20
Masidonia le Grik raang lang
1 Khuachung letei hnahnawhnah cawh a de taitah, hningzuitu sahlo khah Paul tah bia caw he ka, thawzaang a peh khy tai he tah a dang pawtah ung my lo tah he ka, Masidonia raang lang sei pawtah a tho.
2 Ma pai chung leco tlawnglai ka, zingtu sahlo khah pasynah bia a hlupui ching he ka, a hning tah Grik raang cawh a va phah.
3 Ma leco thlah thung caang ka, Siria raang lang khah tuilawng tah sei pawtah a pachia ning tah Juda cawngsaw thaikhehpaw tah thaw aa pa za tahpaw khah a thuinah cawtah Masidonia raang chung khei sei kaw a pachia.
4 Paul cawh Beria khua cawngsawpaw Pirha a sawcapaw Sopater le Thesalonika khua taitah Aristarka le Seikanda, Derbe khuapui taitah Kaia le Timote, Asia raang taitah Taikhika le Trofima tahpaw sahlo takhei aa zui lai.
5 Aaning sahlo heh hmelang seihlang he ka, Troas khua letah aa ma haw.
6 Mataico, kaaning cawh Thino pahlawh lypaw Very Panaw khy taikhei Filipi khua taitah tuilawng tah sei he peh ka, ningpangaw khy tah Troas khua leco a sei hlangpaw sahlo cawh va pange he peh ka, ma leco ning sarih ka caang he peh.
Troas khua letah Zutikha cawh thihnah taitah a tho kaw
7 Zaa kheh letei hmetaw caipaw a cangpaw ning letah Abuipaw zairia a hrong pawtah kaaning cawh kaa va chua. Paul tah zawpuipaw khatah bia rei ka, aningthlamongpaw letah sei a pachia cawtah zaicing tai bia a rei.
8 Ka pahmonah pawhe peh a cungkhang leco me-ing ahlupui khah aa vang.
9 Thlalang ingkaw leco Zutikha aa tahpaw satlepaw cawh a ty thlang ka, Paul tei bia a reipaw khah a sy tunah cawtah a meh ku ngetei ka, a hning taco a ihning pai ka, ing dawh thungpaw thlalang ingkaw taico alui lang cawh tlahthlah ka, aa lah ning tah a thi thah.
10 Paul cawh cungthlah ka, satlepaw cawh va pazah ka, a va pongchai. Taico zawpui khah, “Naa thlawzawng kheh seh, a hring thlang hi!” a tah he.
11 Mataico Paul cawh ka ke kaw ka, Abuipaw zairia cawh tingtua he ka, aa e. Khua dui ky tai bia cawh rei ka, a rei khy taico a piathlah.
12 Zawpui taco satlepaw cawh ing lang khah hring dang pawtah seikhui he ka, thlawlung teitah aa ung.
Paul tah Efesa khuapui letei macang sahlo khah a dang pawtah a tah he
13 Paul cawh tlanglang tah Asos khua lang sei a pachia. Kaaning cawh tuilawng tah Asos khua lang seihlang peh ka ma khua leco a ma phah.
14 Mataico, Asos khua leco a va ma tong khy taitah tuilawng cung lang cawh ke he peh ka, Mitilin khuapui lang cawh kaa sei.
15 Aningthlamongpaw cawh ma khua taico tuilawng tah sei he peh ka, Khio tuiraw raechai khah kaa va phah. A ningthlamongpaw leco Samos tuiraw lang cawh sei he peh ka, a hazainingpaw leco Mileta khuapui cawh kaa va phah.
16 Pentikos Panawnah ning khah a ne cawtah khei Paul cawh Jerusalem khuapui khah phah tlamang du ka, Asia raang chung letah cai pachang ly rua pawtah khei Efesa khuapui cawh tuilawng tah khungsai pawtah a pachia.
17 Mileta taico Paul takhei Efesa khuapui letei khrisawbu macang sahlo khah bia a caw he.
18 Mataico aa va phah tihtah aa hai leco, “Asia raang chung ka va phah taw ning taitah naaning kha ka ung chung vytei khah zemaw ka tua tahpaw cawh naa hni thlangpaw a cang.
