2
Sinar la bagara ko sinar den
1 Bore te se, ana den ikiman mu ninguru ilukuawunak ale karo tunakko, munan umu te mu asele ana me nguala sipa nama kurakor kuring nagunakko. 2 Mu awuk, den engel alo nuguring te ikiman mu diram se nunguning, se awiriya den mu biriruwura iwita beteram, ale me karo tuam, mu ko koma memek arigam. 3 Bore te se, ana te anananga sangaru taukko ura biya beteram umu me ikia iwita betenak mu, ana koma memek me tanak i?*Sinar ta ko den: Hebrews 10:29; 12:25. Nanga sangaru ta ko munan umu nanga Kari Biya kota giram ko nanga maonam; se udagi awiriya nu kuring te ikiman mu awote tala nanga manorman ale sokel tuman. 4 Se Kaem betela kausa duap duap se miracle duap duap bitakaso ale den umu sokel tuikaso. Ale Bur Laili ko gomang ikia te la munan duap duap kariimet nungaru gurugam.
Jesus ali kari nunguning ko aratam
5 Ana ali iru aratukko ko baluwasan umu mu, nu engel alo bitarmonko iki se me baluwoso, mena. 6 Bare batoga bo te iwita baluwoso:
“Ana kariimet mu anape mel
nunguningkiri se ni ana mel biya ko
nanga betesam, ale ninguru nanga bitarsam?
7 Ni engel alo nunup biya bita nungarem,
ale ana katirta†Bala bo mu “tom tukunang ko”. nobowa ningi ana
nanip nikitang karogo nanga beterem.
8 Ni mel suen la nabowa ningi awurem, ale ana bitarnakko balem.”‡Psalm 8:4-6.
Ario, se mel suen la nabowa ninga awuram maso mu Kaem mel bo ta nanga ilu kia kam ta me beteram, mena. Bare ana aitak melmasak suen la nabowa ningi aniso se me ariwasan. 9 Bare mel ana ko ari ikiman mu Jesus ikup yaman giok ale kuerukko wore te se, nu tom tukunang ko mu katirta engel alo nunga nobowa ningi iwita bita kam beteram. Nu Kaem ko gomang nangara ko munan te, kariimet suen la nongoma tam ale nu giram kuera mateng ningi namaram. Bore te se nu aitak nikim biya se nup biya mu kitigat iwita supuling tugumam mu ari ko ikiman.§Jesus: Philippians 2:8-9; Hebrews 5:8-9.
10 Melmasak suen la mu Kaem ko la, se nu te melmasak suen la umu terong la aniso. Noko gomang mu kariimet suen biya nunga gi, noko nikim ningi noko kuriang alo iwita nunga awurokko, bore te se nu nunga sangaru ta ko kari umu ikup yaman ko munan te nungam burangaram. 11 Se koma singsang la, Kakirip kariimet nunga laili awuso mu ta se, kariimet nu nunga laili kauram mu nuna gue suanta. Bore te se, Jesus nuna noko launuria iwita nunga aurokko mu me doloso. 12 Nu balso:
“O Kaem, ani nika nip biya aga launuria nongoma te balu pagikko;
ale biguwura motam te nip biya kisa ko wur iluwekko.”*Psalm 22:22. Jesus anananga balso noko launuria maso: Mark 3:35; John 15:14-15; 20:17.
13 Ale aking mam:
“Ani nu te la ira sanamasam.”
Ale akingtala balam:
“Ani se Kaem ko kuriang alo ani aisam mu nongorak iweya.”†Isaiah 8:17; Isaiah 8:18.
14 Se kuriang alo umu ali ewere ko kariimet, wore te se, nu nuna iwitatala ali kari ko aratam, ale ko kuera mateng umu te asele kakirip kuera mateng ko sokel iluwara umu maguwuram. Kakirip umu mu awiriya mena, mu Satan. 15 Nu uwuta beteram ale te kariimet suen la kuera mateng ko nguangara nunga taliparam se bagaman mu nunga nguangara umu menawuram. 16 Nunguningta, nu engel alo me nunga sangarso, mena, mu nu Abraham ko imas bitir, taleng girigir nunga sangarso. 17 Duap bore te se, nu lage suen la te noko launuria umu nunga turan tala beteram. Se lage uwuta mu te asele, nu gomang nangara ko priest supuling ko baga se Kaem ko ura diram la bitiruk ale kariimet nunga memek kota kumik te giok ale karogo kuerukko. 18 Ikialko. Nu kota mu ira ariga ko ikup yaman giam ale ko ikiso, wore te se, nu awiriya ira ariga ningi bagasan mu am nunga sangukko terong la.‡Jesus yaman ikup giam: Hebrews 4:15.
*2:3: Sinar ta ko den: Hebrews 10:29; 12:25.
†2:7: Bala bo mu “tom tukunang ko”.
‡2:8: Psalm 8:4-6.
§2:9: Jesus: Philippians 2:8-9; Hebrews 5:8-9.
*2:12: Psalm 22:22. Jesus anananga balso noko launuria maso: Mark 3:35; John 15:14-15; 20:17.
†2:13: Isaiah 8:17; Isaiah 8:18.
‡2:18: Jesus yaman ikup giam: Hebrews 4:15.