2
ग्रुम्तीकेमी दोपा बाक्चा
1 गे चहिं येसु ख्रीस्त आ ठीक लोव़ रिम्शो पा मुर आन कली शेंदीमी। २तिमोथी १:१३ 2 गे खाल्पा आन कली मार शेंचा माल्नेवे देंशा हना, रिम्शो मिम्ने चाप्ब, मान पाइक्चा शिरशो मुर, गेय पचा क्येङा ङोंइती मिम्ब, आन थमा सुइक्चा, आन दाक्चा नु आन फाल्चा ङा सक्ति ठीक दुम्शा बाक्चा माल्नीम, दे शेंचा माल्नेवे। १तिमोथी ५:१
3 मिनु खाल्पी आन कली मार शेंचा माल्नेवे देंशा हना, खाल्पीपुकी रिम्शो थमा सुइक्ब दुम्चा माल्नीम। हेंथे लोव़ पचा मदुम्ब। शुश शांबु तूचा मदुम्ब। खाल्पीपुकी रिम्शो गेय शेंब दुम्चा माल्नीमी। 4 मोदेंशो पा खाल्पीपुकीमी आन क्येङा आल मीश मुर आन कली आन वोंइश नु आन आल आन कली दाक्चा माल्ब, दे शेंचा माल्नीम। 5 गेय पचा क्येङा ङोंइती मिम्चा, आंम वोंइश नु ला बाक्चा, खिं ङा गेय रिम्शो पचा, मुर नु रिम्शो दुम्चा, आंम वोंइश कली टिचा, दे शेंचा माल्नीम। मोदेंशो पाम्तेक्म हना, मुरपुकीमी परमप्रभु यावे आ लोव़ आ पर्बम मरिम्शो लोव़ मपाइनीमी। एफिसी ५:२२
6 मोदेंशो पा गे इ क्येङा आल वोंइश मुर आन कली “गेय पचा क्येङा ङोंइती मिम्चा माल्ब” दे शेंचा माल्नेवे।
7 मिनु नेल्ल क्येङा ठेयब मार बाक्ब देंशा हना, गे रिम्शो गेय पशा, थमा सुइक्बपुकी दोदेंशो मुर बाक्नीमी, दे कोंइचा माल्नेवे। मिनु मुर आन कली शेंदीनु, हेंथे लोव़ मपथु, रिम्शो शेंतीक शेंचा माल्नेवे। २तिमोथी २:१५; १पत्रुस २:१५; १तिमोथी ४:१२; १पत्रुस ५:२ 8 गे रिम्शो लोव़ शेंताक्वी हना, सुइमी इ कली दोस गेने मचाप्नीम। मिनु इ कली मदाक्बमी यो इ पर्बम मारेइ मरिम्शो लोव़ पचा मताइनीम। मिनु आन मुने दोक्नीम।
9 मिनु वाइलीम वाइल आन कली मार शेंचा माल्नेवे देंशा हना, आंम ठेयब मुर आन लोव़ टिचा माल्नीम। आन गेय रिम्शो पा आन ठेयब मुर आन कली ग्येरपाइक्चा माल्नीम। आन ठेयब मुरुमी लोव़ पामेनु, मेकोपुकीम जोप पचा मदुम्नीमी। एफिसी ६:५-६१; तिमोथी ६:१-२; १पत्रुस २:१८ 10 खुइ पचा मदुम्ब, नेल्ल गेयमी थम रिम्शो पाइब दुम्चा माल्नीम। मोदेंशो रिम्शो गेय पा इं कली पाप रे प्रोंइब परमप्रभु यावे आ शेंतीके रिम्शो लोव़ बाक्ब, दे कोंइनीमी। मेको शेंचा माल्नेवे।
परमप्रभु यावे आ शिशी
11 परमप्रभु यावे आ शिशी मुर नेल्ल आन कली पाप रे प्रोंइचा कली तपांइसाक्व। तीतस ३:४ 12 मोदेंशो शिशीमी इं कली परमप्रभु यावे कली मगारचा ङा गेय नु रागी रागी ङा मुर आन पतीके आ पर्बम मोदेंशो मपचा, दे शेंब। मिनु मुल गेय पचा क्येङा ङोंइती मिम्चा, ठीक गेय पचा नु रागीम बाक्शा, परमप्रभु यावे कली मान पा हिंचा, दे शेंब। 13 मोदेंशो दुम्शा, मान ताइब परमप्रभु यावे नु इं कली पाप रे प्रोंइब येसु ख्रीस्त आ छेङछेङ ग्रूब, दे गो आस पशा रिम्नय। १कोरिन्थी १:७; फिलिप्पी ३:२०; १थिस्सलोनिकी १:१० 14 येसु ख्रीस्तम आंम कली काइ ममिम्थु, साइक्चा पुंइसाक्व। मारदे साइक्चा पुंइसाक्व देंशा हना, इं कली मटितीके रे प्रोंइचा कली साइक्चा पुंइसाक्व। मिनु इं कली परमप्रभु यावे आ योव़शो मुर सेल्चा नु इं कली शुश रिम्शो गेय पपाइक्चा कली आंम कली साइक्चा, दे जिम्मा गेसाक्व। गलाती १:४; १तिमोथी २:६; प्रस्थान १९:५; एफिसी २:१० 15 मेको लोव़ शेंदीमी। मिनु गे अधिकार पाइश्शो दुम्शा, मुर आन कली अरेवो। मिनु मुरपुकीमी “एको ठिटामी आंइ कली शेंने मचाप्ब” देंचा मपुंइसो। १तिमोथी ४:१२