मर्कूस
ब्रेक्‍ब मुर: एको किताब ब्रेक्‍ब मुर मर्कूस बाक्‍ब। मेकोमी आंम आ पर्बम मर्कूस १४:५१-५२ ब्रेक्‍शो बाक्‍ब। मेको आ यहूदी नें यूहन्‍ना बाक्‍त, मेको आ रोमी नें चहिं मर्कूस बाक्‍त। मर्कूस बारनाबास आ याच बाक्‍त। मेको पावल नु बारनाबास काथा लमा बाक्‍त। तन्‍न मेको आस कली प्रोंइश्‍शा, यरूसलेम लेम्‍माक्‍त। प्रेरित १३:५,१३ नोले पवलम मेको आ पर्बम रिम्‍शो लोव़ पवा बाक्‍त। मेको कली लेंशा, रोम सहरम वारच पचा कली ब्रेश्‍शो बाक्‍त। २तिमोथी ४:११ मर्कूसमी पत्रुस कली वारच पा, आ शेंतीक लोव़ रोमी लोव़म सेला बाक्‍त। मिनु मेको लोव़ मसाम्‍चा कली नेल्‍ल ब्रेक्‍ता बाक्‍त।
गेना ब्रेक्‍शो: मर्कूस ६३-६४ ए. डी. रोम सहर जाक्‍‍माक्‍‍त। मेना थमा सुइक्‍ब आन कली रोम ङा सिजर नेरो आ पतीकेमी खेदा पचा गोव़मे बाक्‍त। मिनु मेको किताब ६४-६५ ए. डी. मेर खोदेंशो ब्रेक्‍शो बाक्‍ब। तन्‍न ७० ए, डी. क्‍येङा ङोंइती दुम्‍चा माल्‍ताक्‍व। मारदे हना यरूसलेम सहर कली खतम सेल्‍तीके आ पर्बम मारेइ मब्रेक्‍शो बाक्‍त।
मारदे ब्रेक्‍शो: मर्कूसमी आ किताबम येसु आ पशो छक लाक्‍चा ङा गेय आ पर्बम शुश ब्रेक्‍ताक्‍व। मेको पत्रुस आ शेंतीक लोव़ रे बाक्‍ब। येसु आ गेय ङा नेल्‍ल क्‍येङा ठेयब लोव़ बाक्‍नीम। येसु परमप्रभु यावे आ गेय पाइब दुम्‍तीके किताब नेल्‍लेम कोंइशो बाक्‍ब, देंशो बाक्‍ब। मर्कूस १०:४५
1
ब्‍वाक्‍कुम ख्रुम्‍शा ग्रुंइब यूहन्‍ना
मत्ती ३:१-१२; लूका ३:१-१८; यूहन्‍ना १:१९-२७
एको परमप्रभु यावे आ तौ येसु ख्रीस्‍त आ पर्बम ब्रेक्‍शो ग्‍येरपाइक्‍ब लोव़ बाक्‍ब। मेको लोव़ दोदेंशो पा गोइब देंशा हना, परमप्रभु यावे आ लोव़ पाइब यसैयामी ब्रेक्‍शो लोव़मी मार ब्रेक्‍शो बाक्‍त देंशा हना “ने‍नो, इ ङोंइती आं लोव़ पाइ‍ब सोइक्‍नुङ। मेकोमी इ लां थेल्‍ब। मत्ती ११:१० गोरशो रागीमी सेंदा कामी ‘प्रभु आ लां थेलीने। आ गाक्‍तीके लां फुल्‍लु ग्रोक्‍शा थेलीने’ देंशो नेंसीब” दे ब्रेक्‍शो बाक्‍ब। मलाकी ३:१; यसैया ४०:३ ब्‍वाक्‍कुम ख्रुम्‍शा ग्रुंइब यूहन्‍ना गोरशो रागीम ग्रूशा, मुर आन कली “इन पाप क्‍याम्‍चा कली इन थुं परमप्रभु यावे गे लेत्‍तीने। आंइ थुं लेत्‍ताक्‍क दे कोंइचा कली ब्‍वाक्‍कुम ख्रुम्‍शा ग्रुंइपांइसीने” दे लोव़ पाइक्बाक्‍माक्‍त। मिनु यहूदीया रागी नु यरूसलेम सहर ङा मुर नेल्‍ल मेकेर जाक्‍शा, आन पाप शोव़शा, यूहन्‍ना रे पा यर्दन खोलाम ख्रुम्‍शा ग्रुंइचा पुंइसमा बाक्‍त।
