Carta hua̱ntu̱ titzokniko̱ca̱ Hebreos
XATAPAJMUJUN TACHIHUIN:
Cumu yama̱ judíos na̱ li̱tapa̱cuhui̱ko̱y hebreos, huatiyá̱ ma̱x hua̱nti̱ ca̱lakmaca̱nca̱ yuma̱ carta, ma̱squi ni̱ catzi̱cán xatí̱ luhua tzokli. Hua̱nti̱ tzokma̱ yuma̱ carta xcatzi̱ni̱t pi̱ lhu̱hua̱ yuma̱ hebreos hua̱nti̱ xli̱pa̱huanko̱ni̱t Cristo aya xakxtakmakamputunko̱y xtaca̱najlacán laqui̱mpi̱ nia̱lh huij nahuán hua̱ntu̱ xpa̱lacata naca̱li̱putzasta̱lacán. Ma̱akpuhuanti̱ni̱ko̱y, ma̱huixca̱ni̱ko̱y pi̱ chunatiyá̱ aksti̱tum cali̱pa̱huanko̱lh Cristo ma̱squi lhu̱hua̱ hua̱ntu̱ calakchinko̱lh tali̱puhuá̱n xa̱huá̱ tapa̱tí̱n chuná̱ la̱ntla̱ pa̱ti̱ko̱ni̱t yama̱ xalakmaka̱n xnatla̱tnacán hua̱nti̱ Dios xlacsacko̱ni̱t.
Acxni̱ xlacán xmacpuhuanko̱y nia̱lh luhua xca̱najlako̱y pala yama̱ Cristo hua̱nti̱ xli̱pa̱huanko̱ni̱t xli̱ca̱na̱ xkalhi̱y li̱tlihuaka̱ pi̱ namakta̱yako̱y c-xtapa̱ti̱ncán, xlá̱ ma̱lulokniko̱y pi̱ ni̱ chuná qui̱taxtuy, porque yamá̱ hua̱nti̱ xli̱pa̱huanko̱ni̱t a̱tzinú lhu̱hua xkalhi̱y xli̱tlihuaka, chu̱ tlanca xlacatzúcut ni̱ xahua la̱ntla̱ tu̱ kalhi̱ko̱y xli̱pacs lactali̱pa̱hu chixcuhuí̱n, usu ángeles.
Yuma̱ judíos xkalhi̱ko̱y lhu̱hua̱ xamaka̱n xnatla̱tnacán hua̱nti̱ xli̱ca̱na̱ lactlanca, chu̱ lactali̱pa̱hu chixcuhuí̱n xuanko̱ni̱t, pero xlá̱ lacatancs ma̱siyuy pi̱ Cristo a̱tzinu̱ tlanca xlacatzúcut, chu̱ ni̱tí̱ ma̱lakcha̱ni̱y ti̱ xala ca̱tuxá̱huat: ma̱squi hua̱ profetas, chu̱ ángeles, chu̱ yama̱ xamaka̱n lactali̱pa̱hu chixcuhuí̱n la̱ntla̱ Moisés, Josué, chu̱ yama̱ lactlanca xanapuxcun pa̱lijni̱ hua̱nti̱ xamaka̱n quilhtamacú̱ xlama̱kó̱, chu̱ hua̱nti̱ Dios xma̱xqui̱ko̱ni̱t xamaka̱n xtalacca̱xlán. La̱ntla̱ pu̱lacatunu̱ hua̱ntu̱ li̱chihui̱nán yuma̱ carta stalanca huan pi̱ Cristo a̱tzinu̱ tlanca xlacatzúcut ni̱ xahua xli̱pacs a̱makapitzí̱n hua̱nti̱ xlatama̱ko̱ni̱t, sa̱mpi̱ xlá̱ xli̱ca̱na̱ pi̱ huá̱ xCam Dios.
Na̱ chuna li̱tum li̱taxtuy xpa̱lacata yama̱ takalhí̱n hua̱ntu̱ xmakni̱ko̱y xpa̱lijnican judíos ca̱ta ca̱ta c-tlanca xtemplo̱ Dios tu̱ xuí̱ c-Jerusalén, chu̱ xli̱lakataquilhpu̱tanancán xkalhni c-xlacati̱n Dios, lapi̱ puhuanko̱y pi̱ yuma̱ xkalhni takalhí̱n xka̱lhi̱y xlakasi naxapaniko̱cán xtala̱kalhi̱ncán, pus xali̱huacá̱ kalhi̱y xlakasi xkalhni Cristo. Sa̱mpi̱ acxni̱ Cristo ni̱lh c-cruz, nia̱lh xlacasquinca xuani̱t pi̱ ca̱ta ca̱ta nastajmakanicán xkalhni tantum takalhí̱n laqui̱mpi̱ chuná xoko̱nancani̱t nahuán xtala̱kalhi̱ncan chixcuhuí̱n, sa̱mpi̱ acxni̱ Cristo maktum tu̱ tamacamá̱sta̱lh laqui̱mpi̱ namakni̱cán, yama̱ xkalhni̱ hua̱ntu̱ stajmákalh li̱táxtulh c-xlacati̱n Dios xta̱chuná̱ la̱ntla̱ aktum xtaxoko̱n tala̱kalhí̱n hua̱ntu̱ ma̱tla̱ni̱y.
