हिब्रू
ब्रेक्ब मुर: एको किताब पावलम ब्रेक्शो बाक्ब, दे शुश मुरुम मिम्नीम। तन्न का निक्शीमी लूका, का निक्शीम बारनाबास, का निक्शीम आपोल्लोस आ ब्रेक्शो बाक्ब, देंनीम। साइ ङा जोक्ब तुइक्बमी “हिब्रू किताब सुमी ब्रेक्शो बाक्बा, परमप्रभु यावेम ला तुइक्ब” दे ब्रेक्ताक्म।
गेना ब्रेक्शो: एको किताबमी यरूसलेम सहर खतम दुम्शो आ पर्बम मारेइ मब्रेक्शो बाक्त। मारदे हना तिमोथी आ पर्बम लोव़ ब्रेक्शो बाक्ब। मिनु तिमोथी ८१ ए. डी. रोमी सिजर दोमीतीयन आ सासनमी थमा सुइक्चा आ पर्बम साइक्चा पुंइसीशो बाक्त। मोपतीके ६३ नु ७० ए. डी. रोम रे ब्रेक्शो बाक्ब, देंनीम।
मार ब्रेक्शो:
१. एको किताब ङा शेंतीक लोव़: परमप्रभु यावे आ लोव़ पाइब क्येङा येसु ख्रीस्त ठेयब बाक्ब।
परमप्रभु यावे आ स्वर्ग ङा गेय पाइब क्येङा येसु ख्रीस्त ठेयब बाक्ब।
मोसा क्येङा येसु ख्रीस्त ठेयब बाक्ब।
हारून क्येङा येसु ख्रीस्त ठेयब बाक्ब।
मेल्कीसेदेक नक खाल ङा चढ़ेब बाक्ब।
२. एको किताब ङा पतीक लोव़:
मुर नेल्ल नु दुशा बाक्चा।
थमा सुइक्ब लोक्ब आन कली दाक्चा मप्रोनीन।
1
ङोंइती ङा लोव़
1 साइ नेसी परमप्रभु यावेमी आ लोव़ पाइब आन कली मार मार पपाइश्शा नु कोंइशा, इं किकी पिपी नु लोव़ पाइबाक्माक्त। 2 नोले ङा नाक्ती आ तौ रे पा इं कली लोव़ पाप्तु। आ तौ कली नेल्ल अधिकार गेशो बाक्त। सरीङ नु रागी नेल्ल आ तौ रे पा सेला बाक्त। भजन संग्रह २:८; यूहन्ना १:३; कलस्सी १:१६ 3 आ तौ आ आफ आ सक्ति नु छेङछेङ बाक्ब। मिनु आ सक्ति ङा लोव़ पतीकेमी नेल्ल आन कली कोव़ना कोव़न बाक्ब। मेकोमी पाप क्याम्तीक गेय पने थुम्शा, नेल्ल क्येङा ठेयब मान ताइब आ ग्युरा गे निश्शो बाक्ब।
स्वर्ग ङा गेय पाइब नु येसु
4 परमप्रभु यावे आ स्वर्ग ङा गेय पाइब आन क्येङा आ तौ ठेयब बाक्ब। मिनु मेको आन क्येङा ठेयब नें तशो बाक्ब। १पत्रुस ३:२२; फिलिप्पी २:९ 5 परमप्रभु यावेमी आ स्वर्ग ङा गेय पाइब सु कली चहिं “गो इ कली थिंतन। मोपतीके गे आं तौ नवे” देंम ङा? मिनु “गो मेको आ आफ दुम्नुङ, मेको चहिं आं तौ दुम्ब” देंम ङा? भजन संग्रह २:७; २सामुएल ७:१४ 6 आ ङोंइती जरमेशो तौ कली रागीम सोइक्तानु “आं स्वर्ग ङा गेय पाइब नेल्लेमी मेको कली मान पा ठेयब सेल्मेक्ल” देंत। भजन संग्रह ९७:७; रोमी ८:२९ 7 परमप्रभु यावेमी आ स्वर्ग ङा गेय पाइब आन पर्बम “आं स्वर्ग ङा गेय पाइब आन कली फश नु ब्रशो मी सेल्नुङ” देंत। भजन संग्रह १०४:४ 8 तन्न आ तौ आ पर्बम “इन राज्य पचा गेना हना यो लीब। इन राज्य ङा राज दन्ड ठीक निसाफ पतीके राज दन्ड बाक्ब। 9 ठीक गेय पतीके दाक्नीनी। मरिम्शो पतीके मदाक्नीनी। मोपतीके परमप्रभु, इन परमप्रभु यावेमी इन पियामी तेल ख्रेक्शा ग्येरपाइक्तु। इन वारच आन क्येङा इन कली ठेयब सेल्तु” देंत। भजन संग्रह ४५:६-७ 10 अरु लोव़मी यो “प्रभु, गे नेल्ल क्येङा ङोंइती रागी ङा जग वोइक्तीनी। मिनु सरीङ इन गुइ ङा गेय बाक्ब। 11 मो हना यो मेको नेल्ल मलीनीम। गे चहिं गेना हना यो बाक्नीनी। सेल्शोपुकी माइत वा खोदेंशो पा जेक्शा लाइनीम। 12 फेक्तीक वा मुक्शो खोदेंशो पा, मेको आन कली मुक्नीनी। वा फाइश्शो खोदेंशो पा, मेकोपुकी फांइसीनीम। गे चहिं गेनायो मफांइसीथु गेना हना यो बाक्नीनी” देंत। भजन संग्रह १०२:२५-२७ 13 परमप्रभु यावेमी आ स्वर्ग ङा गेय पाइब सु कली “इ जोरी सत्रु आन कली इ खोइल आगामी मवोदुमी सम्म आं ग्युरा गे बाक्को, देंम ङा? भजन संग्रह ११०:१ 14 मेको गेय पाइब सोक्त मनमी ङा? मिनु आन पाप क्याम्चा पुंइसीब आन कली वारच पथ सोइश्शो मनमी ङा?” देंत। भजन संग्रह ३४:८; भजन संग्रह ९१:११-१२