Keelaiti Kɛɛwotiiti
Sɛʋɛi lɔɔzeizuʋɛ ma woo mɔungiti
Keelaiti kɛɛwotiiti ma zɛʋɛi ɠa é ga Woo niinɛ ʋagɔi zaʋasiɛi ma lodai. Nu ɠila kpegi ɠa é sɛʋɛ felegɔi niiti kɛai, daaseigi ɠa ga Luke, é ɠɛni ga ɗɔɠɔtɔlɔi ta Pɔle ziɛɲɔɠɔi. Tosu wola ɠa ná-sɛʋɛiti ba Minazeɠe niinɛi zu, mazɔlɔɔ toɠa é Egilisii lɔɔzei ʋelei zɛʋɛai.
Siɛ mɔinmɔin su, sɛʋɛi nii ɠɛni lolisu ga «Zɛnvu Ɲadegai ɠɛɛwotiiti,» tɔɔzei ná zeizu mɔinʋɛ puulɔɔlugɔ (50) ma, é ɗa ɓɔɛ é ʋilɛ Zɛnvu Ɲadegai ʋa. Luke ɠɛai ma ná-Woo niinɛ ʋagɔi zɛʋɛzu, é ɓelani nɔ naama vaiti ba, niiti Yesu ti ɠɛɛni eteai zu. Kɛlɛ é lɔɔzei niina Yesu lɛ ziɛgi ma geeɠɔlɔgi zu, Yesu ɠɛʋelei maavalibogɛ ná-kaladopoiti saama: Nu la mɔ kaa ga kpusɛi ma ɠaazuɠɛzɛgiti. Ʋele ɠana Egilisii ná-yeeɠɛɠalai lɔɔzeizu la ga keelaiti kɛɛwotiiti ma zɛʋɛi: Yesu ɠa ná-kaladopoiti saama ga ná-Zɛnvui maaʋele, nii é zɛbɛi veezu ná-kaladopoiti zea. Fai niiti ti zɛʋɛai keelaiti kɛɛwoti zɛʋɛi zu, ta pelei laalaosu Egilisii ná-botii luɠɔ feai zea ga é kɛ yeeɠɛɠalai pɛ su, nii é ga: Yesu ná-Woo niinɛ ʋagɔi laazeeli vai nuɓusɛi pɛ ma, eyɛsu zou ɓela ga.
1
Zɛnvu Ɲadegai ma minazeɠegi wo fai keelaiti bɛ
1 Teyofile: Nà-sɛʋɛ mɔungi zu, gè naati pɛ suɠulani, niiti Yesu ti ɠɛɛni, ta kalagi niiti, é ɠɛni ti wosu, mɔunpa, 2 eyɛsu naama voloi zeeli, yeei é lɛɛni la geeɠɔlɔgi zu, kpegai ma ga deveiti fe keelaiti zea ga Zɛnvu Ɲadegai maaʋele, niiti é yiimazeɠeni ga tiye. 3 Ná-kpɔlɔi ʋoluma, naati nɔ ɠa é ɓɔɠɔ lɛɛni ga tiye poo mɔinmɔin su ga toɠa vulua. Folo ʋuunaanigɔ (40) laawu, é ɠɛni ɠulazu kɛlɛma ti ʋɛ, é ɗa ɓɔɛ ti ʋɔ, é ʋilɛ GALA ná-masadai ʋa.
4 Yeeta, ti ɠɛai ma daamii wosu ʋɔɔma, é niima levei woni ga tiye, é ɠɛ ti ma: «À mina maaɠooza Zeeluzalɛme ʋa, kɛlɛ à Kɛ̀ɛ ná-minazeɠegi maaɓɔun, nii kulaai dà, gè bo wo ma. 5 Mazɔlɔɔ Zan ɓatizei woni ga ziɛi, kɛlɛ wɔun, su la mɔ ɠooza, wa ɓatize ga Zɛnvu Ɲadegai.»
Yesu lɛɛ ʋelei geeɠɔlɔgi zu
6 Tɛigiti ti ɠaalɛɛni ba, ti gaazaɠani, ti ɠɛ ma: «Màliɠii, naama ziɛgi zu ɠa è Izelayɛle masadai zeizu la ʋolu ɓaa?» 7 É ti wooɠaaʋoteni, é ɠɛ ti ma: «Wo ɓɛdɛ la ba ga wo siɛgiti ta yeeɠɛɠalaiti kwɛɛ, niiti Kɛ̀ɛ ti leʋeai ba, tɔ ɓɔɠɔi ná-zobogi zu. 8 Kɛlɛ siɛgi zu Zɛnvu Ɲadegai yeizu la wo ma, wa zɛbɛi zɔlɔɔ, wo ɠɛ ga nà-zeeleiti Zeeluzalɛme taazuʋɛ, Zudee yooi zu ná pɛ, Samali yooi zu ɓalaa, eyɛsu zou ɓela ga.»
