua, nu che xleꞌe uriꞌiru lunú uriꞌiru.
6 Pero nee nú ubenchilaꞌ Timoteo nú ubeꞌtabiꞌyalla liꞌihua, udixiuleꞌella luru nú nza nzeꞌcahua lunú nzeli arquiꞌhua Jesucristo nu xneca secahua bee saꞌhua. Liꞌilla rnilla nú yeyeꞌe ñia nzu arquiꞌhua relluꞌcuꞌ arquiꞌhua liꞌiru nu chiquiꞌ niarquiꞌhua nú alaꞌ nú ulañiꞌlaꞌhua liꞌiru nú secahua, scua tucu nú leꞌca chiquiꞌ niarquiꞌru lañiꞌru liꞌihua.
7 Enzeꞌe, bee saꞌa enu nzeli arquiaꞌahua Jesucristo añinzuca nú yelu nú seꞌcaru nu chiquiꞌ nehuana seꞌcaru, pero chiquiꞌ ñia nzu arquiꞌru ubeneꞌru nú nza nzeꞌcahua lunú nzeli arquiꞌhua.
8 Nu nee másela xilaꞌ arquiꞌru equie nú ungabiyaꞌlaꞌru nú neli nzutaꞌ arquiꞌhua nzenalahua inziuꞌ Jesucristo.
9 Enzeꞌe hasta niꞌ la llelaꞌ arquiꞌru xa deteꞌru cheꞌtsa lu Diose equie cuendaꞌhua equie nú chiquiꞌ ñia nzu arquiꞌru equie cuendaꞌhua lu Paꞌahua Diose.
10 Bichia si rulaꞌ rnacuꞌru nu sequieru lu Diose para nú zelanu nú nzelabiꞌyaru liꞌihua, nu laꞌxuru niru luhua lunú rriꞌilá nú riꞌihua beyaꞌ lunú nzeli arquiꞌhua Jesucristo.
11 Diose Paꞌahua cuna Jesucristo enu rnibiyaꞌ riꞌinu elietsa luru nú aca nzelabiꞌyaru liꞌihua.
12 Nu Jesucristo riꞌinu elietsa luhua para nú másescaꞌlá nze zecahua bee saꞌhua nu zecahua ye beelá bee bene tucu nú seꞌcaru liꞌihua.
13 Jesucristo neca enu riꞌi elietsa luhua nú tsutaꞌ arquiꞌhua riñahua lu Diose sin dula nu lecaxi nahua, bichia chenu nzeꞌta zeca Jesucristo cuna ye bee beneꞌnu.