1-4 Nil Jacob.aniya, a' puk nungantam anangana, than aak Canaan angan wun-wunin. Nil puk nungantam Joseph.aniya, ngechwiy iiy-iiy, kaap 17 want nunang Josepha, puth wunychin nungantamangan than min sheep anangan pi'-pi'in. Nil puth Jacob.an kaangk nungant Joseph.antaniya, a' niliya, wanch thonamant thawant coat thonam yumpow Joseph.anta, ongk, coat min paththama! / Puth nil Joseph.an aak-ngeey-a, nil Jacob piip thanttaman pam wuut ngulan weem. Nanpalan nil kaangk nungant Joseph.antaniy, puth than wuny-kunch al-alangan ngangk wayangam kalin nunang, puth piip thanttamangan alantakaman Joseph.ant kaangk wun, puth thant wiy al-alantan ep ya'a!

5-11 Ngul-ngulana, nil Josephang pith thanttakam a' nil waa’ thant pithaniy: “Ngay inan pithanga ngamp may wheat ump-umpamp field.ang angpan. Kanan umpampa, yalmathamp, a' ompam ngul kathamp thanang, kuuyang. / Ompam thonam ngayan kathang-a, minam than, koochanam. Ompam niiyantamana, niiyan kathan thananga, ya' thuchin ompam alantan ngayan kathang.” Than wuny-kunch anangan thawin nungant, “Aa! Wantaka! Nint ngul moom iiyān ngant ey? Nanan nint ya'a!” Puth ngulana, thonangan pith Joseph.anganiya, a' waa' piip-kunchant a'wuny-kunchant, thaw thant, “Nil kincha, kepa, a' thunp chil yot pithang, thunp elevena! Than thuchin ngathar.” Nil Jacob.angan wak-wak nunang, “Nint wik nanangan thaw-thawangan ey? ngan kaath piip nungkarama, wuny nungkaramangan ngan nungkar thuchān ey? ka' kincha, kepa, thunp yimanangan thuchin nungkar ey?” Than wuny-kunch al-alangan mee' kulangam kal-kalin nunang. Nil piip thanttamangan ep ngaantam-ngeey-ngeey pith puk nungantam anangan, Joseph.antaman.

12-24 Ngul-ngulana, than wuny Joseph.antam al-alangan min sheep thakan pi'-pi'in aak Shechem.angan. Jacob.angan Joseph ngul kuchan thant yipam thathow thanang than yaaka' minam. Nil puth Joseph.an kan-ngul iiy thant. Than wuny-kunchangan thathin nun anpalan iiy-iiy-a, a' than thawin thanttakam, /“Puk pithatiyan nanpalan iiyan-a, ngamp mulathāmp nunanga, a' ngamp piip ngamparamantan ngul thawāmp ku' ngekanamanga, lion.ang nath yaaka' mulath nunang. A' ngamp pith nungantaman kan thathāmp kan-kanam yaaka', nath ya' yaaka!” Nil Reuben.angana, pam wuny-kunch alangana, kaangk kaa'-piichanathowan Joseph.aniy, a' thaw thant, “Ke' mulathanak nunanga, aak aawar thangk nanana, angan thee'āmp nunang a!” / Ngul Joseph.an wamp thantan-a, thanan coat minana thapathin nungantam, a' Joseph.an thee'in nunang aawarang nath pek, kech.

25-30 Than wuny-kunchangana, kan-ngul may mungk-mungkin, a' pam wiy aak Midian.am anpalan thinth wampin thant. Than puth aak Egypt.ak iiy-iiy.in. Nil puth Judah.an thaw thant kuunch nungantamant, “Ngamp pont many ngamparaman Joseph.an kan kuchāmpana! thanttang iiyowa! Nil aak um puuyam working man thant mak iiy-iiyowa! Ngamp yot ke' piikimp'ana! Nil puthwey pont many ngamparama!” Thanan wuny-kunch al-alangana, Joseph.an maayin nunang keny aawar thangk anpalan, a' thee'in nunang pam al-alantan money.ak, 40 dollars.ak. Thanan pam Midian.am anpalana, Joseph.an kan-ngul kalin nunang, aak kech aak Egypt aakanakan.

31-36 Than wuny-kunch al-alangana, min goat many mulathin, a' than coat min Joseph.antaman chaaparang makin. A' than coat minana, piip thanttamak kuchin, wik thamp kuchin nungant, “Ngan coat inan uwana, nengk nungkaramantam ya' ey?” / Nil Jacob.angan coat.an thath-a, nil ngangk ik, a’ thaw, “In coat nengk ngatharamantamana! Lion.ang yaaka' mulath nunang, a' mungk nunang ngul.” Nil Jacob.an ngangk way wun peey-peey, ngaa' thon-thonan peey-peey Joseph.antaman.