Song bilong Solomon
Tok i go pas
Dispela buk ol i raitim olsem song, tasol ol wan wan hap bilong song i gat tok ol man na meri i autim. Long sampela hap wanpela man i singim song long meri em i laikim tumas na long sampela hap dispela meri i bekim tok bilong dispela man. Ol kain kain gutpela tok piksa i pulap long tok bilong tupela, na ol i soim klia bikpela amamas man i save pilim long meri na meri i save pilim long man.
Long planti ol arapela buk bilong Baibel, ol profet na ol arapela man i bin tok piksa olsem ol Israel i olsem meri bilong God. Olsem na taim ol Israel i ritim dispela buk ol i ting em i soim yumi long gutpela pasin bilong God, long wanem, em i laikim tumas ol Israel, na ol i laikim tumas God. Na sampela Kristen i save lukim dispela buk olsem piksa bilong Krais i laikim tumas sios bilong em na sios i laikim tumas Krais.
Long buk Stat, God i wokim man na meri bai tupela i ken pas wantaim (lukim Stat 2.24). Dispela buk i strongim dispela tok, na i soim yumi olsem, sapos God i givim gutpela man o meri long yu, yu ken amamas tru long dispela presen bilong God.
Sapta 1
Dispela 1 Kin 4.32 song em i gutpela song na i winim olgeta song. Solomon yet i bin raitim dispela song.
Song namba wan
Yangpela meri i singim song olsem
Planti taim yu save kis long mi
na mi laik bai yu mekim olsem
moa yet.
Yu laikim mi na yu dai tru long mi.
Dispela i namba wan samting
na i winim swit bilong gutpela wain.
Skin bilong yu i gat gutpela smel.
Mi harim nem bilong yu
na mi amamas,
olsem mi save amamas
long gutpela sanda.
Ol meri i save laikim yu tumas.
Yu kisim mi na yumi ranawe i go.
Yu olsem king bilong mi,
na yu kisim mi i go
long rum bilong yu.
Bai yumi amamas wantaim.
Yu save laikim mi tumas,
olsem na yumi amamas tru.
Amamas bilong yumi i winim amamas
bilong ol man i laikim wain.
Yu moa yet.
Olsem na olgeta meri
i pundaun tru long yu.
Yupela ol meri bilong Jerusalem,
harim.
Skin bilong mi i blak,
tasol mi naispela tumas.
Skin bilong mi i blak
olsem ol haus sel bilong ol Kedar
long ples drai.
Tasol mi naispela tumas
olsem ol naispela laplap
i hangamap i stap
long haus bilong King Solomon.
Tru, skin bilong mi i blak,
tasol yupela i no ken ting
mi olsem wokmeri nating.
San i kukim mi
na skin i kamap olsem.
Ol brata bilong mi i bin kros long mi
na mekim mi i go
lukautim ol gaden wain.
Olsem na mi no inap lukautim gut
skin bilong mi yet.
Yu gutpela pren, mi laikim yu tumas.
Bai yu bringim ol meme bilong yu
i go we?
Bai ol i go long wanem hap
bilong painim gutpela gras
bilong kaikai?
Na long biksan bai ol i go hait we?
Yu tokim mi
na bai mi no ken hatwok
long painim yu.
Sapos yu no tokim mi
bai mi mas kisim laplap
na karamapim pes bilong mi
na painim yu namel long ol meme
bilong ol arapela wasman.
Yangpela man i singim song olsem
Pren bilong mi, yu naispela meri tru.
Sapos yu laik lukim mi,
orait yu bihainim mak bilong lek
bilong ol meme.
Yu bihainim i go
na bai yu lukim gutpela gras
bilong ol meme bilong yu
i ken kaikai.
Dispela gras i stap
klostu long ol haus sel
bilong ol wasman bilong sipsip.
O yu naispela pren bilong mi,
bilas bilong yu i gutpela,
olsem bilas bilong ol hos
i pulim karis
bilong king bilong Isip.
10 Ol bilas i hangamap
long gras bilong yu
i mekim pes bilong yu i lait.
Na yu putim ol gutpela bis long nek
na nek bilong yu i lait tru.
11 Tasol bai mipela i wokim
sampela bilas gol
na ol arapela bilas silva,
na bai mipela i givim yu.
Yangpela meri i singim song olsem
12 King bilong mi i slip
long bet bilong en,
na em i smelim gutpela sanda
mi bilas long en.
13 Pren bilong mi, mi laikim tumas,
em i olsem wanpela mekpas paura
i gat gutpela smel
na i slip long bros bilong mi.
14 Na em i olsem ol plaua
i gat gutpela smel
na i save kamap long ol gaden wain
bilong Engedi.
Yangpela man i singim song olsem
15 Yu naispela meri tru
na mi laikim yu tumas.
Na yu tu yu laikim mi
olsem na ai bilong yu i lait.
Yangpela meri i singim song olsem
16 Pren bilong mi, yu gutpela tumas.
Yu moa yet
na mi amamas tru long yu.
Dispela gutpela gras
i olsem bet bilong yumi.
17 Dispela ol han bilong ol diwai sida
i olsem pilo na sapnil
bilong haus bilong yumi.
Na ol diwai pain i olsem rup
bilong dispela haus.

1:1: 1 Kin 4.32