Apocalipsis
L̇l̇ëbo ëre pina Jesucristorë Juan kong, shji yo ĩno wl̈eni
Kjibokwo ëre sorë
Domer shäng kjl̈ara ko Juan. Dënashko ga e Jesús oppingga. Jesús wol̈ono, ga woshrara Sbörë iröng obi irgo ga Juan beno shäng Sbö tjl̈õkwo l̈aga Jesús ãska wl̈eniyo shara.
Eshko dbaryo ga Juan iaraba beno shäng dl̈ung tjrëko ko Patmos l̈ishko, ba shdunggl̈o, Jesús roy pjl̈ú l̈ara kjĩshko. Pjl̈ara ga Jesucristo weno ba kong. Eshko ga l̇l̇ëbo pina ba kong, shji yo ĩno wl̈eni, ga ichara ba të, l̇l̇ëbo l̈i miyde nopga uunkongdë wl̈o.
Bäm go ga ichara kjibokwo të Jesús tjl̈õkwo kjragaga kjringgwo kjäk (7) tjeng kjok shto obl̈ë obl̈ë Asia kjokyo l̈i kong. (Eeri ga kjok eshko l̈i ko Turquía.)
E irgo ga l̇l̇ëbo wen l̇l̇ono l̈i pina ba kong. Nopga owa l̈i shdũya Sbörë sorë l̈i pina ba kong. Ä ëngkjwë Sbö nopga tjok sorë l̈i pina ba kong. E zãya Jesúsdë sorë l̈i pina ba kong. L̇l̇ono ga nopga uunkong ber l̈öng sorë l̈i pina ba kong bakoe.
L̇l̇ëbo ĩna Juandë kës ëre tara beno Jesús tjl̈õkwo kjragaga kong.
1
L̇l̇ëbo ëre pina Sbörë Jesucristo kong, pĩya ba parkagaga kong wl̈o, l̇l̇ëbo wen dörö l̈i miyde l̈ok wl̈o. Eni ga tja Juan kong ga ba parkaga kjok dogo so ichara Jesucristorë ter shrono shäng bor kong, l̇l̇ëbo ëre pĩya bor kong wl̈o. L̇l̇ëbo ĩnor l̈i tër uunkong bomi kong, Sbö tjl̈õkwo roy l̈ara Jesucristorë bor kong l̈i tër bomi kong bako, ber ba miydokl̈o wl̈o. Ëye kjibokwo ëre l̈ë obl̈ë kong ga ber wopjl̈úe. Ëye tjl̈õkwo ëre kuk, ga kol̈e ga ber wopjl̈ú bako, dbar l̈ër shäng l̈i dörö kjĩshko.
4-5 Kjibokwo ëre taga tja Juandë.
Jesús tjl̈õkwo kjragaga kjringgwo kjäk (7) tjeng kjok shto obl̈ë obl̈ë Asia kjokyo, kjibokwo ëre ichër jek bomi kong.
Rokër Sök Ĩyado l̈i* Sök Ĩyado l̈e l̈i, e Data Sbö l̈okl̈o. kong, sëyaga dogl̈o kjäk (7) tjeng ba pjl̈u sökkl̈o jong l̈i bokshto l̈i Sëyaga dogl̈o kjäk (7) l̈e l̈i, e Sbö Sëya dbo obl̈ë obl̈ë l̈i l̈okl̈o. kong, Jesucristo kong ga ba wopjl̈ú l̈i kjĩshko ga pjãy kjimte l̈ok ara, pjãy ie ber l̈öng wl̈ẽp bakoe. Jesucristo, e Sbö tjl̈õkwo kura l̈i l̈aga jl̈õkoyo, woshrara bäm go l̈i e, pjl̈upga l̈öng kjok ëre kjing go ichaga l̈i e bakoe. Shji woyde ara, owa pjang bi go l̈i l̈öna beno dret, ba srëng kwona l̈i go, ga shji iara beno l̈öng syõshtagaga parkë l̈öng Sbö, ba Data, borwa pjl̈uyo l̈i kong. E kjĩshko ga Cristo iëy ber kësbang, tjwl̈õ ara, dbo ara ĩyado wl̈o. Ber eni.
Tja kuzĩa. L̇l̇ono ga Cristo ter pjäng sho roshko,
ĩga uunkongdë,
ba shorkegaga l̈öng dënashko l̈i omĩk bakoe.
Eshko ga tjëyoga l̈öng kës l̈i ber l̈öng woydë ara ba kjĩshko.
Ber eni.
Tjl̈apga Sbö tjl̈ẽ ga «Tja so tjl̈õkwo tokl̈o ko Alfa Grecia so tjl̈õkwo go ga tjl̈õkwo tokl̈o ko Alfa, e ba bäm ĩyo, tjl̈õkwo tokl̈o ko A wl̈eni. kjoyo, tja so tjl̈õkwo tokl̈o ko Omega§ Grecia so tjl̈õkwo go ga tjl̈õkwo tokl̈o ko Omega, e ba pjirshko, tjl̈õkwo tokl̈o ko Z wl̈eni. kjoyo bakoe. L̇l̇ëye l̇l̇ëm obishko ga tja sök tjän. L̇l̇ëbo uunkong pjitong dret ga tja sök obi. Sök Ĩyado l̈i tja. L̇l̇ëye shäryër woydë l̈i shäryër ga pjl̈úe» l̈e.
