Gwo jin ’Kwar ma Buulus gom ’Kwani gi Pam P̱ILIBBI mo
1
Monthe Me’d
ABuulus dhala Ṯimuṯẖawuus kun ta c̱iŋkina/ goma Ḵrisṯẖos jin ta’da Yesus mo.
E uni ’baar mo kun dhunu mo ki she/ ki dhelel dhelel eya Ḵrisṯẖos jin ta’da Yesus mo, e uni gun ’kon mo e Pam P̱ilibbi nyaḵki ’kwaniŋ gwanyjaḵa/ ma ḵaniisa dhali uni gun cila to hil mo.
A’the e um mo dhali moŋḵu’th is ’peni Arumgimis jin ta’da Babam bana dhali Tap̱a Yesus Ḵrisṯẖos mo.
Mon’tho ma Buulus gom ’Kwani gi Pam P̱ilibbi kun Ta Imangam Gwo Is mo
Aha/ ’bora Arumgimis pem bwa i is mo ap̱owa ris mom pem jin kaka/ um e mo be. Isa yampa/ eya ’thom pem mo gom umi ’baar mo mmomii mon’thom pem ki bwaŋ ’kunyga/ mo. Mmo’bora ’bor bwa i is mo gom gwom ’borga/ jin nyaḵu um pwaḵ ki aha/ ’pena tee jin ṯwa/a/ ntagi shwane/ mo be. Dhali aha/ misha ka jiŋ gana/ ki a’di jin ṯelki’da ṯu’c jin ’boro’d ’pen e um mo tani midi ’baar a’di mo ka tee ma Yesus Ḵrisṯẖos mo be. A’di ’boro’d ki ’bor gana/ mo gom aha/ mmokulum gwo i bwa mo gom umi ’baar mo kansan mo haali/ aha/ dhuna um eya dum pem mo haali/ aris umi ’baar mo nyaḵu/ a’the pwaḵ ki aha/ mo me’d jin dika/ eya sijin mo dhali mmo’ce’d gwo she/ mo dhali mmoṯel gwom ’borga/ sho’k mo. Haali/ Arumgimis ta’da man/o gwo gom aha/ mo mmo’kosha ṯe/ aha/ mo gom umi ’baar mo ka du ma Ḵrisṯẖos jin gama gam mo jin ta’da Yesus mo. Dhali a’di ita mon’thom pem ki mo/en bum mini ish ki nyanye/ ki nyanye/ mo nyaḵki yuḵ ilu/ mo dhali mmonyiṯẖa ris to ’baar mo. 10 Wakan ki um mini ṯes to kun ’boron ki ’bor gana/ mo dhali mmota kun dhelelin mo dhali kun dar gi mii m’ba/ mo goma tee ma Ḵrisṯẖos mo be. 11 Mmo’tu’d mo ki maman gi mo ma ḵar/e jin p̱u’du’d ’pena Yesus Ḵrisṯẖos mo mmota monyca mo dhali momaŋ ma Arumgimis mo be.
Gom Aha/ Mmodi mo tani A’di Ta’da Ḵrisṯẖos mo
12 Aha/ ŋap̱a um mmomish mo mo, iwaḵ, gom to gun mii aha/ mo ka jiŋ gana/ tani a’di ta ’pemen mmop̱al gwom ’borga/ mo be. 13 Dhali wakan mondeḵ pem goma Ḵrisṯẖos a’di wara’d ki mo jin mishu mo isi ki tur mo e uni gun dhunu mo mmohil gu’b ma mudhiir e mo jin jin ma askar ma Ithaaliya aji mo dhala ris unin tiya si’da/ mo. 14 Dhali awaḵa tiya ka ris bu’thkina du mo e Tap̱a gom mondim pem eya sijin mo dhali uni dar ma du mo ki nyanye/ mmoṯor gwo ma Arumgimis ki dar gi moŋḵo/ is mo be.
