15
Laꞌh raꞌ xaanjla Dxiohs nin nuꞌa gagaadzi luulchima raꞌ guelrzaꞌcazii raꞌ
Chiꞌchi bwaꞌahn stuhbi sehn rooꞌ llaaꞌndxibaaꞌ nin bachiꞌbi duxa naꞌh; bwaꞌhahn gahdzi xaanjla Dxiohs cun gagaadzi guelninrusaꞌcazii raꞌ nin naa luulchima ya niꞌchi naa luulchima xquelnadxyiꞌchi Dxiohs, nin gariaꞌllahn Ñiꞌh laꞌh raꞌ bwiinn guidxyiyuh. Bwaꞌha zahn tuhbi ziga nin rñah ziga ñihsadoꞌ nin naa ziga cristal nuuchin bwehla, ya garaa raꞌ bwiinn raꞌ nin ayi guzuꞌnllihbi nez loh maan rooꞌ cun ziga xfiguhra ma nee nin ayi za basaaꞌn ñicah tihxi raꞌ ba númeru, nin lah maan chi; zuu raꞌ ba galaayi ñihsadoꞌ chi, nee caꞌha raꞌ ba arpa raꞌ nin badiꞌhi Dxiohs laꞌh raꞌ ba, ya cayuꞌlda raꞌ ba tuhbi coru xteenn guehtu Moisehs nin guhca xpwiinn Dxiohs, nee cun coru za xteenn Xiꞌhyi Dxiohs; ya squiiꞌ naa coru chi:
Cohsa rooꞌ duxa naa dziꞌn nin bwiꞌhnn luꞌh Yuꞌbiluꞌh, Daada Dxiohs, nin nahpa garaatiiꞌ raꞌ guelrnabwaꞌ.
Ruhnn Yuꞌbiluꞌh ganaalla dziꞌn zaꞌca, rñiꞌ za Yuꞌbiluꞌh ganaalla dxyiꞌdxyi raꞌ nin guchii,
nee Yuꞌbi za luꞌh naa luꞌh Rehyi loh garaa raꞌ bwiinn guidxyiyuh.
¿Chyu ayi guidxyihbi yiꞌh Daada?
¿Chyu ayi guunn lasahca lah Yuꞌbiluꞌh?
Pwihsi sola yiꞌh dxiꞌh naa luꞌh saantu,
ya zieꞌbiiga raꞌ garaa raꞌ bwiinn guidxyiyuh raꞌ tin guzuꞌnllihbi raꞌ ba nez loh Yuꞌbiluꞌh,
laasii ba baluuꞌyiloh luꞌh garaa raꞌ xtsiꞌn zaꞌca Yuꞌbiluꞌh.
Ya seguihdu bwaꞌhahn nez llaaꞌndxibaaꞌ, billaala guidoꞌ saantu rooꞌ nez dxibaaꞌ hasta riuuꞌchaꞌyi tahblu dxiah nin caa lehyi. Rwaaꞌ guidoꞌ saantu rooꞌ chi biriaꞌh gahdzi xaanjla Dxiohs nin caꞌha gahdzi guelrusaꞌcazii nin dxiaaba loh guidxyiyuh. Nahcu raꞌ aanjla raꞌ chi ganaalla lahdxi labweh raꞌ nin rcaꞌbachaꞌh raꞌ za lahdxi chi, neezaa nuu tuhbigah raꞌ cinturohn nin naa cun ohro lastoꞌ raꞌ aanjla raꞌ chi. Ya chiꞌchi loh gadaapa raꞌ nin naa ziga maan nabahan raꞌ nin nuu loh Dxiohs dxibaaꞌ, ya tuhbi maan raꞌ chi badiꞌhi tuhbigah cohpa laꞌh cada tuhbigah aanjla raꞌ nin naa gahdzi chi, ya cohpa raꞌ chi naa raꞌ ganaalla ohru, ya laꞌn cohpa raꞌ chi nuu guelguxchisi xteenn Dxiohs nin banabahan par tuꞌpazi. Ya laꞌn guidoꞌ saantu rooꞌ chi gwadxahan guhxa nin naa guelñaꞌñih cun xquelrnabwaꞌ rooꞌ Dxiohs, ya ayi chyu guhcatiiꞌ ñiuꞌtiiꞌ laꞌn guidoꞌ saantu rooꞌ chi hasta que noyi chaꞌloh gagaadzi raꞌ guelrusaꞌcazii raꞌ nin caꞌha gagaadzi raꞌ xaanjla Dxiohs.