6
Zingtu hrong letah taza a cuinah
Naaning pakheh le pakheh na hry tih he ceh tah mehpathai sahlo hme letah a chuakhui lytah zecawtamaw lawki biacetu sahlo hme letah na chuakhui zia he ceh? Mehpathai sahlo tah Khazaw cawngsaw heh bia aa ce he a tah hnih thlang bei he ceh maw? Khazaw hmai heh bia a cepah ruapaw naa cang tlung pawtah a teituipaw bia cawh cepah khy bei he ceh maw? Vaiming sahlo hmai bia kaa cepah he tah hnih bei he ceh maw? Ma kaa hringchung hming sahlo chichipaw heh cawh kaa cepah ruapaw pui a cang caw! Macawtaco, ma hapaw a hrychaenah kong a ung caco, khrisawbu chung letei cawngsaw cakhawngpaw naa tahpaw he sahlo tei hmai khah biacetu tah naa thia bei he! Naa ningzeh seh ka tah cawtah ma heh ka reipaw a cang. Zingtu pakheh le pakheh kaa letei a hrychaenah cepá pawtah naa hrong letah mehsing ung ly tamaw naa ung? Canghrasala, ma hraco cang lytah uny pakheh tah pakhehpaw khah a zing lypaw sahlo hme leco taza a va cui laky thlang!
Naa hrong letei tazacui naa hmangpaw hrahring tahei naa pá caimang tah a langsah. Na pá tahmai tah naa cawtah chah vy bei maw? Naa hming aa ca chu tahmai he tah naa cawtah chah vy bei maw? Naaning lilaw a dungkhei he ceh ka, ahmang lypaw hming khah naa tua, taico ma cawh naa uny sahlo cung lekhei naa tua.
Mehchaw ly cawh Khazing painah raang ry cy bei he tahpaw hnih thlang bei he ceh maw? Naaning le naaning a dungkhei khe o. Canu capaw suaná tei chahlynah a tuapaw, nono a behpaw sahlo, a pheilaipaw sahlo, capaw hlohlangpaw sahlo, capaw leihopaw sahlo, 10 mehru sahlo, a du a sahpaw sahlo, zurui a hmangpaw sahlo, kongchia rei a hmangpaw sahlo, mehing mehru sahlo taco Khazing painah raang letah a nae khy bei he. 11 Taico, ma cawh naaning thaikhehpaw naa cangning a cang. A cang naná tah Abuipaw Zisu Khri ming tah le kaa Khazing Thlawpaw tah sipathai ciapaw le pathaisah ciapaw le thaicangsah ciapaw na cang he ceh.
Canu capaw a pheilanah
12 “Kama ka caw taco hming maikaw tua heh sai ka cang thlang,” canghrasala hming maikaw heh ka cawtah chah thlu be. “Kama cawh hming maikaw tua heh sai ka cang thlang,” canghrasala ze sae tahmai tah a tua bei neh. 13 “Batui cawh pori cawtah cang ka, ri cawh batui cawtah a cang.” Canghrasala Khazing tah a sanghning co, a ro va vei he a. Pung cawh canu capaw a pheilanah suanah tua rua pawtah tuapaw cang be, Abuipaw a cawtah tuapaw cang ka, Abuipaw cawh pung cawtah a cang. 14 Khazing tah a hmingtuakhyná khei Abuipaw Zisu cawh thihnah taitah patho ka, Ama taco kaaning zong a ma patho hrá a. 15 Naa pung cawh Khri pung a caibai a cang tahpaw hnih bei he ceh maw? Ma Khri pung a caibai a cangpaw cawh maw law neh ka, a leizuano khaco ka va pahlawng a? Nese! 16 A leizuano khatei a ung hruipaw cawh ama khaco pungkheh a cang he tah hnih bei he ceh maw? Capathai leco, “Aa pahning tah ngaisaw pungkheh a cang he,” tatah a cia hi. 17 Canghrasala, Abuipaw khatei a pakongpaw cawngsaw cawh Ama khaco Thlawpaw letah pungkheh a cang he.
18 Canu capaw a pheilanah khah saisai my lo. Cawngsawpaw tei a tuapaw ahringpaw suanah sahlo cawh ama a pung a lai lang letah a tuapaw cang ka, canghrasala canu capaw a pheilanah a tuapaw duitei taco, ama a pung chung letah a tuapaw a cang. 19 Naa pung cawh Khazing taitah naa hmuhpaw, naa chung letah a ungpaw Thlawpaw Pathai behnah ing a cangpaw khah hnih bei he ceh maw? Naaning naa tei cang bei he ceh, 20 amai a rupui tah cawh ciapaw na cang he ceh. Macawtaco naa pung khei Khazing khah pasungpanaw my lo.
6:16 Atho 2:24