40
Kaem kota suanta anananga Saonga Kari gira
(David ko wur)
1 Ani aimi ago kaperem ale Yawe kote la
loaga se lagerem se nu koma gurugu aisam ale aga aira ikiam.
2 Ani mutim lom gege karogo iwita ningi bagerem se
nu aninga patawuram se bausem se sor
garagarayam aora mu te aga beteram se sanamerem.
3 Ale amilmil aisam se noko nup te patawura ko wur bo iru ilusam;
suen biya munan imi arigimon ale ko sinar amon,
ale Yawe te la ira sanami se lagamonko.
4 Awiriya Yawe te la ira sanami lagoso mu amilmilarukko;
nu nunumi patawura alo se kaem kawel
alo nogowom karo ko kariimet mu me karo nungarso.
5 O Yawe, aninga Kaem, ni kilek bibiya sokel ago suen biya beterem;
ni ana nago ko ikia ningo ningo nunguru awurem.
Kari bo ta nika tuar mena;
ani betela nika munan suen biya umu balu saparikko me terong tala,
mu awuk, mu suen biya nunguningkiri.
6 Ni aninga tama bita kisa ko munan mu te me loaga lagasam,
bare ni aninga adogowa galuwurem se te kiring iki karo tuekko.
Mel altar te kai sapasan mu se,
memek te siwu nangaruko tama bita kisa mu ni me te gemang tawun biya aniso.
7 Se ani balem, “Ani ni kiring karo tuekko tairem iweya,
nika batoga te ani ago ko iwitata balem se aniso.
8 O aninga Kaem, ani nika gemang karo tuekko ninguru kuesam;
nika den mu aninga angamang motam ningi aniso.”
9 O Yawe, ni ikisam, ani biguwura biya ningi agiring me kalosam,
nika saonga te nanga sangaru taem mu ko nunga manaru lagasam.
10 Ani nika diram la karo tuata ko munan
mu se, ka kiwem ana me nanga bita ariga, nangarak la baga se
nanga sangaru tata ko munan mu ko agiring me kalosam.
Ani nika kariimet biguwura ningi, nika
gemang lila se ka munan nunguning mu ko nunga manaru sapasam.
11 O Yawe, nika gemang lila ani ago ko mu me to ilupko;
nika kua aisa ale ka bitua yawara mu pempem la aninga iramurokko!
12 Mu awuk, ani ikup memek suen biya aga lautam;
se aga memek bita lagerem mu aga iramuram se kulupik bo te aratikko mena.
Aga memek mu suen biya nunguningkiri, se kaura moke mena;
se angamang motam sokel mena saparam.
13 O Yawe, gemang aisu ale aga sangaruko;
pasak ala tair ale aga sangaruko.
14 Se kariimet aninga momonko
negawasan mu dolomon ale parasa namamonko;
ale nuna ani memek te namarikko nongomang aniso mu,
pelemon ale magi magi namamonko.
15 Ale awiriya aninga gusirsan mu
nunga dolara nunga iramurokko.
16 Bare kariimet nika kua lagasan mu
nonoman nungeruk se ni ko ko amilmilamonko;
kariimet ni nunga sangaruko nomotam bita lagasan mu pempem balmon,
“Yawe mu ningo!” ma balmonko.
17 Bare ani kituwura, asokel mena;
buta se O Biya, ni ani ago ko kamili me saparukko;
O aga Kaem, ni aninga saonga se aga bataguru ta ko kari;
ni pasak ala tair ale aga sangaruko.