1 ✡Psa 51Anina ma Bada peroveta Nathan i paritawanei David awarina ma i riwei i pa, “Nelara ruaḡa au taon tagogina i mae, oroto tagogi manemanena ma maumaurana ma gelauna molamolakana. 2 Ravana manemanena awarina sipu ma bulumakau maḡamaḡaui. 3 Wate ravana molamolakana sipu natuna wavinena i gimarai, ma natunatuna maiteni i ḡamoi da i rata, molamolakana ana sipu tagotago. Ana lam momoḡina sipu i aniani ma waira ana au kelaka i umaumai ma au arona i matamatave, wei lamna me tauna natuna guguinina.

4 —Marina taomana i nei oroto manemanena ana au numa, ma oroto manemanena eḡa ita ḡoei da ana sipu bo bulumakau ita vunui da ana taomana ana lam ita vokaukauei. Eḡa, tauna oroto molamolakana ana sipu natuna wavinena i vunui ma i vitavi ma ana taomana i verei.”

5 Nai maranaina David i meji guratana ma Nathan awarina i ḡaiawa, “Bada lawalawaina wavanei a ririwa da aiai wei kauana i kauei anina ina iraḡe! 6 Kaua apoapoe kaukauana i kauei lamna aubaina sipu ḡaubona 4, orotona molamolakana ina verei.”

7 Anina ma Nathan David i riwei, “Tam nai ravana! Wei lamna aiwai Bada Israel ana God i riwei, ‘A vinem da Israel ana gulau ma Saul au urana a vaitawanem. 8 Ma am bada Saul ana vibadana ma ana buderi a vere-tawanem ma awawana au uram a terei. Ma nanare a terem da Israel ma Judah u vibadei. Mepa da wei anatapui i muomuo ḡuratana awarim, tagotagogina au tepana ata viaitepatepani. 9 Aiwai aubaina riwau bagibagina u rau-aḡaiḡaiei? Aiwai aubaina wei kauana apoapoena u kauei? Uriah Hitti ei sodei u piaḡi; awana mai Ammon ai sodei u viraḡeni. Ma awana u vaia da awam. 10 U rau-aḡaiḡaieu ma Uriah awana u vaia da awam lamna aubaina am au numa viḡaiḡaiawa ina mae-nonoa.’

11 —Bada wei e ririwei, ‘Tau aburuna ava da apoapoena ana neiai am au numa. Au matam awawam ana vaia ma oroto au ririvam ana verei. Ma tauna awawam maiteni ina matave, patara au matai. 12 Tam u kauana-ḡovaḡei wate tau madeḡai ana kauei, mai Israel au matai.”

13 David Nathan i riwei, “Tau, Bada awarina a kauana-boai!”

Nathan, David i riwei, “Ee wate God am apoapoe e vaivai-tawanei. Tam eḡa ma iraḡe. 14 Wate kaua apoapoena u kauei ma lamnei Bada u vijiboḡa-kauei lamna aubaina natum ina iraḡe.”

15 Nathan i nae ana au numa. Ma Bada doria i paritawanei David ma Uriah awana, natui awarina ma i doria kaua. 16 David i raupari guratana God awarina natuna aubaina. Am i voterei ma i rui ana au numa ma au debidebi i matamatave. 17 Ana numa babadai i nei awarina, da au debidebi ita voepai ma maiteni ita am, wate i geduai.

18 Aupom 7 au murina tevera i ʼraḡe ma ana numa babadai i rovo da David eḡa ita pariverei. Taui ava i babani vivira i pa, “Maranai tevera lawalawaina David eḡa ita rautaniḡaneta ma marina menanare tana riwanei da natuna i ʼraḡe? Mepa da ina viapoapoena-melei!”

19 David i ʼnanai ana taunola i pari-ararava ma i aramanei da natuna i ʼraḡe.

Ma i paridadana, “Tevera i ʼraḡe bo?” Ma taui i paribelei, “Ee tauna i ʼraḡe.”

20 Anina ma David debidebiei i vomairi ma i toa ma i vigara ma monamona gabugabui i toai ma i nae au numa gara da i voepaepa. Ma i nae me au numa ma lam i vibaḡei da i neiai ma i am.

21 Ana numa babadai i baiei ma i riwa, “Maranai tevera lawalawaina, tam u uji ma u mogu, ma tevera i ʼraḡe, tam u vomairi da e amam!”

22 David i paribelana, “Ee tau a uji ma a mogu maranai natu lawalawaina. A notai da Bada ina rau-nuapoapoeleu ma natu ina lawana. 23 Wate marina i ʼraḡe aiwai aubaina ana u uji? Ana neiana-meleai bo? Amapo ana nae awarina wate tauna eḡa ina nei awariu.”

24 Anina ma David awana Bathsheba i vinuaubai ma maiteni i matave. Ma tevera orotona i ḡuni ma David i ḡorei Solomon. Bada tevera nuanuana i vaia, 25 ma lamna aubaina Bada peroveta Nathan i paritawanei da tevera wavana i ḡorei Jedidiah*Wei anona Bada ana nuavainana.