नहुम
ब्रेक्‍ब मुर: एको किताब परमप्रभु यावे आ लोव़ पाइब नहुममी ब्रेक्‍शो बाक्‍ब।
गेना ब्रेक्‍शो: ६६३-६०६ बि. सी. मेर नहुम आ बाक्‍ची ना ब्रेक्‍शो बाक्‍ब।
मारदे ब्रेक्‍शो: एको किताब योना आ ब्रेक्‍शो किताब खोदेंशो पा निनवे सहर आ पर्बम ला परमप्रभु यावे आ लोव़ बाक्‍ब।
१. निनवे सहर निसाफ पाइक्‍चा पुंइसीब
२. निनवे सहर लडाइम फ्रुचा नु नेल्‍ल रोइक्‍चा पुंइसीब
३. निनवे सहर ङा मुर आन मरिम्‍शो पशो
1
परमप्रभु निनवे सहर तशा गाइश्‍शो
एको निनवे सहर आ पर्बम परमप्रभु यावे आ पशो लोव़ बाक्‍ब। एको एल्‍कोश ङा नहुममी तशा ब्रेक्‍शो लोव़ बाक्‍ब। मेकोमी मार ब्रेक्‍शो बाक्‍ब देंशा हना, परमप्रभु यावे रुश पाइब नु क्‍येक्‍क लेप्‍ब परमप्रभु बाक्‍ब। परमप्रभु यावेमी आ जोरी सत्रु आन कली क्‍येक्‍क लेप्‍ब। मेको आन कली तशा गाइक्‍ब। परमप्रभु यावेमी आ जोरी सत्रु आन कली क्‍येक्‍क लेश्‍शा, मेको आन कली तशा शुश चुरब। प्रस्‍थान २०:५; ब्‍यवस्‍था ४:२४ परमप्रभु यावे ओंखां ओंखां पा गाइक्‍ब। तन्‍न मेको ठेयब सक्ति पाइश्‍शो बाक्‍ब। मिनु परमप्रभु यावेमी दोस ताइब आन कली सजाइ मगेथु मप्रोंइब। मेको आ लां फश गिवारम बाक्‍ब। मिनु गोस्‍स मेको आ खोइल ङा फुरक बाक्‍नीम। प्रस्‍थान ३४:६-७ मेकोमी ठेयब समुन्‍द्र कली हुइक्‍तानु, सोव़ब। मेकोमी खोला नेल्‍ल आन कली सोव़पाइक्‍ब। बाशान ङा बी ब्‍यफ योव़तीके नु कारमेल पहाड ङा मारेइ मारेइ सोल सुल बेक्‍नीम। लेबानोन ङा फू यो सोल सुल बेक्‍नीम। मेको आ ङोंइती डांडा नेल्‍ल ख्रिंख्रि पाइनीम। मिनु पहाड दिंम दुम्‍नीम। रागी नु रागीम बाक्‍ब नेल्‍ल हिम्‍सीनीम। भजन संग्रह ९७:५
परमप्रभु यावे गाइक्‍तानु, मेको आ ङोंइती सु राप्‍ने चाप्‍‍बा ङा? मेको आ चुरशो सुम फाल्‍ने चाप्‍बा ङा? मेको आ गाइश्‍शो मी खोदेंशो पा ब्राइब। मिनु मेकोमी सेरथे फुल्‍लु आन कली प्रोल्‍ब। परमप्रभु यावे रिम्‍शो पाइब बाक्‍ब। मेको श्‍येत जशो नाक्‍ती ख्रुइश्‍शा ब्रोंइशा बाक्‍तीक बाक्‍ब। सु मेकेर प्रोक्‍शा लाइबा, मेको ख्रुइश्‍शा बाक्‍चा ताइब। ब्‍यवस्‍था ४:३१; भजन संग्रह १:६ मेकोमी बारशो ब्‍वाक्‍कुमी निनवे कली खतम सेल्‍‍ब। मेकोमी आ जोरी सत्रु आन कली खेरशा छिङछिङमी सोइक्‍ब। गे मारदे परमप्रभु यावे कली मरिम्‍शो पचा कली लोव़ गारपाइक्‍नीनी? मेकोमी इन कली खतम पोक्‍ब। गे मेको आ पर्बम मरिम्‍शो पचा कली निक्‍शी खेयप बोक्‍ने मचाप्‍नीनी। 10 आ जोरी सत्रु चूम रेश्‍शो खोदेंशो पा रेश्‍शो बाक्‍नीम। मिनु दुक्‍शो मुर खोदेंशो पा दुक्‍नीम। मिनु सोव़शो नल खोदेंशो पा मीम नेक्‍चा पुंइसीनीम। 11 निनवे, परमप्रभु यावे कली मरिम्‍शो पचा कली लोव़ गारपाइक्‍ब नु काइ मरिम्‍शो सल्‍ला पाइब इ दाते रे ग्रूशो बाक्‍नीम।
12 परमप्रभु यावे आ लोव़ मार बाक्‍ब देंशा हना “मेको थम सक्ति पाइश्‍शो नु शुश मुर बाक्‍तेक्‍म हना यो, साइश्‍शा क्‍याम्‍चा पुंइसीनीम। यहूदा, गो इ कली श्‍येत गेतन हना यो, मुल इ कली श्‍येत मगेनन। 13 मिनु मुल गो इ कली श्‍येत गेबपुकी रे प्रोंइनुङ। मिनु इ कली फ्रेंशो डोरी प्रोइक्‍नुङ” दे परमप्रभु यावेमी देंशो बाक्‍ब।
14 निनवे, परमप्रभु यावेमी इ पर्बम लोव़ का अरेशो बाक्‍ब। मेकोमी मार अरेशो बाक्‍ब देंशा हना “मुल रे इ नें वोइक्‍ब मुर सुइ मलीनीम। गो इ परमप्रभु आ खिं रे इ मुशा सेल्‍शो मूर्ति नु चेम्‍शा सेल्‍शो मूर्ति ग्रुंइनुङ। गो इ कली तुरस ठीक सेल्‍नुङ। मारदे हना गे काइ मरिम्‍शो पाइब बाक्‍नेवे” दे अरेशो बाक्‍ब।
15 कोव़ङीन, रिम्‍शो लोव़ पाइब का पहाडम गाक्‍ब। मेकोम थुं नाइक्‍तीक लोव़ शेंब। यहूदा ङा मुरपुकी, इन चाड मानेन। इन कसम जशो खपीन। मारदे हना काइ मरिम्‍शो पाइब इन बाक्‍तीकेमी लेंशा मजाक्‍नीम। मेको नेल्‍ल क्‍याम्‍चा पुंइसाक्‍म।