20
Ikup kam ningi Kaem te la ira sanamanakko
(David ko wur)
1 Tom ni ikup ka iramurokko agi mu, Yawe nika sangukko;
anananga nangamang Jacob ko Kaem mu nika sinar taukko!
2 Nu ko temple biya te baga se ka sangukko;
nu ko wonong Zion te baga se ka bataguru taukko!
3 Nu ni tama bita nu tuata mu nu ko kuamin ares maukko;
nika tama suen la mu nu gomang tuokko.
4 Nu mel suen la ni ko kuesam mu yam kisokko;
ale ni ura bitarko ko ikia towasam mu ka sanguk se ningo la bitarko.
5 Buta se tom ni kager menawur ale marirer mu,
ana ni marirerem mu ko amilmilanak ale nanga Kaem ko nup patawunakko.
Anananga nangamang mu Yawe nika guranek suen la iki karo kisokko.
6 Aitak ani ko ikiem, Yawe nu kota king baongam mu sangarso;
nu ko sor laili duruk wonong te baga se noko ngatangara ikiso;
noko sokel te nu sangarso se nu kager suen la te mariroso.
7 Sor saki nunga kager ko mel, karis se
horse suen biya, mu te ira sanamasan;
bare ana mu Yawe anananga Kaem mu te ira sanamasan.
8 Se nuna mu sanami turutuwumon ale dagulamonko;
bare ana mu mariranak ale sail karogo sanamanakko.
9 O Yawe, ni king sangaru se nu marirarukko!
Tom ana nika arunak mu ni anananga sangaruko!