येरमीया
ब्रेक्ब मुर: एको किताब येरमीयाम ब्रेक्शो बाक्ब। पिप योयाकीमम आ हुकुम पची ना येरमीयामी आ लोव़ नेल्ल आ ब्रेक्ब मुर बारुक कली ब्रेक्पाइक्तु। साइ ङोंइती रे यहूदी नु ख्रीस्तीयन नेल्लेम मेको किताब येरमीया आ ब्रेक्शो बाक्ब, दे तुइक्नीम।
गेना ब्रेक्शो: मेना अस्सुर रागी खतम दुम्त। मेदी नु कल्दी ङा मुरपुकीमी अस्सुर ङा ठेयब सहर निनवे कली लडाइ पा ग्रातेक्म। मिनु मेको रागी आस दातेमी योक्साक्स। ६०९-६०६ बि. सी. मेर पिप नेबुकदनेसरमी इजीप्त कली लडाइ पा ग्रात। नोले ङोंइती ङा यहूदी आन कली ग्याइश्शा लाइक्तीके बाक्त। मेको ६०६ बि. सी.म बाक्त। मेको आ नोले ङा ग्याइश्शा लाइक्तीक ५९८ बि. सी.म बाक्त। मिनु नेल्ल क्येङा नोले ङा ग्याइश्शा लाइक्तीके ५८६ बि. सी.म बाक्त।
मारदे ब्रेक्शो: यहूदा ङा मुर परमप्रभु गे मलेत्तेम हना, निसाफ पचा पुंइसीनीम। यरूसलेम सहर फ्रुचा पुंइसीब। मिनु नोले थुं बारपाइक्तीके लोव़ शुश ताइब। मिनु इस्राएली मदुम्शो अर्को रागी ङा मुर यो मेको नक कबल ङा शिशी ताइब दुम्ने चाप्नीम।
1
येरमीया सु बाक्म
1 एको चढ़ेब हिल्कीयाह आ तौ येरमीया आ लोव़ बाक्ब। मेको बेन्यामीन आ रागी अनाथोथ सहरम बाक्शो बाक्त। येरमीया ११:२१; यहोसु २१:१८; ब्यवस्था ३३:३२ 2 यहूदा ङा आमोन आ तौ पिप योसीयाहम सासन पवा आ १३ बर्समी परमप्रभु यावेमी येरमीया कली लोव़ पाप्तु। २राजा २१:२४; २राजा २२:१ 3 मिनु यहूदा ङा योसीयाह आ तौ येहो-याकीम आ पाला नेल्ले नु यहूदा ङा योसीयाह आ तौ सिदकीयाहम सासन पवा आ ११ बर्स ङा ५ महिनाम परमप्रभु यावेम येरमीया कली लोव़ पना पन बाक्त। मेना यरूसलेम ङा मुर ग्याइश्शा लाइक्चा पुंइसीशो बाक्तेक्म। २राजा २३:३४; २राजा २४:१७; २राजा २५:२-२१; येरमीया ३९:९
येरमीया कली ब्रेश्शो
4 मिनु परमप्रभु यावेमी आं कली मार लोव़ पाप्तु देंशा हना, 5 “गो इ कली कोव़जीम जोल्चा क्येङा ङोंइती तुइक्ताक्ङ। गो इ कली जरमेचा क्येङा ङोंइती योव़शा तिल्तन। मिनु इ कली रागी रागी ङा मुर आन कली आं लोव़ पाइब सेल्तन” देंत। यसैया ४९:१; गलाती १:१५