यूहन्‍नामी दलओंठ आ चां के प्रोव़शो वा फेक्‍बाक्‍माक्‍त। कुशुल के किप्‍शुर किप्‍बाक्‍माक्‍त। मिनु सल्‍हा माले ब्‍वशा नु रोका खुदो जशा बाक्‍बाक्‍माक्‍त। मिनु मुर आन कली “आं नोले जाक्‍ब आं क्‍येङा सक्ति पाइश्‍शो बाक्‍ब। गो मेको आ ङोंइती बाप्‍शा, आ जुत्ता प्रुइक्‍चा लायो मशिरनुङ। गो इन कली ब्‍वाक्‍कुम ख्रुम्‍शा ग्रुंइताक्‍न्‍नी। मेकोमी चहिं इन कली परमप्रभु यावे आ सोक्‍तीमी ख्रुम्‍ब” दे मुर आन कली शेंना शेंन बाक्‍बाक्‍माक्‍त।
येसु ब्‍वाक्‍कुम ख्रुम्‍शा ग्रुंइचा पुंइसीशो
मत्ती ३:१३-४:११; लूका ३:२१-२२; लूका ४:१-१३; यूहन्‍ना १:३२-३४
मेना येसु गालील रागी ङा नासरथ सहर रे गाक्‍शा, यूहन्‍ना आ बाक्‍तीकेमी जाक्‍माक्‍त। मिनु यूहन्‍ना रे पा यर्दन खोलामी ब्‍वाक्‍कुम ख्रुम्‍शा ग्रुंइपांइसे बाक्‍त। लूका २:५१ 10 मिनु ब्‍वाक्‍कुमी ग्रुम्‍शा ग्रूमेनु, सरीङ रोक्‍सीशा, परमप्रभु यावे आ सोक्‍त परवा खोदेंशो पा यिशा, आ तारी जुक्‍शो तवा बाक्‍त। 11 मिनु सरीङ रे “आं दाक्‍शो तौ नवे। इ कली तशा थाम्‍पा ग्‍येरसीनुङ” देंशो सेंदा नेंसे बाक्‍त। मर्कूस ९:७
येसु थुं थाम्‍चा पुंइसीशो
12 मिनु नोले परमप्रभु यावे आ सोक्‍तीमी येसु कली गोरशो रागीम लदा बाक्‍त। 13 मिनु गोरशो रागीम ४० नाक्‍त सम्‍म बाक्‍माक्‍त। मेकेर बाक्‍मेनु, सैतान रे पा थुं थाम्‍चा पुंइसे बाक्‍त। मेको गोरशो रागी ङा जन्‍तुपुकी नु बाक्‍माक्‍त। परमप्रभु यावे आ स्‍वर्ग ङा गेय पाइबपुकीमी मेको कली वारच पामे बाक्‍त।
येसुम परमप्रभु आ लोव़ नेंपाइश्‍शो
14 यूहन्‍ना जेल्‍खानमी चोक्‍चा पुंइसे नोले, येसुमी गालील रागीमी परमप्रभु यावे आ ग्‍येरपाइक्‍ब लोव़ नेंपाइक्‍ना पाइक्‍न गाक्‍माक्‍त। 15 मेकोमी “परमप्रभु यावे आ देंशो नाक्‍त जाक्‍त। आ राज्‍य इन नेक्‍था जाक्‍शो बाक्‍ब। इन थुं परमप्रभु यावे गे लेश्‍शा, आ ग्‍येरपाइक्‍ब लोव़ थमा सुतीने” दे नेंपाइक्‍ना पाइक्‍न गाक्‍माक्‍त। गलाती ४:४
येसुमी शेंसीब आन कली ब्रेश्‍शो
मत्ती ४:१८-२२; लूका ५:१-११; यूहन्‍ना १:३५-५१
