1 परमप्रभु यावे आ दाक्‍शो पा ख्रीस्‍त येसु आ सोइश्‍शो गो पावल नङ। इं लोक्‍ब तिमोथी नु गोमी कोरिन्‍थ सहर ङा परमप्रभु यावे कली थमा सुइश्‍शा ग्रुम्‍ब इन कली नु आकाया रागीम बाक्‍ब थमा सुइक्‍ब नेल्‍ल आन कली एको चिठी ब्रेक्‍शा सोइक्‍ताक्‍स्‍कु। १कोरिन्‍थी १:१ 2 इं आफ परमप्रभु यावे नु प्रभु येसु ख्रीस्‍तमी इन कली शिशी पा इन थुं नाइश्‍शा बाक्‍चा गेम्‍सेक्‍ल।

3 इं प्रभु येसु ख्रीस्‍त आ आफ परमप्रभु यावे कली “गे रिम्‍शो पाइब ननी” देंशा ठेयब सेल्‍नीकी। मारदे हना मेको शिशी पाइब आफ, थुं नाइक्‍पाइक्‍ब नु थुं बारपाइक्‍ब परमप्रभु यावे बाक्‍ब, दे तुइक्‍नीकी। रोमी १५:५ 4 गो शुश श्‍येत जकानु, परमप्रभु यावेमी आंइ थुं नाइक्‍पाइश्‍शा बारपाइक्‍ब। मिनु आंइ थुं नांइ‍सीशा, गोपुकीमी यो श्‍येत जाइब आन कली आन थुं नाइक्‍पाइश्‍शा, बारपाइक्‍ने चाप्‍नीकी। 5 ख्रीस्‍त आ नेंमी गिश श्‍येत जाइनीकी, मिश ख्रीस्‍त आ नेंमी थुं नाइक्‍पाइक्‍चा पुंइसीनीकी। भजन संग्रह ३४:२०; रोमी ८:१७; भजन संग्रह ९४:१९ 6 आंइ श्‍येत जशोमी इन थुं नाइक्‍पाइक्‍ब। मिनु रिम्‍शो दुम्‍ब। गो आंइ थुं नाइक्‍पाइक्‍चा पुंइसीशोमी गे इन थुं नाइक्‍पाइक्‍चा पुंइसाक्‍नी। गे आंइ खोदेंशो दुम्‍शा, श्‍येत फाल्‍शा बाक्‍तीनी हना, गे आंइ खोदेंशो पा थुं नाइक्‍पाइक्‍चा पुंइसीनीनी। २कोरिन्‍थी ४:८-११,१५ 7 आंइ जशो श्‍येत गे यो जाइनीनी। मिनु आंइ खोदेंशो पा थुं नाइक्‍पाइक्‍चा पुंइसीनीनी। आंइ खोदेंशो पा, थुं नाइक्‍पाइक्‍चा पुंइसीनीनी, दे तुइश्‍शा, आस पचा मप्रोंइथु बाक्‍नीकी।

8 आंइ दाक्‍शो लोक्‍बपुकी, एसीया रागीमी बाक्‍कानु, शुश श्‍येत जाइतक। श्‍येत जचा आ पर्बम लोव़ मख्रुइक्‍थु, तुइक्‍पाइक्‍नन्‍नी। आंइ जशो श्‍येत मार बाक्‍ब देंशा हना, बेक्‍चा ङा सम्‍म दुम्‍शो नकी। प्रेरित १९:२३-४०; १कोरिन्‍थी १५:३२ 9 साइक्‍चा पुंइसीशो खोदेंशो दुम्‍तक। मो दुम्‍तक हना यो “परमप्रभु यावेम बेक्‍शो मुर आन कली सेंब। मोपतीके मेको कली थमा सुइय्‍य। मेको क्‍येङा लाक्‍शा सुइमी इं कली प्रोंइने मचाप्‍नीम” दे मिम्‍शा बाक्‍तक। 10 मिनु परमप्रभु यावेमी मोदेंशो बेक्‍चा ङा दुम्‍शो रे प्रोंइतीकी। मिनु मुल नोले यो आंइ कली श्‍येत रे प्रोंइब, दे तुइक्‍नीकी। 11 मोपतीके परमप्रभु कली “श्‍येत रे प्रोंइयीकी” दे पुंइना पुंइन बाक्‍नीकी। मिनु गेपुकीमी यो “पावल नु आ वारच आन कली श्‍येत रे प्रोनीन” दे पुनीने। नोले आंइ कली श्‍येत रे प्रोंइशो तशा, शुश मुरुमी “गे रिम्‍शो पाइब ननी, आंइ पुंइशो गेतीकी, रिम्‍शो पाइतीनी” दे परमप्रभु कली ठेयब सेल्‍नीम, दे तुइक्‍नीकी। फिलिप्‍पी १:१९

