Samiyɛle
Ná-Sɛʋɛi Velesiɛi
DAVIDE NÁ-MASADAI
1
Sayile ta Zonatan
ti zaa vai wo fai Davide ma
ti zaa vai wo fai Davide ma
1 Sayile ɠɛnina zaani, siɛgi zu Davide ɠaleni ma la, é ʋa, é zei Sikelage, kpegai ma ga vɔni Amalɛke nuiti ma. É folo felegɔ ɠɛɛni Sikelage. 2 Foloi zaʋasiɛi, zunui ta ɠulani Sayile ná-kɔɔlaɠai zu, é ʋa, kɔba zeɠeiti baliʋaliai ga, fufiligi ʋuuni nɔungi ma. Seeliai ma Davide ɠoba, é looni zooi ma, é nɔkɔ Davide ɠɔɠɔwu.
3 Davide gaazaɠani, é ɠɛ ma: «Mini ɠa è zeɠezu ná?» É gooɠaaʋoteni, é ɠɛ ma: «Pèlaʋɛ, gè zeɠe Izelayɛle ná-kɔɔlaɠai zu.» 4 Davide ɠɛni ma: «Lee ɠa kɛai? Nà è maanɛɛnɛzu, bo dɛɛ mà.» Naa ɠɛni ma: «Izelayɛle ɠɔɔʋɛbɛi ɓizaa kɔɔi ʋa, ti zunu mɔinmɔin paa ti zaama. Sayile ɓɔɠɔi ta Zonatan ti zaa.»
5 Davide zunu loungoi naa ɠaazaɠani, nii é ɠɛni poluvaawogi wosu, é ɠɛ ma: «È kwɛɛgɛ ɠale ga Sayile ta ná-doun zunui Zonatan ti zaa?» 6 Zunu loungoi gooɠaaʋoteni, é ɠɛ ma: «Soloogɛ nɔ kpein ga gè ɠɛa Gileɓoa gizei ma, gè Sayile ɠa, é ɗa zɛlɛ ga ná-kpɛɛin ma ungi, kɔɔɠɔ wotoloiti ta soo ɓizɛ zalaʋusuiti ti ɗa maaɓuɠa ba. 7 É wɛlɛni ʋolu, é kà, é tòli, gè ɠɛ ma: ‹Yoo, masagi.› 8 É gàazaɠani, é ɠɛ mà: ‹Ɓɛ ɠa ga ɗe?› Gè ɠɛ ma: ‹Nà ga Amalɛke nu.› 9 É ɠɛni mà: ‹Maaɓuɠa bà, è pàa. Mazɔlɔɔ gaazulatigi sòga, anɛɛ ni zɛnvui ɠa dɛ sù.› 10 Gè maaɓuɠani ba, gè paa, mazɔlɔɔ gè kaani ga é la mɔ yɛnvua ná-tooi ʋolu ma. Naa ʋoluma gè masa bɔɔlɔgi ɠula unma, gè balai ɠula zeei ʋa. Tiya ɠaa, pàaʋɛ ga tiye màliɠii ʋɔ.»
11 Davide ɠɔba zeɠeiti soni, é ti ʋaliʋali ga. Koba nuiti pɛ ti ta-zeɠeiti baliʋalini ga ga kɛʋele. 12 Ti saa wɔlɔi woni, ti ɓɔɠɔ maawɔin, ti zugi zo eyɛsu kpɔkɔ, Sayile ta Zonatan ta-vaa zu, naa ʋɛɛ Ɠɔoɠɔ GALAGI ná-kɔɔʋɛbɛi ʋa, ta Izelayɛle nuiti pɛ ta-vaa zu, niiti ti zaani kɔɔi zu.
13 Davide zunu loungoi ɠaazaɠani ʋolu, nii é poluvaawogi woni ma, é ɠɛ ma: «Mini nu ɠa ga ɗe?» Naa gooɠaaʋoteni, é ɠɛ ma: «Kɛ̀ɛ ɠa ga Amalɛke zunui ta, nii paai seikɔɠɔmai ma zooi nii zu.» 14 Davide ɠɛni ma ʋolu: «Lee vaa zu è la luani, è yeemaalega, è naama nui ʋaa, nii Ɠɔoɠɔ GALAGI yiimazeɠeai la, é gulɔi ziaai ma?»
