48
1–14 Ko e teunga mo e lelei ʻoe siasi.
Ko e Hiva mo e Saame ki he ngaahi foha ʻo Kola.
1 ʻOku lahi ʻa Sihova, pea ʻoku lelei ke fakamālō lahi kiate ia,
ʻi he kolo ʻa hotau ʻOtua, ʻi he moʻunga ʻo ʻene māʻoniʻoni.
2 Ko e tuʻunga matamatalelei ʻae moʻunga ko Saione,
ko e fiefiaʻanga ʻo māmani kotoa pē,
ʻoku ʻi hono potu tokelau ʻae kolo ʻoe Tuʻi lahi.
3 ʻOku ʻilo ʻae ʻOtua ko e hūfanga ʻi hono ngaahi fale lahi ʻo ia.
4 Pea vakai, naʻe fakataha ʻae ngaahi tuʻi,
naʻa nau ʻalu atu fakataha.
5 Naʻa nau mamata ai, pea nau ofo;
naʻa nau mamahi,
pea hola.
6 Naʻe tuia ʻakinautolu ʻi ai ʻi he manavahē,
mo e mamahi, ʻo hangē ko e fefine ʻoku langā.
7 ʻOku ke maumauʻi ʻae ngaahi vaka ʻo Tasisi ʻaki ʻae matangi hahake.
8 Hangē ko ia naʻa mau fanongo, kuo pehē ʻemau mamata
ʻi he kolo ʻa Sihova ʻoe ngaahi kautau, ʻi he kolo ʻa hotau ʻOtua:
ʻe fakatuʻumaʻu ia ʻe he ʻOtua ʻo taʻengata.
Sila.
9 Kuo mau manatu ki hoʻo ʻaloʻofa, ʻE ʻOtua,
ʻi ho loto faletapu.
10 ʻO hangē ko ho huafa, ʻE ʻOtua,
ʻoku pehē ho ongoongolelei ki he ngaahi ngataʻanga ʻo māmani;
ʻoku pito ho nima toʻomataʻu ʻi he māʻoniʻoni.
11 Tuku ke fiefia ʻae moʻunga ko Saione,
tuku ke nekeneka ʻae ngaahi ʻofefine ʻo Siuta,
ko e meʻa ʻi hoʻo ngaahi fakamaau.
12 Mou ʻeveʻeva takatakai ʻi Saione, ʻo ʻalu fakatakamilo ʻiate ia:
lau hono ngaahi fale māʻolunga ʻo ia.
13 Mou vakai lelei ki hono ngaahi puke,
tokanga ki hono ngaahi fale lahi;
koeʻuhi ke mou tala ia ki he toʻutangata ʻe hoko.
14 “He ko e ʻOtua ni ko hotau ʻOtua ʻo lauikuonga pea taʻengata:
te ne tauhi ʻakitautolu ʻo aʻu ki he mate.”