15 Kun tiya ka jiŋ gana/ c̱i gwo goma Ḵrisṯẖos ’peni bwa shigga/ mo dhali mmobira bir si’da/ mo hili kun tiya si’da/ ki bwaŋ gana mo be. 16 Ku gi ’ban yansan mii a’di ki mo/en mmomisha uni ki aha/ karkunu mo gom gwo mmo’ce’d she/ mo gom gwom ’borga/ mo. 17 Ku gi ṯwa/a/ c̱i gwo goma Ḵrisṯẖos ’peni bwa jin ḵwa/u mo tani yisa ki bwaŋ gana/ mo hili uni kulumki gwo ibwa mo mmoṯo’c aha/ ’kus mo e mondim pem eya sijin mo be. 18 Gomata ’te/. Jasi eya ris mii ’baar mo waḵki/ mii jin p̱wanu/ ’te/ mo walla e gwoŋ gana/ mo tani aḴrisṯẖos c̱ikunu ’twa/ maŋ mo dhali e a’di yan kantan mo tani aha/ ’kunykina bwa mo be.
19 Nye, dhali aha/ mina bwa ’kuny mo. Haali/ aha/ misha ka ’thom bum jin ’thokina um mo dhali mowoṯẖ gi Shi/in ma Yesus Ḵrisṯẖos kan mo tani a’di ṯu’kki mii is mo mmo’cuḵ aha/ mo be. 20 Me’d jin tana a’di moŋganan ’bam pem mo dhali mo ma ’teŋ kap̱e/ mo ki aha/ mina isi diki ’theya ’the ki sule/ mo tani hili ka du jin roc̱u sho’k isi bwaman mo shwane/ me’d isa yempa/ mo tani aḴrisṯẖos minu eh mo e buŋgwar is pem mo waḵki/ a’di ta mondiki/e walla mowu mo. 21 Haali/ gom aha/ mmodi mo tani a’di ta’da Ḵrisṯẖos mo dhali mmowu mo tani a’di ta nyunycina/ mo be. 22 Waḵki/ a’di ta mo gi ’konu ki e e buŋgwar is mo tani a’di ta ’pemen mmoḵal maman goma ṯu’c pem mo. Hili aha/ mola ṯor naskina/ a’di jin miga/ kwany mo. 23 Aha/ budha bwa ka yissa/ mo. Bwa oyaa/ ki ḵwa/ is mo dhali mmonyaḵ di eya Ḵrisṯẖos mo haali/ a’di ’boro’d ki ’bor gana/ mo be. 24 Hili mmodi mo ki buŋgwar is mo tani a’di minu mii mii mo gom gway bum mo be. 25 Dhali mmomishga/ yan ki isa duŋ gana/ mo tani aha/ misha ki aha/ mina di mo dhali rash c̱a’b mo e umi ’baar mo gom moŋḵal iim bum mo dhali bwaŋ’kunygam bum mo e moŋgam gwo is mo. 26 Wakan e aha/ mo tani ki um mini ta gi ’kup̱ mii mo kun mini ish ka enthus mo mmodhu ’ba/ eya Ḵrisṯẖos jin ta’da Yesus mo gom mmomiga/ p̱u’dku/ doḵ/e e um mo be.
27 Jasi a’di imina umi mii mo: Dhali dhalki um ta kum paŋ gana/ mo kun mini ha me’d mo gom gwom ’borga/ ma Ḵrisṯẖos mo. Wakan waḵki/ aha/ mina yaku/ mo dhali p̱ar um e mo walla aha/ mina p̱i mo tani aha/ mina ’taki ciḵ gwo gom um mo ki um ṯelki sho’k mo e shi/ina ’de/ mo ka dun ṯal ’de/ mo mmobira bir ki ’ban kuku/ mo gom moŋgam gwo is gi gwom ’borga/ mo be. 28 Dhali mmo’koki ḵo/ is gom toŋ kamu/ ṯal ’de/ mo ’peni uni gun asa uma p̱o/ mo. A’di ta to jin ṯoru eya tente/ mo gom uni mo mmo’kol e ki me’d mo gom mony’ce’d sho’k buni mo hili gom bway mowoṯẖ bum mo tani dhali a’di yan ’peni Arumgimis mo be. 29 Haali/ a’di c̱ikunu um mo gom gway ma Ḵrisṯẖos mo tani ki um mini ’taki ’koki gam a’di gwo is jasi ’te/ mo hili um si’da/ mina isi ’kosh ka nyor gom gway piti mo be. 30 Mmomal e e moŋ’kosh mii yan a’di jin p̱arkina um e mo dhali jin ciḵkina um jin di’d e aha/ shwane/ mo be.