Na̱ chuna li̱tum li̱taxtuy xpa̱lacata yama̱ tajaxni̱ hua̱ntu̱ judíos xputzako̱y c-xlatama̱tcán, chu̱ niucxni̱ xta̱ksko̱y sa̱mpi̱ macpuhuanko̱y pala kalhi̱y xlakasi cumu niucxni̱ lay lacatancs xcatzi̱ko̱y lapi̱ xtala̱kalhi̱ncán xli̱ca̱na̱ chuná̱ tla̱n li̱xapaxtucani̱t.
1
1 Maká̱n hasta la̱ntla̱ mini̱tanchá̱ quilhtamacú̱ Dios caj xli̱maka̱sna̱ xmacaminti̱lhay xpa̱lacachihui̱naní̱n huanicán profetas laqui̱mpi̱ nama̱catzi̱ni̱ko̱y xtalacapa̱stacni̱ xamaká̱n quinatla̱tnacán, chu̱ maklhu̱hua̱ chuná̱ xakatli̱ko̱lh. 2 Hua̱mpi̱ hua̱ la̱ntla̱ ca̱la̱nchuj quilhtamacú̱ xlá̱ macamini̱t xCam Jesucristo laqui̱mpi̱ naquinca̱li̱ta̱chihui̱naná̱n xtalacapa̱stacni. Hua̱ xCam ti̱ timaktláhualh pacs tu̱ anán c-akapú̱n, chu̱ ca̱tuxá̱huat, na̱ hua̱ xlá̱ ti̱ Dios li̱lhca̱ni̱t pi̱ xma̱la̱ná nahuán pacs caxatu̱cahuá̱ tu̱ anán. 3 Antá̱ c-xlatáma̱t yama̱ xCam Dios ma̱siyuy la̱ntla̱ xli̱tlanca̱ xca̱cni, chu̱ xli̱tlihuaka̱ kalhi̱y xtla̱t Dios sa̱mpi̱ luhua xta̱lakxtápalh hua̱ la̱ntla̱ta Dios, chu̱ acxtum kalhi̱ko̱y tu̱ huatiya̱ xlakasicán, chu̱ xtalacapa̱stacnicán; chu̱ caj xpa̱lacata xtachihuí̱n tama̱ xCam Dios la̱ntla̱ kalhi̱y xli̱tlihuaka̱ makcatzi li̱anán xli̱pacs tu̱ anán. Na̱ hua̱ xlá̱ ti̱ quinca̱xapanikó̱n xli̱pacs hua̱ntu̱ xkalhi̱ya̱hu quintala̱kalhi̱ncán la̱ntla̱ ni̱lh c-cruz, a̱li̱sta̱lh tiampá̱ c-akapú̱n, chu̱ antá̱ titahui̱ c-xpakstacat Dios c-xpu̱ma̱paksí̱n anta̱ni̱ li̱pe̱cua̱ kalhi̱y xli̱ca̱cni.
XCam Dios a̱tzinu̱ tlanca xlacatzúcut ni̱ xahua ángeles
4 Cumu xma̱n hua̱ Cristo lákcha̱lh pi̱ xCam Dios nali̱tapa̱cuhui̱y chuná̱ li̱ma̱síyulh pi̱ xlá̱ ti̱ tlak kalhi̱y xlacatzúcut, ni̱ xahua ángeles sa̱mpi̱ ni̱tí̱ xlacán chuná̱ li̱tapa̱cuhui̱ko̱y yama̱ aktum li̱ca̱cni tapa̱cúhui̱t. 5 Sa̱mpi̱ la̱ntla̱ xli̱pacs minko̱ni̱tanchá̱ quilhtamacú̱ niucxni̱ chuná̱ yamá̱ huanini̱t Dios cha̱tum ángel:
“Huix quincam,
sa̱mpi̱ quit ca̱la̱nchú̱ chuná̱ cli̱ma̱xtuyá̱n.”
