भजन संग्रह
ब्रेक्ब मुर: भजन संग्रह कली हिब्रू लोव़मी “ठेयब सेल्तीक कुम्सो” देंनीम। १५० ओटा कुम्सोमी ७३ ओटा कुम्सो पिप दाऊदम ब्रेक्शो बाक्ब। २ ओटा भजन संग्रह सोलोमनमी सेल्शो बाक्त। ५० ओटा कुम्सो आन ब्रेक्ब मुर मतुंइसीब। लीशो २५ ओटा कुम्सो कोराह आ तौपुकी, आसाफ, मोसा, एथान नु हेमान आन सेल्शो बाक्नीम। भजन संग्रह आगामी ५ ओटा किताब बाक्नीम।
१. ङोंइती ङा किताब १-४१ सम्म मेको कली दाऊद आ किताब देंने चाम्सीब।
२. मेको आ नोले ङा किताब ४२-७२ सम्म कोराह आ तौ आन सेल्शो कुम्सो रे गोइब। एकेर आसाफ, दाऊद नु अरु मतुइश्शो मुर आन के यो बाक्नीम। मेको कली कोराह आ तौ आन किताब देंनीम।
३. मेको आ नोले ङा किताब ७३-८९ सम्म एकेर आसाफ आ ८ ओटा कुम्सो बाक्नीम। तन्न कोराह आ तौपुकी, दाऊद, हेमान नु एथान आन कुम्सो यो बाक्नीम। एको कली आसाफ आ किताब देंनीम।
४. मेको आ नोले ङा किताब ९०-१०६ सम्म मोसा आ कुम्सो, दाऊद आ कुम्सो निक्शी नु मतुइश्शो मुर आन के १४ ओटा कुम्सो बाक्नीम। मोपतीके मेको कली मतुइश्शो मुर आन ब्रेक्शो किताब देंनीम।
५. नेल्ल क्येङा नोले ङा किताबम १०७-१५० सम्म बाक्ब। एकेर २८ ओटाकुम्सो मतुइश्शो मुर, दाऊद आ १५ ओटा कुम्सो नु सोलोमन आ कुम्सो का बाक्नीम। एको किताब कली चाड ङा कुम्सो किताब देंनीम।
गेना ब्रेक्शो: एको कुम्सो नेल्ल गेना ब्रेक्शो बाक्नीमी, देंने मचाप्सीब। तन्न पिप दाऊद रे इजीकीएल सम्म ३०० बर्समी ब्रेक्शो बाक्नीम। का निक्शी कुम्सो मेको क्येङा माइत यो बाक्नीम।
मार ब्रेक्शो: भजन संग्रह ङा लोव़ नेल्ल क्येङा शुश माइत नु नक लोव़ ङा किताबम यहूदी आन ठेयब किताब बाक्ब। मेको शुश मुर आन पर्बम लोव़ बाक्त हना यो, भजन संग्रह ङा ठेयब लोव़ परमप्रभु यावे कली ठेयब सेल्तीक कुम्सो बाक्नीम।
1
परमप्रभु कली टीब नु मटीब
1 सु परमप्रभु आ अरेशो लोव़ मटीब नु मगाक्बा, पापी आन लां मखोइक्बा नु परमप्रभु आ पर्बम शुक्शी पाइब नु मबाक्बा, मेको ग्येरसीशो मुर दुम्ब। भजन संग्रह २६:४; भजन संग्रह ११९:१; हितोपदेस ४:१४; येरमीया १५:१७ 2 मेको मुरुमी परमप्रभु यावे आ अरेशो लोव़ दाक्शा, नाक्दो नाक्ती मेको कली मिम्ना मिम्न बाक्ब। भजन संग्रह ११९:१४८; यहोसु १:८
3 मिनु मेको मुर खोला आ नेक्था ख्रुम्शो रवा खोदेंशो बाक्ब। दोपा मेको आ फल सित्ची ना सिप्बा नु आ सफा यो महेम्थु बाक्बा, मोपा मेको मुर आ पतीक नेल्ल रिम्शो बाक्ब। भजन संग्रह ९२:१३-१५; येरमीया १७:८
4 परमप्रभु आ अरेशो मटीबपुकी चहिं मोदेंशो मबाक्नीम। मेकोपुकी फशेमी बेरपाइश्शो भूस खोदेंशो बाक्नीम। 5 मिनु मेको निसाफ दुम नाक्ती जाम्शा लाइनीम। पापीपुकी ठीक पाइबपुकी नु बाक्चा मताइनीम। 6 परमप्रभु यावेमी ठीक पाइब आन कली लां कोंइब। आ अरेशो मटीब आन लां चहिं जाम्शा लाइब।