PRIMERA CARTA DEL APOSTOL SAN PABLO A LOS
CORINTIOS
Equene Corintios quirica su Pablo ja Corinto ejude su aniji Diusu sa dharejiji cuana d'ayataidha tuna sa ajiji ai madhada cuana jepuiti. Dharejiji cama jasajasajati, pia sa ebutse neje jaquinatiji, cuaja papu hue edhitatitani cuana jepuiti buetsuataidha huecuana. Daja huecha Pablo ja buetsuataidha huecuana Espíritu Santo sa jatiati ai cuana jepuiti. Diusu sa dharejiji cuana da Cristo peje su d'eji su eputani, daja huecha manujiji cuana eid'etayu buetsuataidha huecuana.
Capítulo 13 su quisa epuani ebia su saida ibuneda neje jadusuti taji, aimue bue mahue yana su emimi puji mahue. Da su tueda jaibunebati neje Diusu sa dharejiji cuana saida puderatita cua.
Ye versiculo cuana da ebia su saida quita ebuetsuati puji:
1.8
2.14
3.11
6.19,20
9.24-27
10.13,31
15.57,58
1
Pablo ja Corinto ejude su aniji edue cuana quirica tiametana
Ema da Pablo. Diusu ja ema ichatana.
Jesucristo sa apóstol epu puji. Hue ema upia yani edue Sóstenes neje. Tu neje yama ye quirica ebeituinia Corinto ejude su aniji edue cuana peje su. Edue cuana, micuaneda Jesucristo neje dunejiji putsu, Diusu ja micuana nimebutsepiatana pamapa pia ejude cuana su Jesucristo peje su jei eputani cuana neje tupupai. Jesucristo da mecuana sa Echua Puji, daja huecha ecuaneseda. Ecuana sa Tata Diusu, Echua Puji Jesucristo detse ja meibunebataque. Menimepijajametaque tse.
Diusu ja edue cuana ibunebatana
Pamapa hora su yama Tata Diusu diusulupai yainia, tuahueda Jesucristo jepuiti micuana ebia su ibunebatana putsu. Jesucristo neje jadunetijiji jepuiti, micuana Diusu ja ibunebatana. Tuahueda micuana tsahuatana cristiano cuana tu jepuiti equisa puji. Pamapa mesa jabuetsuati cuana micuana bahue ametana. Beju daja Diusu ja micuana ametana, cuaja yama micuana quisana batame. Micuana sa pamapa mesa jatsahuati cuana yani mesa ai tsada cuana ya puji tu eid'uainia tupu. Tuahueda micuana etsahuaenita jucha mahue epu puji tu epueicha teje. Beju Diusu ja daja micuana yatayu, cuaja mesa jamitsuti puana batame. Tuahueda micuana dharetana mesa ebacua Jesucristo neje eduneti puji.
Edue cuana jasajasajatitana
10 Edue cuana, yama micuana jubida ebajainia Echua Puji Jesucristo sa ebani su aimue micuaneda cama huamahuama yacuicuinati mahue puji, esajasajati mahue puji. Saida micuaneda medunetique. 11 Daja yama micuana equisainia, Cloé sa familia cuana ja ema quisatana putsu, micuaneda cama huamahuama yacuicuinatiani. 12 Piada piada micuaneda, “Ecuanaju da Pablo tije aji cuana”, epuani. Pia cuana micuaneda, “Ecuanaju da Apolos tije aji cuana”, epuani. Pia cuana micuaneda, “Ecuanaju da Pedro tije aji cuana”, epuani. Pia cuana micuaneda, “Ecuanaju da Cristo tije aji cuana”, epuani. 13 Beju aimue detse daja pu cua mahue. ¿Ai Cristo sajasajajiji yani bata? ¿Ai Pablo curusu su tatatana huecuana micuaneseda puji bata? ¿Ai quema ebani su micuana yahui neje jaichaderametiana bata? ¡Mahue! Cristo sa ebani su bahui. 14-16 Beidaji ema, quejucua chidi hue micuaneda yama yahui neje ichaderana putsu. Crispo, Gayo detse bahui yama ichaderana yahui neje Diusu sa puji. Estéfanas sa familia di yama ichaderana yahui neje. Mue piba ahua pia aidhe yama yahui neje ichaderana. Da putsu, aimue detse aidhe biame quema ebani su yahui neje jaichaderametiana pu cua mahue. Ema beidaji, quejucua chidi bahui yama ichaderana yahui neje putsu. 17 Beju aimue Cristo ja ema beitutana cristiano cuana yahui neje Diusu sa puji eichadera puji mahue. Ema beitutana tusa quisa saida cuana bahui quisaquisa epu puji. Tueda quisa saida cuana ema quisaquisa epuani id'abata saida mimi cuana neje aimue cristiano cuana ja ema ebia su aida ebata puji mahue. Quema mu tsada cristiano cuana ja, Cristo curusu su manuana tuna d'eji su ya puji pashanapaenita.