9 Yesu ɓegai ma ga naama ɓɔɛiti bo, ti ɠaazuyɛni ba, é lɛ geeɠɔlɔgi zu ʋele, naa ʋoluma tonaɓiingi dɔɔɠuni ti ʋa. 10 Tɛi ti-ɠaazuʋɛ ɠɛni nɔ geezuʋɛ, siɛgi zu Yesu ɠɛni liizu la, zunu felegɔ ɠulani kɛlɛma ti ʋɛ, ti maaɠiliai ga seɠe ɠolegiti, 11 ti ɠɛ keelaiti ma: «Galilee nuiti, lee vaa zu wo losu, wo ɗa wɛlɛ geezuʋɛ? Yesu nii buzeɠeai wo zaama, é lɛ geeɠɔlɔgi zu, toɠa ʋa ʋolu mɔnɔ, eɠɛʋelei wo kaai la, é ɗa lɛ geeɠɔlɔgi zu.»
12 Ti ɠaleni ma Zeeluzalɛme, ti zeɠe Wolive ɠizei ma, nii é Zeeluzalɛme ɠoba, ti yɔɠɔzu ɠoozai ga kilo ɠila. 13 Siɛgi zu ti ɠaleni la ma taazuʋɛ, ti lɛɛni geezu ʋɛlɛi wu, ʋɛ ti ɓena zei ná. Tɛiti ti ɠɛni ná ti laaseigiti kaa: Piyɛlɛ, Zan, Zake, Andelee, Filipe, Tomase, Ɓaateelemi, Matiyo, Alefee ná-doun zunui Zake, Simɔn nii é ɠɛni ga Zou Maalobo Nui ta, naa ʋɛɛ Zake ná-doun zunui Zude ʋa. 14 Ti pɛ ti ɓena ɠaalɛ ba, ti ɓɔni ɠi gila ma, ti ɠaaɓa GALA falii ma, naa ʋɛɛ anzanui tanigaa ʋa, ta Yesu dee Maali, ta deɠeiti.
Zudase maavalibogi ɠaiziɛ vai
15 Naama voloiti su, Piyɛlɛ wuzeɠeni kɛɛɠɛloun ungila puufelegɔiti (120) saama, é ɠɛ ti ma: 16 «Kɛ̀ɛleaiti, kɛni GALA sɛʋɛi zu wooi a la ʋilɛ su, nii Zɛnvu Ɲadegai boni é ɠula Davide la, é ɓɔɛni ma yeeluɠɔ, é ʋilɛ Zudase ʋa, nii é loni Yesu zo nuiti tuɠɔ. 17 É ɠɛni ga ade ta, é nɔnɔ zɔlɔɔ ada-woti ɠilagi nii zu.» 18 (Kpegai ma ga zou ɠila geya ga telebotala walii, nii ti feai zea, é looni ɠɔgi ma, kogi ʋali su, koozu zɔɔlaiti pɛ ti vaza. 19 Zeeluzalɛme nuiti pɛ ti faa ɠwɛɛni su, naa ɠa é kɛa ti naama yooi laasei pɛai ga Akɛledama, ti-laawooi zu nii poluʋɛ ga «Ɲama ba yooi»). 20 «Tama, sɛʋɛʋɛ GALA sɛʋɛi ma wuye zɛʋɛi zu ga:
‹Seizuʋɛ ɲaka yɛ,
é ʋala nuɓusɛiti ma ná!›
Naa ʋolu sɛʋɛai mɔnɔ ga:
‹Taɠili ge zei potogi zu!›
21 Kɛni mu, nu ɠila ge ʋɛɛ ade ʋa, zɔiti saama, niiti ti ɠɛa ade ʋa, naama ziɛgi pɛ su ade ɠɛni lɔɔzu la, ade ɗa ɠula ada Maliɠii Yesu, 22 é zo Zan ná-ɓatizei wo siɛgi ma, é zeeli tɛɛ voloi ma geeɠɔlɔgi zu, naama nui ɠɛ ga zeelei ta, é ʋilɛ buzeɠe vai ʋa, é ɠula saai ya.»
23 Ti nu felegɔ lɛɛni: Zozɛfe nii daa ɠɛni ga Ɓalasaɓase, daasei kili ge ɠɛni ba ga Zusetuse, ta Matiyase. 24 Naa ʋoluma, ti GALA falini ɠani, ti ɠɛ ma: «Màliɠii, ɗɛi è nui pɛ ziimaʋɛ ɠwɛɛ, nu felegɔi niiti saama, naa lɛ ga giye, nii è yiimazeɠeai la, 25 nii a kɛ é Zudase losuʋɛ zeɠe, keela wotii nii zu, ʋɛ Zudase ná ɲakai yɛgai, é li ga liizu ʋele.» 26 Ti kpakutoomai ɠɛɛni, kpakui looni Matiyase ma, é ʋɛɛ niina keela puugɔ maazu ɠilagi (11) zɔiti ba.