Domer weno shäng kjl̈ara, so no to ter kjok dogo dwayo l̈i kjoyoe
Tja Juan, tja bomi kjl̈ara Jesús tjl̈õkwo kjraga. Shji mär bi pjl̈uyo Jesús go kjĩshko ga shji shdungoba, gueniyo kuy kjange. Sbö tjl̈õkwo roy l̈ara Jesúsdë bor kong l̈i l̈ër shäng oba kong kjĩshko ga tja icharaba beno sök dl̈ung tjrëko ko Patmos l̈ishko. 10 Pjl̈ara ga Tjl̈apga Jesús dbaryo* Tjl̈apga Jesús Dbaryo l̈e l̈i, e dbar sondëshko l̈okl̈o, e woshrara Sbörë e dbaryo kjĩshko. ga tja go Sbö Sëya jl̈õkoyo. Eshko ga ybö kuror bor irgo pjl̈ara dbo ara, pjl̈uk wl̈i bakworoy wl̈eni. 11 Tjl̈ẽ bor kong ga «L̇l̇ëye ĩp l̈i tos ber pjang kjibokwo go. E irgo ga ichos jek Jesús tjl̈õkwo kjragaga kjringgwo kjäk (7) tjeng kjok shto obl̈ë obl̈ë Asia kjokyo l̈i kong. Ichos jek Éfeso kjokyo, Esmirna kjokyo, Pérgamo kjokyo, Tiatira kjokyo, Sardis kjokyo, Filadelfia kjokyo, Laodicea kjokyo bakoe» l̈e.
12 Eshko ga tja bojongö ĩn iröng, ëye ybö kuror tjl̈ẽ l̈i ë miydër wl̈o. Eshko ga ĩn ga iök shjiy bapkwo shäryak dbur sho shõyl̈ṍr go tjeng kjwo kjäk (7), 13 tjrëko shäng kjl̈ara so no to ter kjok dogo dwayo l̈i kjoyo, doyono shäng shwong kur may äär ba kju kjing go, dop pjrikkl̈o shäryak dbur sho shõyl̈ṍr go pjang ba pjl̈ú kjing go. 14 Ba kägä, ba käkzong, e kjwo pjl̈ubl̈ún so pjäng sho kjoyoe. Ba bok roy so iök l̈ok ri ri kjoyoe. 15 Ba dre so dröng sho so kl̈ung sho kjoyo l̈i iak jong iök pjë jong ri ri roshko l̈i kjoyoe. Ba ybö dbo ara, di kës pjl̈ubl̈unyo dik. 16 Orkwo kël̈ëkong dbala tjeng kjwo kjäk (7). Dröng tur jong ba kjak roy kjwangna, kowo stek kar kar. Ba bokkwo kãl̈ã l̇l̇etl̇l̇et, dl̈o wl̈eni.
17 Ĩn jek drëng ga tja jek rish buk ba dre zl̈ong, shji wol̈ono buk wl̈eni. Gueniyo eshko ga tja porwara ba orkwo kël̈ëkong go, ga tjl̈ẽ bor kong ga «L̇l̇ëye bangkjrëp l̇l̇ëme. L̇l̇ëye l̇l̇ëm obishko ga tja sök tjän. L̇l̇ëbo uunkong pjitong dret ga tja sök obi. 18 Sök Ĩyado l̈i tja. Tja wol̈ono, gueniyo tja sök së ĩyado wl̈o. Shinmoga shtoyo u bäng bäng dökkl̈o tjeng bor wl̈oshko, epga woshrër iröng obi ga pjl̈úe.
19 »L̇l̇ëye ĩnop l̈i tozong. Eni tjok ga l̇l̇ëye shäryë l̈i tos, l̇l̇ëye wen tek iröng l̈i tos bakoe. 20 Dbala ĩnop tjeng kjwo kjäk (7) bor orkwo kël̈ëkong ëre, iök shjiy bapkwo shäryak dbur sho shõyl̈ṍr go tjeng kjwo kjäk (7) ëre, e l̇l̇ë l̈okl̈o l̈ër bop kong. Iök shjiy bapkwo kjwo kjäk (7) ëre, e bor tjl̈õkwo kjraga kjringgwo kjäk (7) tjeng kjok shto obl̈ë obl̈ë l̈i jyãgl̈o. Dbala kjwo kjäk (7) ëre, e roy sögaga kjok dogo so dogl̈o kjäk (7), parkë l̈öng bor tjl̈õkwo kjraga kjringgwo kjäk (7) kong l̈i jyãgl̈o bakoe.

*1:4-5 Sök Ĩyado l̈e l̈i, e Data Sbö l̈okl̈o.

1:4-5 Sëyaga dogl̈o kjäk (7) l̈e l̈i, e Sbö Sëya dbo obl̈ë obl̈ë l̈i l̈okl̈o.

1:8 Grecia so tjl̈õkwo go ga tjl̈õkwo tokl̈o ko Alfa, e ba bäm ĩyo, tjl̈õkwo tokl̈o ko A wl̈eni.

§1:8 Grecia so tjl̈õkwo go ga tjl̈õkwo tokl̈o ko Omega, e ba pjirshko, tjl̈õkwo tokl̈o ko Z wl̈eni.

*1:10 Tjl̈apga Jesús Dbaryo l̈e l̈i, e dbar sondëshko l̈okl̈o, e woshrara Sbörë e dbaryo kjĩshko.