Cristo da bahue eni, tucheda
18 Beju ecuaneseda puji tueda curusu jepuiti ai quisa saida cuana da tucheda eni ecuana d'eji su ya puji. Castigo su eputita cuana sa tsada mahue Diusu sa curusu jepuiti ai quisa saida cuana. Tueda curusu jepuiti ai quisa saida cuana da quisa tseitsi nime tuneseda puji ebia su bahue eni ebatitani huecuana putsu. 19 Beju uja Diusu ja deremetaidha tuna jepuiti mesa quirica su:
Bahue eni cuana sa piba cuana Diusu ja etaitanamepeta.
Tuna sa piba eni cuana eichadera.
20 ¿Ai puji saida ni da bahue eni cuana pu cua? ¿Ai puji saida ye mundo sa ebuetsuaji cuana pu cua? ¿Ai puji saida jacuicuinatiji aida cuana pu cua? Beju Diusu da tuna ebia su bahue eni. Tuna sa piba bahue eni ai cuana mue ai puji saida pu cua nime ametana. 21 Cuaja shanapa taji mahue Diusu ebatani huecuana tuna sa piba bahue eni ai cuana jepuiti. Beju cristiano cuana d'eji su puta cua, Diusu sa quisa saida su jei pu putsu bahui. Tueda quisa saida neje Diusu ja cristiano cuana d'eji su yatani, bahue eni cuana ja tueda quisa saida cuana quisa tseitsi nime hue ebatani biame.
22 Judío cuana sa ai nimetiuda cuana bahui tsada Diusu peje su jei epu puji. Judío mahue cuana mu tuna sa piba bahue eni ai cuana bahui jepuiti Diusu shanapaja yadhaatani. 23 Ema judío cuana peje su, Cristo manuana tuna d'eji su ya puji, quisaquisa epuani su, cha ebia su duinini hue eputani huecuana ema neje. Daja huecha ema judío mahue cuana peje su Cristo jepuiti quisa saida cuana quisaquisa epuani su, tueda quisa saida da quisa tseitsi nime hue ebatani huecuana. 24 Beju Diusu sa judío, ahua judío mahue dharejiji cuana sa puji, tueda Cristo jepuiti quisa saida cuana da bahue eni, tucheda tuna d'eji su ya puji. 25 Diusu sa piba cuana da cristiano cuana sa piba ebia su aida, bahue eni. Cristiano cuana: “Cristo curusu su manuana quisa da quisa tseitsi nime hue”, eputani biame, daja Diusu sa tsada batana cristiano cuana d'eji su ya puji. 26 Edue cuana, mepibaenique. Diusu ja quejucua chidi hue dharetana aida, bahue eni cuana peje jenetia tuseda eputa puji. 27 Dueji cristiano nimemitsida cuana dharetana bahue eni cuana ebidhuame puji. Nimetucheda mahue, nimemitsida cuana dharetana nimetucheda, aida ebatitani cuana ebidhuame puji. 28 Aida mahue, puri cuana Diusu ja edharetani aida nimetucheda, bahue eni cuana etaitaname puji. 29 Daja Diusu ja yatani aimue aidhe biame tu butse su ebia su aida, bahue eni pabati mahue puji. 30 Diusu ja ecuana Jesucristo neje dunemetana. Cristo ja ecuana Diusu sa piba bahue eni cuana shanapametana. Ecuana saida, nimebutsepi Diusu butse su ametana. Tueda manuana ecuana d'eji su ya puji. 31 Beju uja derejiji yani: “Ahua quebata tuseda puji quitaita bahui saida mimija epu su, ebia su saida quita Diusu sa puji saida pamimi.”