Na̱ a̱lacatum c-Li̱kalhtahuaka̱ chuna̱ na̱má̱ li̱chihuí̱nalh:
“Quit xtla̱t nacuán,
chu̱ xlá̱ Quincam nali̱taxtuy.”
6 Na̱ chuná̱ acxni̱ xlá̱ macámilh yama̱ xma̱n hua̱ cha̱stum xapuxcu xCam ca̱tuxá̱huat, chuna̱ na̱má̱ huá̱:
“Hua̱ calakataquilhpu̱tako̱lh xli̱pacs ángeles.”
7 Pus maktum acxni̱ Dios li̱chihui̱nanko̱lh xángeles, chuna̱ na̱má̱ huá̱:
“Tama̱ quiángeles caj quilacscujní̱n, anko̱y anta̱ni̱ cma̱lakacha̱ko̱y.
Lakachuní̱n la̱ u̱n lacapala̱ anko̱y, lakachuní̱n la̱ lhcúya̱t, usu maklípit.”
8 Hua̱mpi̱ luhua tanu̱ li̱chihui̱nán xCam, hua̱ yumá̱ tu̱ huan xpa̱lacata:
“Huix tlanca tali̱pa̱hu Dios, ni̱ kalhi̱y xtamáctat la̱ntla̱ nama̱paksi̱nana;
sa̱mpi̱ hua̱ntu̱ aksti̱tum nali̱ma̱paksi̱nana̱ c-mimpuma̱paksí̱n.
9 Huix lakmakani̱ta̱ hua̱ntu̱ li̱xcájnit, chu̱ ma̱tla̱ni̱ni̱ta̱ nama̱kantaxti̱ya̱ hua̱ntu̱ aksti̱tum,
huá̱ xpa̱lacata, quit, mintla̱t Dios, cli̱lhca̱ni̱tán xapu̱chiná nahuana;
laqui̱mpi̱ a̱tzinú̱ tla̱n, chu̱ li̱pa̱xuhu nama̱paksi̱nana,
ni̱ xahua ti̱ a̱makapitzí̱n hua̱nti̱ na̱ xta̱ma̱paksi̱putunkó̱n.”
10 Xa̱huachí̱ c-aktum salmo chuna̱ na̱má̱ li̱chihui̱nancán:
“Huix Quimpu̱chinacán, hasta la̱ntla̱ xakasiyaj quilhtamacú̱ huix ma̱lacatzuqui̱ni̱ta̱ ca̱tiyatna, chu̱ la̱ntla̱ tu̱ caxatu̱cahuá̱ anán;
chu̱ mimacán ma̱n li̱tlahuani̱ta̱ akapú̱n.
11 Xli̱pacs yumá̱ tu̱ ma̱lacatzuqui̱ni̱ta̱ namín quilhtamacú̱ pacs nalaksputko̱y,
hua̱mpi̱ hua̱ huix, ni̱ kalhi̱ya̱ mili̱sputni̱ la̱ntla̱ lápa̱t nahuán.
Hua̱mpi̱ xlacán pu̱tum nalaksputa̱ la̱ mactum lháka̱t hua̱ntu̱ lakuán chu̱ nia̱lh tla̱n.
12 Huix nakapsa̱ xta̱chuná̱ la̱ntla̱ mactum lháka̱t,
chu̱ nali̱lakpali̱ya̱ xasa̱sti chuná̱ la̱ntla̱ acxni̱ talakxtunancán.
Hua̱mpi̱ hua̱ huix, chunatiyá̱ lápa̱t nahuán,
sa̱mpi̱ milatáma̱t niucxni̱ laksputa.”
13 Xa̱huachí̱ Dios ni̱ pala maktum xuánilh cha̱tum ángel:
“Caquimpa̱xtu̱tahuila̱ u̱nú̱ c-quimpakstácat,
xli̱makua̱ nacmakatlajako̱y xli̱pacs hua̱nti̱ ta̱la̱tlahuako̱yá̱n
laqui̱mpi̱ a̱li̱sta̱lh pacs nalakachixcuhui̱ko̱yá̱n.”
14 Sa̱mpi̱ xli̱pacs yuma̱ ángeles hua̱nti̱ scujnima̱kó̱ Dios, pacs caj spíritu, ni̱ tasiyuko̱y; macaminko̱cán u̱nú̱ laqui̱mpi̱ namaktakalhko̱y xli̱pacs hua̱nti̱ lacsacko̱ni̱t nama̱akapu̱taxti̱ko̱y xli̱stacnacán.