6 मिनु गो “परमप्रभु, परमप्रभु यावे, गो दोपा ब्वाक्चा माल्नुङा, मजोक्नुङ। गो आलन बाक्नुङ” देंती। प्रस्थान ४:१०; यसैया ६:५-७ 7 तन्न परमप्रभु यावेमी आं कली “गो आल बाक्नुङ मदेनो। गो इ कली सु सु आन बाक्तीक सोइक्नना, मेकेर लचान माल्नेवे। मिनु गो इ कली मार अरेङा, मेको देंचा माल्नेवे। 8 गे मेको आन क्येङा महिनो। मारदे हना गो इ कली प्रोंइचा कली गे नु बाक्नुङ” दे परमप्रभु यावेमी देंत। प्रस्थान ३:१२ 9 मिनु नोले परमप्रभु यावेम आ गुइ दिंशा, आं शोव़ थिप्तु। मिनु आं कली “मुल आं लोव़ इ शोव़म कुर पाता। प्रस्थान ४:१२ 10 नेनो, मुलाक्ती गो इ कली रागी रागी नु राज्य आन पर्बम लोव़ पाइब सेल्तन। तुल्चा नु प्रेत्चा कली, खतम पोक्चा, ग्रांग्ये माग्ये पपाइक्चा नु सेल्चा नु ख्रुम्चा कली वोइक्तन” देंत। येरमीया १८:७-१०
11 मिनु परमप्रभु यावेमी आं कली “येरमीया, गे मार, तवी?” देंत। मिनु गो “देसी बदाम रवा आ राशी का ताता” देंती। 12 मिनु परमप्रभु यावेमी “गे ठीक ताप्तीवी। मारदे हना गो आं लोव़ नेल्ल दुम्ल, दे योव़की पा बाक्ती” देंत। येरमीया ३१:२८ 13 मिनु परमप्रभु यावेमी लेंशा आं कली “गे मार, तवी?” दे हिल्लो पाप्तु। मिनु गो “ब्रुइश्शो मार, मार बाक्शो ग्योंब का उत्तर रे याक्सीशा यिशो ताता” देंती।
14 मिनु परमप्रभु यावेमी आं कली “उत्तर रे एको रागीम बाक्ब मुर नेल्ल आन कली श्येत जाक्ब। येरमीया ४:६; येरमीया ६:१,२२; येरमीया १०:२२; येरमीया २५:९; येरमीया ५०:४१ 15 गो उत्तर ङा राज्य ङा जात जात ङा मुर आन कली ब्रेत्नुङ। मिनु मेको नेल्ल जाक्शा, यरूसलेम ङा ठेयब लाप्चो ओव़तीक लांमी, एर ओंथ ङा गारो नेल्ल नु यहूदा ङा सहर आ ङोंइती आन पिप आन नित्तीक वोइक्नीम। मेकोपुकी मेको आन पर्बम लडाइ पचा कली जाक्नीम। 16 मेकोपुकीमी आं कली प्रोंइशा, आं अरेशो मटितीके, गो मेको आन पर्बम आं निसाफ नेंपाइक्नुङमी। मेकोपुकीमी अरु देवी देवता आन कली धूप चोम्तेक्म। मिनु आन गुइमी सेल्शो देवी देवता आन कली पूजा पाम्तेक्म। 17 गे चहिं बोक्शा, ठीक दुमो। मिनु गो इ कली मार, मार, अरेङा, मेको आन कली माइक्मी। गे मेको आन क्येङा महिनो। मो पाप्तीवी हना, गो इ कली मेको आन ङोंइती हिंपाइक्नन। 18 मुलाक्ती गो इ कली गारो हिरशो बोल्यो सहर, फलाम के थाम नु कांसा के थरपु खोदेंशो सेल्तन। मोपा गे यहूदा ङा पिपी, हुकुम पाइबपुकी, चढ़ेबपुकी नु रागी ङा मुर नेल्ले आन मरिम्शो पशो आ पर्बम लोव़ पने चाप्नेवे। येरमीया १५:२०; इजीकीएल ३:८-९ 19 मेकोपुकीमी इ कली लडाइ तोइनीम। तन्न इ क्येङा ग्राने मचाप्नीम। मारदे हना इ कली प्रोंइचा कली गो गे नु बाक्नुङ” दे परमप्रभु यावेमी देंत।