15 Davide ná-kɔɔɠɔ nui gila tolini, é ɠɛ ma: «Ʋa, è paa.» Kɔɔɠɔ nui Amalɛke nui naa ʋaani. 16 Davide ɠɛni ma: «È zaa vai ma ungi ɠa ga ɗa ɓɔɠɔi, mazɔlɔɔ ɗa ɓɔɠɔ ɠa è ɓɔɠɔ maalɔa, siɛgi zu è ɠɛa la ma: ‹Nà ɠa gè naama nui ʋaa, nii Ɠɔoɠɔ GALAGI yiimazeɠeai la, é gulɔi ziaai ma.› »
Saa wɔlɔ wuyei Davide tooni
Sayile ta Zonatan ma
Sayile ta Zonatan ma
17 Davide saa wɔlɔ wuyei nii ɓɛtɛni, é too Sayile ta Zonatan ma. 18 É devei veeni ga ti Zuda mavofodaiti pɛ kala ga ma guyei. Guyei ʋe daa ga «Kilɛgi.» Sɛʋɛʋɛ «Telebo nui ná-sɛʋɛi» zu.
19 Izelayɛle, ɗa-ɠɔɔɠɔ nu wolaiti ti zaa, ɗa-ɠizeiti ma!
Toɠa ɠale kɔɔɠuluɓa wolaiti toai?
20 À mina ma wooi laazeeli Gate,
ma wooi mina wo Asekalɔn koi yɔɠɔzuʋɛti,
nii a kɛ Filiseti anzanu loungoiti ti mina ɠoozunɛ,
nii a kɛ tatipɛlɛʋolulala nuiti ti-loun anzanuiti ti mina guyei loo,
ti ʋa ɗa kuai wo.
21 Ee, Gileɓoa gizeiti, duɓu mina mɔ ʋu wo ma, ta tona,
tii nɔpɛ ge mina mɔ ɠɛ wo-ɠakamaʋɛti, é ʋa ɗa ɓɛtɛ.
Mazɔlɔɔ ná ɠa ɓaaɠulaai ná kɔɔɠɔ nuiti ta-ɠɔɔɠɔ zɛpɛgiti ma,
Sayile ná-kɔɔɠɔ zɛpɛgi, nii gulɔi la mɔ ziaa ma eyɛsu pɛ.
22 Zonatan ná-kilɛgi la ɠɛa ɠulazu ʋolu, aisa é ʋa sili nuiti paa,
é la ɠɛa zeɠezu kɔɔɲɔɠɔiti sɛbɛi luɠɔ,
Sayile ná-boɠa zɔkpɔi la ɠɛa ɠaaɠalesu ma,
kɛni a la losuʋɛ ɠɛɛna.
23 Sayile ta Zonatan ti ɠɛa nɛɛni nuiti bɛ, ti-zii ma voloi pɛ su,
ti la ɓalaa ɠaaɠwɛɛni saai zu.
Ti zuvilɛni, é leʋe koɠɛiti ba,
ti ɠaaɓa, é leʋe zalaiti ba.
24 Izelayɛle anzanu loungoiti, à wɔlɔ Sayile ná-faa zu,
nii é ɠɛa seɠe ɓiingiti toozu wo ɠɔba, ti ʋagai,
é ɠɛa zanu sɔɔlaiti gilizu wa-zeɠeiti ba.
25 Toɠa ɠale kɔɔɠuluɓa wolaiti toai kɔɔi zaama?
Naa ɠɛɛʋɛ ɠale, Zonatan zaai gize unmaʋɛ?
26 Zìi ɠa ɓɔlɔzu kòozu ɗa-vaa zu, Zonatan,
kɛ̀ɛloin, bɔɔla ʋagɔi nii gola ɠɛa nɛɛni bɛ̀.
Ɗa-wɔɔla vai wola ɠɛa ʋani nɔ̀un bɛ,
é ʋa é leʋe anzanui ná-nɛɛbɛi ʋa.
27 Toɠa ɠale kɔɔɠuluɓa wolaiti toai?
Toɠa ɠale kɔɔɠɔ nu wolai niiti undaaʋiligai?