84
Kaem ko kuwim laili te ilak bagara ko amilmil
(Korah ko kuriang alo nunga wur bo)
1 O Yawe Sokel Garagar,
nika kuwim laili mu am yawarakala!
2 Ani mu te bagarikko kua lagasam;
ni la marak duap, se aninga adera,
angimik lilim la nika temple laili mu te ni kerak bagarikko ko kuesam.
3 Inangnang singelngel nika altar duap te
singir mosan ale nunga gotek nunga sinar tasan uwutata.
O Yawe Sokel Garagar,
ni aninga King se aga Kaem.
4 Se kariimet nika temple ningi baga se,
nika wur ilu se, nika nip patawusan, mu ninguru amilmilamonko.
5 Kariimet nikate sokel to gilingisan,
ale duruk Zion te namamonko ko
nongomang biyala aniso, mu nuna
marak sokel amilmil ago te bagamonko.
6 Tom tai gusong Ma Niara ko masan mu te kapasan, sor garagarayam mu te,
bare kuwim mu geraguk yu te aratu kapawara iwita aratukko,
se tuwik kaposo se yu laiso iwitata aratukko.
7 Se sokel amilmil ago la lagamonko;
ale suan suan nama Kaem Biya Zion bagoso mu koma te aratamonko.
8 O Yawe Sokel Garagar,
aninga guranek ikiko;
O Jacob ko Kaem, ikiko!
9 Nanga king nigita nangarem wore
marak tuiko;
nu anananga karem iwita bagoso.
10 Ani nika temple ningi bagarikko ninguru ko kua lagasam;
ani sor bo te, day tom 1000 baga se am
amilmilarikko;
bare aking day tom suanta nika temple ningi baga se ko amilmil mu,
day tom 1000 mu am kia saparam.
Ani nika temple ningi kasu nagu aratu se lagarikko ninguru ko kuesam;
bare ani kariimet memek mu nunga
kawam ningi dagi bagarikko me ta ko kuesam.
11 Mu awuk, Yawe mu anananga King se
nanga karem; nu ana nanga Kaem.
Nu gomang nangarso, ale nup biya nangarso;
ale nu kariimet munan diram la betesan mu anapeya mel te me nogore iluso, mel ningo ningo nungarso.
12 O Yawe Sokel Garagar, awiriya nikate
ira sanami lagoso mu amilmilarukko.