16 मिनु येसु गालील समुन्‍द्र आ नेक्‍था हिरसेनु, सिमोन नु आ लोक्‍ब अन्‍द्रीयास ग्‍याइल आप्‍शा, ङांइ रेन्‍ना रेन्‍न बाक्‍शो तवा बाक्‍त। मेको निक्‍शी ङांइ रेप्‍‍ब बाक्‍सा बाक्‍त। 17 मिनु येसुमी मेको आस कली “आं नोले खोइय्‍यीसी। मिनु मुर आन कली रेप्‍ब सेल्‍नन्‍सी” दे माइक्‍सी बाक्‍त। 18 मिनु ग्‍याइल थु था प्रोंइशा, आ नोले खोइश्‍शा गाक्‍सा बाक्‍त।
19 मिनु इच्‍ची आइक्‍ची लशा, जब्‍दी आ तौ निक्‍शी याकूब नु यूहन्‍ना वोबु आस कली डोंगाम बाक्‍शा, गाक्‍शो ग्‍याइल प्रोव़ना प्रोव़न पशो ताम्‍सी बाक्‍त। 20 मिनु मेको आस कली यो ब्रेत्‍तीम्‍सी बाक्‍त। मिनु आस आफ जब्‍दी नु गेय पाइब आन कली प्रोंइशा, आ नोले खोदसे बाक्‍त।
वोल कली ग्रुंइशो
मत्ती ८:१४-१७; लूका ४:३१-४४
21 मिनु कापेरनाउम सहरम जाक्‍दीम्‍मा बाक्‍त। मिनु नाइक्‍तीक नाक्‍त येसुमी ग्रुम्‍तीक खिं लशा, मुर आन कली शेंदीमी बाक्‍त। 22 मेको आ शेंशो नेंशा, नेल्‍ल छक लाक्‍मा बाक्‍त। मारदे हना सास्‍त्री आन लोव़ खोदेंशो ममाइ। अधिकार पाइश्‍शो लोव़ पा शेंदीमी बाक्‍त। सास्‍त्री यहूदी आन कली परमप्रभु यावे आ अरेशो लोव़ शेंब बाक्‍शो बाक्‍तेक्‍म। मत्ती ७:२८-२९ 23 मिनु मेको ग्रुम्‍तीक खिंमी ग्रांग्रा दिचा ङा वोलमी सुम्‍शो मुर का बाक्‍माक्‍त। 24 मिनु मेको वाइ ब्रेश्‍शा “ए नासरथ ङा येसु, मार पमुया ङा? आंइ कली खतम पोक्‍थ जाक्‍नी? गो इन कली तुइक्‍नीकी। गे परमप्रभु यावे आ योव़शो ननी” देंमा बाक्‍त। मर्कूस ५:७ 25 मिनु येसुमी वोल कली “सिक्‍सी पावो। मिनु ग्रूङो” दे हुइक्‍ता बाक्‍त। मर्कूस ९:२६ 26 मिनु ग्रांग्रा दिचा ङा वोलमी मुर कली दिङ खोल्‍शा, वाइ ब्रेश्‍शा ग्रूमाक्‍त। 27 मोदुम्‍शो तशा, मुरपुकी छक लाक्‍शा “मार बाक्‍म माइ? नक शेंतीक लोव़ बाक्‍म कोर में? अधिकार पाइश्‍शो लोव़ पवानु, ग्रांग्रा दिचा ङा वोलम लायो टीबाक्‍तेक्‍म” देंमुमा बाक्‍त। 28 मिनु गालील रागीमी तेइ तेइ येसु आ पर्बम लोव़ ब्रना ब्रन लमाक्‍त।
रोइ पाइब आन कली सापाइश्‍शो
