3
Piter tah a phesongpaw a dangsah
1 Ningkheh cawh Piter le Johan cawh behnah ing letah thlawchang pawtah thlawchang cai zailang suimehlang pathung leco aa sei.
2 A no chungpi tah lang a sei khy lypaw, a phesongpaw pakheh khah behnah ing hawkaw, “A ngepaw,” aa tahpaw leco a va song he ka, aa chia. Behnah ingdung chunglang a seipaw sahlo letah kih do na he seh tatah ma leco ning tating tah aa chiapaw a cang.
3 Piter le Johan khah behnah ingdung chunglang a va naepaw he cawh hmuh ka, aaning cawh tangka a hae he.
4 Piter tah ma cawngsawpaw cawh taa ky tah mingchai ka, Johan zong tah a mingchai hrah. Taico Piter taco, “Ma mingtua,” a tah.
5 Ma cawngsawpaw taco sangkheh kheh pui aa pa pae kata tahpaw rawhnah hnui ka, a hnabei a sui.
6 Mataico Piter taco, “Sui le ngung hnui bei neh, canghrasala ka hnuitlakangpaw tei ka ca peh. Nazaret Zisu Khri ming tah tho la sei,” a tah.
7 A cacang lang kiá tah tlechui ka, a patho. Taico sung sungkheh tah a phe le a phelaby thaw cawh a ka tlung palang.
8 A pathlo ka, lang a sei pai. Taico, Khazing reithainah cung tah seipai lai a pathlo pai lai ka, behnah ingdung chunglang cawh Piter le Johan khatah a nae hrah.
9 A seipai tei Khazing a reithai laipaw khah cawngsaw vytei tah aa hmuh tihtah,
10 ma cawngsaw heh behnah ing, “Hawkaw a ngepaw,” aa tahpaw letei a kih a do teipaw khah a cang tahpaw aa hni. A cung letah zehming maw a tlung siama tu, tah he ka, aa ningang ka, aa khuarawh a haa cehceh.
Piter tah zawpui kha bia a rei
11 A phesongpaw tah Piter le Johan cawh a kiá tah a bang thlangning he takhei, cawngsaw vytei cawh aa khuarawha ngetei ka, aaning lang, Solomon dungkalung aa tahpaw lang khah a va sai he.
12 Piter tah ma cawh a hmuh tihtah aa hai letah, “Israel cawngsaw sahlo, zecawtamaw naa khuarawh a haa? Kaaning kaa hmingtuakhynah le Khazing lung aa tongnah cawtah ma cawngsaw kheh lang aa seisah khi tahpaw phing hratah zecawtamaw naa ningang raruá tah naa ma ming thlang!
13 Abraham, Isak le Jakob aa Khazing, kaa mapaw sahlo aa Khazing tah a sae Zisu cawh a rungnaw sahpaw a cang hi. Ama cawh thaw rua pawtah pei he ceh ka, Pilat tah chuasah a du tahmai tah a hme letah naaning tah naa hlawh kho.
14 Mehpathai le Mehding a cangpaw khah hlawh he ceh ka, mehsua lenongpaw khah, ma chuapah hri law naa tah.
15 Hringnah hrangpui khah theh he ceh ka, canghrasala Khazing tah thihnah taitah a patho kaw. Ma kong cawh kaaning sahlo heh a hnihtu ka cang he peh.
16 Zisu ming zingnah thongtah ma naa hmuhpaw le naa hnipaw cawngsaw heh dangsah a cang myca hi. Zisu ming zingnah takhei ma cawngsaw heh a pungpaluh tah a dangsah myca hi, naaning zong tah naa hmuhpaw hrahei.
17 Uny sahlo, ma hming heh naa hruitu sahlo hratah naa hnilynah cawtah naa tuapaw a cang tahpaw ka hni.
18 Canghrasala Khazing taco a khuavang vytei hmang tei Khri cawh a taithui a tatah a za reihlang ciapaw bia khah a tlingsah myca.
19 Macawtaco naa suanah a ngepachih la, Khazing lang a hui tua o, taico naa suanah pathaisah pah cang he ceh ka, Abuipaw taitah thawzaang tha lahnah cai va chua ka,
20 Khri cawh a va cathlaw pá he a, naa caw tei rawhpaw Zisu ceingei khah.
21 Khazing tah a khuavang mehpathai sahlo hmang tah khuahlai ning tah bia a kangpaw hrakhei hming zezong a thapaw tah tua cai a phah hlai vytei cawh Zisu cawh vaicung letah a ung cawngpaw a cang.
22 Moses zong tah, ‘Abuipaw naa Khazing tah kama hapaw khuavang heh naaning hrong taitah a chuasah tae a, Ama tei a ca chingpaw he bia maikaw cawh nge my lo.
23 Ahohmai a biareipaw a nge lypaw maikaw cawh a mingphing taikhei hlyde a cang a,’ a tah.
24 A cang, Khazing khuavang vytei, Samuel taitah a patho katei, aa dawngkasawny tah aa reipaw cawh atoning tei hming a cangpaw kong heh aa reihlangpaw a cang.
25 Naaning cawh Khazing tei naa mapaw sahlo khatah a tuapaw biataipaw ry cytu le Khazing khuavang sahlo pathlah cawh na cang he ceh. Khazing tah Abraham hai letah, ‘Na chungchuh ci le phing thongtah aluicung cawngsaw vytei heh bonghnang song a cang tae he a,’ tatah a tah.
26 Khazing tah a saecapaw cawh patho ka, naaning khatah a va thlaw tawpaw cawh naa suanah taitah a palehsah tah bonghnang song a ca dunah caw he tah a cang,” tatah a tah he.