19 Juda cawngsaw sahlo tah thaw pawtah aa pa ruiphiapaw tahei ruhanah a pa peh naná teitah Abuipaw rai cawh a pany ngetei tah le mehthli cho tah ka hre.
20 Naaning naa cawtah a chahnaipaw a cangpaw Khazing bia vytei naaning ching rua pawtah dethlang lytah ka ungpaw khah hnih he ceh ka, zawpui thuí tah cawngpah he neh ka, ingkheh khy ingkheh ka cawngpah laipaw he zong khah naa hni.
21 Juda cawngsaw sahlo kha Grik cawngsaw sahlo kha, a ngepachih hmotah Khazing pange la, kaa Buipaw Zisu cawh zing my lo, tatah ka cawngpah he.
22 Taico, atoheh cawh Thlawpaw Pathai langhruinah zui tah Jerusalem lang sei a neh ka, ma lekhei ka cung letah zehming maw a tlung a tahpaw cawh hnih bei neh.
23 Khua ting maikaw letah thongtlahnah le ruhanah ka tong a tahpaw suipaw heh Thlawpaw Pathai hnisahnah thongtah ka hnipaw a cang.
24 Canghrasala, Abuipaw Zisu tah a pakhingpaw rai Khazing ningdonah thawngchawbia y khui rai heh ka paling tei, a saipasinah heh ka patlung khy pawtei a cang caco, ka cung letah zehming a tlung zong tah ka ze a pui beh.
25 Khazing painah raang kong phung ka reipaw a thuipaw naaning vytei tahei pa hmuh khaw bei ceh taheh atoheh ka hni myca.
26 Macawtaco, naa hrong letah pakhehkheh a thlary a thih caco, kama cawh mochiapaw cang bei neh taheh naa hai letah atoning lehei ka rei.
27 Zecawtamaw tatah Khazing dunah khah achangdiná tah ka ca ching thlu thah he.
28 Naaning teitah a vai la, naa mingkai ruapaw tei Thlawpaw Pathai tah a ca pehpaw he tuurung sahlo khah achaw teitah mingkai my lo. Khazing tah Ama a thisai tei a cawhpaw a khrisawbu a kingtu tuuking cang my lo.
29 Ka sei hning tah a hrangpaw chahnia hratah a cangpaw cawngsaw naa hrong letah va chua he ka, tuurung khah hua bei he tahpaw ka hni.
30 Naaning chung lilaw tai tahmai tah hningzuitu sahlo khah kaaning lang a bai na he seh tatah biahmuisui khah aa pachia a.
31 Macawtaco a vai my lo! Kung thung chung ching kha zai kha tai lytah ka mehthli khatei zekhah tamaw raering ka ca peh he tah khah monghly khe lo.
32 Atoheh naaning a ca tua hry khypaw he le mehpathai vytei hrong letah bonghnang ry a ca pei khypaw he Khazing le a ningdonah bia letah ka ca vosah myca he.
33 Kama cawh aho aa sui, aa ngung, aa chaichi zong khah iavawnah hnui bei neh.
34 Kama leh ka kih tei hei ka hiapaw le ka vesaw sahlo aa hiapaw cawh ka chuakhui thlang tahpaw cawh naaning tah naa hni thlangpaw a cang.
35 Thawzaang a diapaw sahlo khah bawkhang pawtah a thaw tah rai naa hrepaw a cang tah cawh ka rai hrepaw vytei khei ka ca hmuhsah he. Abuipaw Zisu hrahring tah, ‘Hmuhnah navy co pehnah letah bonghnang a ung vy,’ tatah a tahpaw khah a thui thlang mylo,” tatah a tah he.
36 Ma bia a rei khy taihei aaning sahlo khaco a khuh panai he ka, thlaw aa chang.
37 Aa caw hmo khei Paul cawh a pawngchai he ka, ama cawh aa hnang.
38 Pa hmuh khy khaw bei ceh, tatei a tahpaw he bia takhei aa nge a chiasah ngetei he. Mataico tuilawng tai khah aa va chuithlah.