29 मिनु वोल कली ग्रुंइशा, येसु ग्रुम्‍तीक खिं रे सिमोन नु अन्‍द्रीयास वोबु आस खिंम जाक्‍दीम्‍माक्‍त। मिनु याकूब नु यूहन्‍ना यो येसु नु काथा बाक्‍सा बाक्‍त। 30 मिनु जाक्‍दीम्‍मानु, सिमोन आ शिमी जरो पा गोल्‍शो बाक्‍माक्‍त। मिनु येसु कली तुइक्‍पदमे बाक्‍त। 31 मिनु येसु मेको आ नेक्‍था लशा, आ गुइ ग्‍याइश्‍शा पोक्‍गा बाक्‍त। मोपा पोक्‍गानु, जरो जाम्‍माक्‍त। मिनु सेस दुम्‍शा, मेको आन कली मान पा थुल्‍मी बाक्‍त।
32 मिनु नां रिक्‍मेनु, मेको सहर ङा मुरपुकीमी रोइ पशो नु वोलम सुम्‍शो मुर नेल्‍ल आन कली चाक्‍ग्‍मे बाक्‍त। 33 सहर ङा मुर नेल्‍ल खिं ङा लाप्‍चो आ ङोंइती खुम्‍समा बाक्‍त। 34 मिनु येसुमी रोइ पशो शुश मुर आन कली सापदा बाक्‍त। मिनु शुश वोल आन कली हुइश्‍शा खेरमी बाक्‍त। वोल आन कली लोव़ पचा मगेवा बाक्‍त। मारदे हना वोलपुकीमी येसु कली तुइश्‍शो बाक्‍तेक्‍म। प्रेरित १६:१७-१८
35 आ दीसा सुनी नां मसोव़थु, येसु बोक्‍शा मेकेर रे गाक्‍शा, सुइ मबाक्‍तीकेमी जाक्‍दीश्‍शा, प्रार्थना पवा बाक्‍त। मत्ती १४:२३; मत्ती २६:३६; लूका ५:१६; लूका ११:१ 36 मिनु सिमोन नु मेको नु बाक्‍बपुकीमी येसु कली माल्‍मे बाक्‍त। 37 मिनु ग्रुम्‍शा, येसु कली “मुर नेल्‍लेमी इन कली माल्‍शो बाक्‍नीम” दे मदमे बाक्‍त। 38 मिनु येसुमी “मेकेर रे लशा, एर ओंथ गाउं सहर हिरशा लय। मारदे हना मेकेर यो शेंथ जाक्‍ती” देंमाक्‍त। 39 मिनु गालील रागी नेल्‍ल हिरशा, ग्रुम्‍तीक खिंमी शेंबाक्‍माक्‍त। वोल आन कली खेरबाक्‍माक्‍त।
कोर पाइब कली सापाइश्‍शो
मत्ती ८:२-४; लूका ५:१२-१६
40 मिनु कोर पाइब का जाक्‍शा, येसु आ ङोंइती आ पोक्‍च थेक्‍शा “सापाइक्‍चा दाक्‍ताक्‍नी हना, आं कली सापाइक्‍ने चाप्‍नीनी” दे सेउ पशा पुना बाक्‍त। 41 मिनु येसुमी शिशी पा आ गुइ दिंशा, कोर पाइब कली थिशा “गो सापाइक्‍चा दाक्‍नुङ। साङो” देंमाक्‍त। 42 मो देंमेनु, कोर सामाक्‍त। 43 मिनु येसुमी “सुइ कली मशेंदो। मर्कूस ३:१२ 44 चढ़ेब आ ङोंइती लशा, इ साशो रां कोंइदो। मिनु मुर नेल्‍ल आन कली ‘गो साती’ दे तुइक्‍पाइक्‍चा कली मोसाम देंशो खोदेंशो पा चढ़ेवो” दे माइश्‍शा सोइक्‍ता बाक्‍त। मर्कूस ७:३६; लेवी १४:२-३२ 45 मिनु साशो मुर मेकेर लशा, दोपा सामे, मेको लोव़ तेइ तेइ ब्रपदा बाक्‍त। मोदेंशो लोव़ ब्रतीके येसु सहर सहरमी गाक्‍ने मचबा बाक्‍त। मोपतीके शुश मुर मबाक्‍तीकेमी बाक्‍माक्‍त। तन्‍न मुरपुकी तेइ तेइ रे जाक्‍बाक्‍मा बाक्‍त।