Segunda Carta a los Corintios
Kjibokwo ëre tara Pablorë Corinto sopga kong
Kjibokwo ëre sorë
Domer shäng kjl̈ara ko Pablo. E Sbö tjl̈õkwo l̈aga Jesús ãska wl̈eniyo. Domer shäng kjl̈ara obi ko Tito. E parkë shäng Sbö tjl̈õkwo l̈ë Pablo tjok. Pjl̈ara ga öör jek shäng parkë Corinto kjokyo. E irgo ga to iröng Macedonia kjokyo, Pablo sök l̈ishko. Eshko ga l̇l̇ëbo owa shärye Jesús tjl̈õkwo kjragaga l̈öng Corinto kjokyorë l̈i roy l̈ara ba kong pjire. Eni ga kjibokwo ëre tara Pablorë ba kong, l̇l̇ëbo l̇l̇ë l̇l̇gweya wl̈o.
Corinto kjokyo ga no kjone kjone tjwe tön Jesús tjl̈õkwo kjragaga l̈i tjok, ga tjl̈ẽ l̈ok ga «Tja Sbö tjl̈õkwo roy l̈aga Jesús ãska» l̈e, miga jyõ erä. Epga opyono tjwl̈õ ara Pablo kjinmo, ga Pablo l̈ãywara l̈ok owa bakoe. Eni ga Jesús tjl̈õkwo kjragaga l̈i jyãpgwara l̈ok ara. E kjĩshko ga kjibokwo ëre go ga l̇l̇ëbo jyã tara Pablorë nopga eniyo l̈i kjĩshko. Jesús tjl̈õkwo kjragaga l̈i poshduna, wl̈ona wopjl̈ú go, epga jëk ba jyãpgwagaga owa l̈i tjok l̇l̇ëm wl̈o.
Dënashko ga Jesús tjl̈õkwo kjragaga l̈öng eshko l̈i kong dbur rokara Pablorë, Jesús tjl̈õkwo kjragaga l̈öng Jerusalén kjokyo l̈i kjimtokl̈o. Gueniyo ba jyãpgwagaga l̈i tjl̈ẽno ga dbur l̈i woyde Pablorë ba kong om go l̈ara, miga jyõ erä. Eni ga Pablo wotjl̈ĩk jek eshko wop äe l̈e, ga kjibokwo ëre go ga epga ichara dbur töng jek obi, söya jek Jerusalén kjokyo wl̈o.
1
Kjibokwo ëre taga tja Pablorë, bi kjl̈ara Timoteo tjok. Tja kjrara Sbörë beno ba tjl̈õkwo roy l̈aga Cristo Jesús ãska.
Sbö tjl̈õkwo kjragaga l̈öng Corinto kjokyo, l̈öng Acaya kjokyo, kjibokwo ëre ichërwa jek bomi kong.
Rokërwa bi Data Sbö kong, bi Tjl̈apga Jesucristo kong ga ba wopjl̈ú l̈i kjĩshko ga pjãy kjimte l̈ok ara, pjãy ie ber l̈öng wl̈ẽp bakoe.
Shji kjimte Sbörë, shji wosonkë l̇l̇ëm wl̈o
Sbö, bi Tjl̈apga Jesucristo Data l̈i poshrëy ara. Shji songe l̈aga l̈i e. Bi kjimtaga l̈i e bakoe. L̇l̇ëbo wen borwa kong owashko ga tjawa kjimte, tjawa wosonkë l̇l̇ëm wl̈o. Tjawa kjimtara eni kjĩshko ga l̇l̇ëbo wen obl̈ë kong owashko ga kjimtërwa eni bako, wosonkë l̇l̇ëm wl̈o. L̇l̇ëbo weno Cristo kong owa l̈i wen borwa kong ara eni bakoe. Gueniyo tjawa kjimte ara bako, tjawa wosonkë l̇l̇ëm wl̈o. Tjawa l̈öng song ëreshko, pjãy kjimtërwa ga pjl̈ú wl̈o, pjãy där wl̈o. Ga tjawa kjimte Sbörë, tjawa wosonkë l̇l̇ëm wl̈o. Eni ga pjãy kjimtërwa ga pjl̈ú, pjãy wosonkë l̇l̇ëm wl̈o bakoe. Eni ga l̇l̇ëbo wen bomi kong owashko ga kumi kjang ga pjl̈úe. Miydërwa ga l̇l̇ëbo weno borwa kong owa l̈i weno bomi kong eni bakoe. Ga pjãy kjimte Sbörë, tjawa kjimtara sorë ga eni. Eni ga miydërwa ga pjãy ber l̈öng wopjl̈úe.