12 गो आंइ नें बोरपा बाक्‍नीकी। मारदे हना परमप्रभु यावेमी सक्ति गेतीकी। मिनु मेको आन मुर दुम्‍शा, मुर नेल्‍ल आन कुल, इन कुल यो रिम्‍शो थुं रे पा गेय कोंइताक्‍क। आंम आंइ रागी ङा जोक्‍तीक तुइक्‍तीक रे ममाइ। तन्‍न परमप्रभु यावे आ शिशीम पतीके बाक्‍ब। २कोरिन्‍थी २:१७; हिब्रू १३:१८; १कोरिन्‍थी १:१७ 13 मिनु गो इन कली नेल्‍ल रुप्‍चा ङा नु पढेचा ङा लोव़ ब्रेक्‍नीकी। मुल गे नेल्‍ल रुप्‍तीनी, दे गो आस पाइनुङ। 14 गे दोपा आंइ पर्बम इन नें बोरपाइक्‍ने चाप्‍नीनी, मोपान इं प्रभु येसु आ नाक्‍ती जाक्‍मेनु, गोपुकीमी इन कली तशा, आंइ नें बोरपाइक्‍ने चाप्‍नीकी। २कोरिन्‍थी ५:१२; फिलिप्‍पी २:१६

15 मारदे हना गो मेको नेल्‍ल तुइक्‍ताक्‍ङ। गे शुश ग्‍येरसीशा बाक्‍कीन, दे ङोंइती इन बाक्‍तीके जाक्‍चा मिम्‍ताक्‍ङ। 16 गो मासीडोनीया लङानु, इन कली ग्रुम्‍नुङ। मिनु मासीडोनीया रे लेङङानु, इन बाक्‍तीके जाक्‍नुङ। मिनु गेपुकीमी आं कली यहूदीया रागी सम्‍म चोक्‍नीनी, दे आस पाता। १कोरिन्‍थी १६:५-६ 17 मोदेंशो आस पा, मरिम्‍शो पङा ङा? मार, मोदेंशो मिम्‍शा, रागी ङा मुर खोदेंशो पङा ङा? मार मेको आन खोदेंशो काइले ना दुम्‍बा, काइले ना मदुम्‍बा देंन ङा? 18 परमप्रभु यावेमी आ देंशो खाप्‍ब, दे नेल्‍लेम तुइक्‍नीम। गोपुकीमी इन कली देंशो लोव़ थमान बाक्‍ब। दुम्‍बा कों, मदुम्‍बा कों, मार तुइक्‍चा देंशो लोव़ दुम्‍सीन मदुम्‍ब। 19 सिल्‍वानस, तिमोथी नु गो सांफामी इन कली परमप्रभु यावेमी आ तौ येसु ख्रीस्‍त आ लोव़ नेंपाइक्‍तक। मेको लोव़ थमा दुम्‍बा कों मदुम्‍बा, मार तुइक्‍चा देंशो लोव़ ममाइ। येसु ख्रीस्‍त थमा बाक्‍ब। प्रेरित १८:५ 20 परमप्रभु यावे आ गेशो लोव़ नेल्‍ल येसु ख्रीस्‍तमी खाप्‍तु। मोपतीके गो मेको आ नेंमी आमेन देंनीकी। मिनु परमप्रभु यावे कली “ठेयब बाक्‍नीनी” दे ठेयब सेल्‍नीकी। प्रकाश ३:१४ 21 परमप्रभु यावेमी आंइ कली नु इन कली ख्रीस्‍तमी काथा वोइश्‍शा, आ मुर दुम्‍पाइक्‍तु, आ गेय पाइब सेल्‍तु। १यूहन्‍ना २:२७ 22 मेकोमी इं कली छाप थोक्‍ताक्‍व। मिनु आ सोक्‍त इं थुंमी वोइक्‍तु। मेको सोक्‍त बैना खोदेंशो पा गेप्‍तु। एफिसी १:१३; २कोरिन्‍थी ५:५; रोमी ८:१६

23 परमप्रभु यावे कली सांकछी वोइश्‍शा, इन कली थमा पा देंनुङ, गो इन कली हुइक्‍चा कली कोरिन्‍थ मजाक्‍ङ। 24 गो इन थमा सुइक्‍तीके कली हुकुम मपाइ‍नीकी। इन ग्‍येरसीचा ङा पा, गे नु गेय पाइनीकी। मारदे हना इन थमा सुइक्‍तीके बोल्‍यो बाक्‍ब। २कोरिन्‍थी ४:५; १पत्रुस ५:३