Mepepelime ma Taꞌatsu ma
Yahaya
Ucuɗuwu wa aatagada a nda
A̱yi nda a̱yi ɗa mepepelime ma taꞌatsu ma na Yahaya ɗanai. E mepepelime ma nda, u damma u ta ɗanasaa Gayu iꞌutsa̱ ya̱ a̱ɓula̱ ya̱ yi.
Yahaya ɗanaa ta̱ Gayu a cuwusa yi cine u kambai munlu ma̱ a̱za̱ e Itoni ma amayun a mantsaꞌa. U yuwan ta̱ fo adanshi a Diyotarifi, za na ꞌyuwain a kamba aza a na o ritoi amayun.
Ana Yahaya yuwaan ntsu adanshi a ama e re a nda, u roco tsu ta̱ iroci i wuma i saꞌani na̱ wuma u babu ulobonu.
Ili i na i ri pe a̱tsuma̱ a aatagada a nda
1. Ica̱su a̱ tyo ya Gayu (1-4)
2. Ulobonu wu mmalu oɓolo (5-12)
3. Ica̱su yu Ukosu (13-15)
1
Ica̱su
A̱mu, Yahaya zagbain,* Danshi Tsuheleni pa nda ta yuwusan adanshi adama a aabara ana zagbain. a̱mu ɗa maa ɗanasaa wu mepepelime ma nda, iꞌutsa̱ i va̱ Gayu. N ciga wu ta̱ adama a na tsu to tono amayun.
Iꞌutsa̱ i va̱, n ta yuwusaan wu avasa adama ili suru i wala wu mejege, waru vu da̱na̱ na̱ lafiya lipu cine n revei asuvu a̱ wu a̱ ri a̱tsuma̱ e Itoni. N za̱nga̱na̱ ta̱ lon ana a̱za̱ e Itoni o ro a̱ ta̱wa̱i a damma numu adama a amayun a wuma a̱ wu na̱ cine voo tono ure wa amayun. N tsu yuwan ta̱ ma̱za̱nga̱ kuci na̱ mu uwwa a na muwun n va̱ n to tono ure wa amayun. Babu ili i ro i na i laꞌai ili i ndolo ma̱za̱nga̱.
Iꞌutsa̱ i va̱, vu ta yuwusan ili ya̱ a̱ɓula̱ adama a na vaa kambusa munlu ma̱ a̱ɓula̱ aza a na a̱ ri a̱tsuma̱ a mmalu, ko na wo oꞌwoi omocin a ɗa e ekere a̱ wu. A damma ta̱ a̱za̱ e Itoni adama e icigi ya̱ wu. N ta patishi wu vu kamba le o ure u na A̱sula̱ aa uwwa uyoꞌo na a lyuwa elime a̱tsuma̱ a mmalu n na aa yuwusan. A baza ta̱ a̱tsuma̱ a mmalu n le tsa̱ra̱ a yuwaan Yesu Kristi Zamawawa a̱ga̱nda̱. A̱ tsu ushi ili i ro e ekere a aza a na koto o oꞌwoi a̱za̱ e Itoni shi. Adama o ndolo a̱tsu na aciya̱tsu tsu kamba nle tsa̱ra̱ tsu lingai oɓolo adama a amayun.
N ɗanaa ta̱ ɗe a̱a̱ꞌisa̱ mokoɗi me mepepelime, amma Diyotarifi vuma na cigai wo oꞌwo zagbain a̱tsuma̱ e le, u ꞌyuwan ta̱ a uwwa tsu. 10 Na̱ n ta̱wa̱ n ta damma ili i ro i na waa yuwusan na adanshi a vama a na waa yuwusan a aci a̱ tsu. Ili i na i laꞌai usa̱n a̱yi ɗa, u ꞌyuwan ta̱ a̱ usu munlu nna n ta̱wa̱i. Hali waru u tiga̱ ta̱ aza a na a cigai a raba le, reve u lo le a̱tsuma̱ a̱ a̱a̱ꞌisa̱.
11 Iꞌutsa̱ i va̱, she vu toni ili i na i ri iwuya wan, amma vu toni ili i na i ri ulobonu. Za na a yuwusan isaꞌani suru vuma va̱ A̱sula̱ ɗa. Amma za na a yuwusan iwuya koto u reve A̱sula̱ shi. 12 Ama suru a ta yuwusan adanshi a saꞌani adama a Dimitiriya, waru wuma u saꞌani wa̱ yi u roco ta̱ a na vuma va̱ a̱ɓula̱ ɗa. A̱tsu fo tsu ta yuwusan adanshi a saꞌani adama a̱ yi. Waru vu reve ta̱ ili i na tsu dammai suru amayun a ɗa.
Idanshi yu ukosu
13 N ta̱ ni ili i na n cigai n damma wu na̱ a̱bunda̱, agba n ciga n ɗana le a̱ a̱a̱vuꞌun shi. 14 N ta majiyan n ta̱wa̱ uba̱ta̱ u ɗu goꞌo, a̱vu tsu yuwan adanshi esu esu.
15 Avasa a̱ va̱ a ɗa A̱sula̱ a zuwaa wu abaꞌun a asuvu nden! Nꞌutsa̱ ma̱ wu pa nda suru a̱ ta̱ ca̱sa̱sa̱ wu. N te ipati ya̱ wu vu ca̱sa̱ nꞌutsa̱ suru ɗe na ala. Adanshi a̱ A̱sula̱ o ro a̱ ta̱ na̱ guzu 14 amma ozo o ro a̱ ta̱ na̱ guzu 15, amma ele adanshi a̱ ta̱ a ɗa aa yuwusan babu za na ka̱la̱ma̱i ni ili i ro, aɗangulu a ɗa goon.

*1:1 Danshi Tsuheleni pa nda ta yuwusan adanshi adama a aabara ana zagbain.

1:15 Adanshi a̱ A̱sula̱ o ro a̱ ta̱ na̱ guzu 14 amma ozo o ro a̱ ta̱ na̱ guzu 15, amma ele adanshi a̱ ta̱ a ɗa aa yuwusan babu za na ka̱la̱ma̱i ni ili i ro, aɗangulu a ɗa goon.