Pjeyoga, woydërwa ga tjawa öör l̈öng song Asia kjokyo sorë l̈i miydëmi l̈öng pjl̈úe. L̇l̇ëbo shäryaraba borwa kong owa ara anmoyõ, kurwa mae. Tjawa wotjl̈ĩno ga tjawa där ber l̈öng së ame l̈ororwa. Tjawa zrökoba l̈ororwa eni. Shäryono eni, tjawa opping mär om go ame wl̈o, tjawa mär ber l̈öng Sbö go shara wl̈o. Shinmoga woshraga l̈i e. 10 Eshko ga tjawa zrökoba l̈ërwa l̈öngshko ga tjawa döra Sbörë. Eni ga tjawa beno l̈öng mär ba go. Miydërwa ga e ber borwa döga ĩyado. 11 Rokërwa bomi kong ga pjãy syõshtë Sbö kong borwa kjĩshko, tjawa kjimtëmi wl̈o. Eni ga Sbö wopjl̈ú l̈i kjĩshko ga tjawa kjimte, nopga ara syõshtono sorë l̈i eni. Eshko ga nopga syõshtono ara l̈i ber l̈öng wopjl̈ú ba tjok, borwa kjĩshko.
L̇l̇ëbo shärye Pablorë l̈ara l̈i shäryara l̇l̇ëme
12 Miydërwa ga tjawa jëktong pjl̈o bek nopga uunkong tjok, bomi tjok bakoe. Tjawa krë ara wopjl̈ú e kjĩshko. Tjawa kjimtara Sbörë, ga tjawa tjl̈ẽno bek ĩyado, l̇l̇ëye jnenorwa ë kong l̇l̇ëme. Tjawa mär l̈öng kjok miydë kjok ëre kjing go l̈i go l̇l̇ëm, tjawa mär l̈öng Sbö wopjl̈ú l̈i go. 13-14 Kjibokwo tërwa bomi kong wẽl̈ë, l̇l̇ë l̈okl̈o miydëmi pjl̈ú wl̈o. Eerishko ga tjawa sorë miydëmi sira erä, gueniyo woydërwa ga l̇l̇ono ga tjawa sorë miydëmi pjire. Eni ga Tjl̈apga Jesucristo tjwe iröng obishko ga pjãy krë borwa kjĩshko ga pjl̈ú, tjawa krë bomi kjĩshko sorë ga eni.
15 Miydër ga pjãy l̈öng wopjl̈ú bor tjok l̈ër. E kjĩshko ga tja jek äär bomi ĩk pjl̈ogl̈o pjök l̈oror, pjãy ber wopjl̈ú wl̈o. 16 Tja jek Macedonia kjokyoshko ga pjãy ĩn äär l̈oror. Ga tja tek iröngshko ga pjãy ĩn obi l̈oror. E irgo ga tja wotjl̈ĩno ga tja kjimtëmi jek Judea kjokyo wl̈o bakoe l̈oror. 17 Gueniyo shäryoror eni l̇l̇ëme. ¿Eni ga pjãy wotjl̈ĩk ga shäryër eni l̈ororshko ga woyotjl̈ĩnor yõtso l̇l̇ëme l̈ëmire? Nopga kjok ëre so, «Tja l̇l̇ëbo shäryë» l̈e obl̈ë kong, gueniyo wotjl̈ĩk ba pjl̈úshko ga shärye eni l̇l̇ëme. ¿Pjãy wotjl̈ĩk ga tja eni l̈ëmire? 18-19 L̇l̇ëye l̈ara Sbörë l̈i shärye eni ĩyado. Miydëmi ga e jl̈õe. Ga tjawa omshäryë eni bakoe. Era jl̈õ eni bakoe. Tja, Silvano, Timoteo, Sbö Wa Jesucristo l̈i roy l̈ororwa bomi kong, ga era, l̇l̇ëye l̈ara l̈i shärye eni ĩyado. E kjĩshko ga «Shäryërwa» l̈ororwashko ga shäryërwa eni. 20 L̇l̇ëbo l̈ara Sbörë bi kong jl̈õkoyo kës l̈i beno shäryaga Cristorë. E kjĩshko ga shji tönshko ga «L̇l̇ëbo l̈ara l̈i shäryara eni» l̈ëy, Sbö poshrëy wl̈o. 21 Shji töno beno tjeng Cristo tjok, ga rayëy l̇l̇ëm l̈i, e l̈aga Sbörë. Shji iara beno tjeng dboy ba kong. 22 Ba Sëya ichara bi go, ber kësbang bi tjok wl̈o. Shji jyã tara eni, shji baĩya l̈i miydëy e go wl̈o. Ga miydëy e go ga l̇l̇ono ga l̇l̇ëbo pjl̈ú twe bi kong l̈ara kës l̈i twe bi kong eni bakoe.
23 Tja jek bomi shwoy Corinto kjokyo l̈oror. Gueniyo tja to jek l̇l̇ëm, pjãy wl̈on ara anmoyõ l̇l̇ëm wl̈o. Miyde Sbörë pjir ga eni. Rokër ba kong ga l̇l̇ëbo l̈ër l̈i eni l̇l̇ëm ga tja shdũya. 24 Pjãy mär Cristo go sorë l̈i l̈aga tjawarë, e l̈orwarë l̇l̇ëme. Miydërwa ga pjãy mär l̈öng ba go jl̈õkoyo. Tjawa bomi kjimtaga erö, pjãy l̈öng wopjl̈ú wl̈o.